Pengaroh dalam budaya Iban

Rabu, 17 April 2013

Pengaruh dalam budaya Iban

Nyadi aku sekali tu deka ngenangka sebengkah agi utai ke bisi dikemeran raban bansa Iban kelia iya nya pengaruh. Tuju karang senentang pekara tu ditulis iya nya deka bekunsi penemu enggau bala nembiak rebak baru ke enda kala ninga utai ti dikumbai pengaruh. Pekara baka tu nyadi ketegal sida ke rebak baru udah nerima segang pemansang dalam pengidup nitihka singkang pemansang dunya sereta pemansang pengidup orang bukai.

Pengaruh enti dikalihka ngagai jaku English nya dikumbai amulets tauka black magic. Ba jaku Melayu bisi nya ngumbai guna tauka ilmu guna-guna lalu bisi nya dikumbai sida azimat. Nitihka Anthony Richards (1997), pengaruh nya talisman, amulet, charm or any small object (a collection of them) possessed of power that can be worn to protect or benefit the owner. Reti nya barang utai ti mit ti tau dikena nyaga sereta ninding orang empu ari utai ke enda manah tauka jai. Iya mega tau mai penguntung ngagai orang ke ngena.

Pengawa besimpanka pengaruh tu endang siti ari budaya Iban ke dikemeranka ari aki ini bepun ari pengarap lama. Pengaruh munyi ke diterang sebedau tu endang dalam mayuh macham tukuh ari tanduk jelu nyentuk ke utai ti disimpan dalam puchung tauka butul.

Pelanduk ti bisi tumbuh tanduk dikearapka Iban tanduk iya tau diambika pengaruh iya nya nyadika ubat penunduk. Reti nya orang ke empu pengaruh tu ulih ngasuh orang bukai nunduk ngagai iya sereta nitihka jaku tauka asuh iya ke empu pengaruh nya.

Raban bansa Iban mega arap diri kebal. Bisi sekeda nya ngena ilmu kebal nya lebuh nyabung. Manuk ke bisi ubat kebal nya tan belaban enggau manuk sabung bukai lalu enda mudah telih dirindas taji ti tajam. Ubat kebal nya mih ti ngasuh manuk nya enda tau telih tauka bakal.

Sebengkah agi pengaruh ti bisa nya dikumbai punti enggau pulung. Punti tu suah agi digaga manang lalu seruran agi ditani ba jalai ke dipansa orang ke deka dirachunka nya. Lebuh orang ke dituju nya mansa tauka nengah jalai nya iya tau kena punti. Punti ti semitan tau ngasuh orang ke tekena nya pinchat, kepi tauka berasai pedis ba kaki.Baka nya mega pulung. Pulung digaga manang tauka beliau lalu ulih terebai ngagai orang ke dituju. Nerebaika pulung nya pengawa ti dikereja beliau dikena nganjung pulung ngagai orang ke deka dibunuh. Kenu ku orang, mata iya ke udah kena pulung nya mirah sereta belai. Iya mega deka ngasaika diri pedis sereta enda nyamai isi.

Orang ke sakit ketegal pengaruh semina ulih diubat dukun, beliau tauka manang ngena pengaruh mega. Ubat moden kemaya hari tu enda semitan sereta enda ulih dikena ngubat orang ke tekena pengaruh orang. Nya alai agi bisi sekeda raban bansa Iban ke agi arapka penyakit ti baka tu semina ulih diubat ngena chara lama. Ketegal nya mih agi bisi raban bansa Iban ke ngemeranka pengarap lama.

Iban mega arapka pengaruh baka rajut ulih nyaga diri empu ari penusah. Sida ke balat agi bekena sereta besimpanka pengaruh ti baka tu nya sida ke nyadi soldadu. Taring babi enggau tanduk rusa ti dikeulihka nengah mimpi tau bendar dikena nyaga diri ari dikena timbak munsuh laban bisi empelias lalu engkerabun nya ngasuh orang enda ulih meda. Maya belaban enggau munsuh bisi mayuh macham pengaruh ti tau dikena. Batu ratai, daun, pinang enggau libut nya dikena ngeringka diri enggau semengat. Duri enggau sumpit nya dikena lebuh matau munsuh lalu batu kulat dikena ngenakutka munsuh. Kerai nya baka kanching dikena nyaga diri empu. Mali lebu, gamang enggau kebal pesiar nya dikena ngeregau raban munsuh.

Siti agi aspek pengaruh nya dikumbai puchau. Iya suah disebut dalam ati diri. Muchau nya pengawa macha puchau. Puchau tu balat agi dikena lebuh bisi penusah ngenyit nyadi. Ambika banding, lebuh bisi anak mit ke bisi sakit ngenyit baka pedis perut lalu maya nya mega nadai ubat moden ke bisi. Puchau ti semitan suah ngasuh orang Iban balat agi arapka utai tu.

Mayuh bansa pengaruh bepun ari nama batu kelebih agi iya ti dikembuanka raban manang.
Batu ilau nya batu ti dikena manang ninjau endur semengat orang ke sakit. Siti agi chunto nya batu lichin. Orang ke ngembuan batu lichin nya enda mudah kena empa pengaruh laban rapit dinding bulu.

Kenu ku orang tuai bisi tiga chara alai ngulihka pengaruh. Keterubah nya pengaruh diambi ba pandung ti diberi petara lebuh sida dikangau ngabang (disebut dalam leka pengap) maya gawai. Bisi mega pengaruh nya diberi sebayan maya sabak iya nya diberi semengat orang ke udah lesi dibai hari. Ketiga nya nengah chara nampuk. Orang ke nampuk tu teulihka pengaruh sida nengah mimpi lalu sida ke nampuk tu suah iya ba bukit, pendam tauka sebarang endur ti jauh ari mensia mayuh. Pengaruh suah dikena ba berang tauka diikat ba punggung.

Enti kitai raban pemacha ke kala mending orang begeliga maya pengerami gawai dia bisi disebut nama sekeda pengaruh gembar tubuh. Sekeda chunto pengaruh ti bisi disebut ba leka geliga nya baka rachun gayung penyungkam dalam, rachun kumpang emperegam bisu, pantak, tejulun punti teguli, gigi muau, leka begumba igi jinggau, igi nibung enggau ti bukai.

Kemaya hari tu ketegal ke ubah sereta napi segang pemansang dunya dia raban bansa Iban udah mayuh mekuh sereta ngemeranka pengarap baru. Budaya bekenaka pengaruh udah kurang sereta bisi nya udah nadai agi disebut dalam pengidup besehari-sehari.

Posted by uchutedung at 8:37 PG

http://tempalaikenang-uchutedung.blogspot.com/search/label/Budaya%20Iban

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s