Gagong perengka ke beguna ba bansa Iban

 

HomeUtusan Borneo - Berita Iban – Gagong perengka ke beguna ba bansa Iban

Gagong perengka ke beguna ba bansa Iban

by Judan Bungap. Posted on October 14, 2010, Thursday

Diatu dikena nyadika jerukan atap ngagai orang ti dipebasa

NGEMERATKA NGEPAN LAMA IBAN: Sammy ngena gagong maya betemu enggau pengarang berita, apin lama tu tadi.

SIBU: Nyangka enda mayuh kitai ke maya hari tu kala meda gagong tauka baju ke digaga ari kulit jelu siga ti dikena aki ini kitai dulu kelia.

Nitihka jerita tuai, gagong suah dikena kitai bansa Iban kelia maya nurun ngayau mulau menua, ngulu pengerami gawai besai enggau pengawa bukai ke bisi pengerami aja.

Ngepan tu ukai dikena ninting hari sereta ukai dikena sengapa orang tang ba orang ke deka nurun ngayau, orang ti kering, berani sereta tampak nama.

Nya alai maya ke mansang ngayau ngaluska menua, kenu ku jerita, bala munsuh pan nyau takut enti meda mensia bekenaka gagong tu, lalu berasai takut enti deka belaban.

Gagong digaga ari bulu tauka kulit jelu siga baka jelu jugam ke mar diulih laban jugam jelu ke kering sereta mangah, nya alai sida ke bisi baju tu ukai sengapa orang enti enda kering sereta bisi pengaruh.

Kelimpah ari nya, ngepan tu disempulang enggau taring jani ke berantu sereta ngembuan pengaruh bebunuh enggau dinding bulu.

Kemaya hari tu, gagong mar dipeda laban nyangka nyau mimit agi kitai bansa Iban agi bisi nyimpan ngepan tu.

Diatu, kitai rindu bekenaka baju burung laban nyamai agi digaga kelimpah ari mayuh dijual ba sebelah pasar.

Nya alai, ketegal tu mega, mayuh nembiak baru bisi nya enda kala meda gagong laban nyau bisi baju burung lalu bisi nya digaga ngena chara ke moden maya ngulu pengerami baka melah pinang tauka maya ngintu Hari Gawai.

Laban nangika pekara tu majak nyadi, siku kitai bansa bisi ngaga gagong ti ngembuan tuju mai nembiak diatu bela ampit meda baka ni gaya gagong taja pan bisi digaga ngena ubah mimit.

Sammy Ngelambai, siku anak bansa Iban ba sitak menua tu ti ngemeranka pengawa ngaga gagong nengah jalai dagang tauka komersial.

Iya udah berengkah ngaga ngepan tu kenyau ari taun 2004 suba.

“Kitai enggai meda anak uchu kitai kemaya hari tu saru runding senentang ngepan kitai bansa Iban dulu kelia.

“Nya alai enggau chara tu aku ngarapka ulih nyeliah penusah tu,” pia ku iya madah ngagai pengarang berita, apin lama tu tadi.

Sammy ti mega, raban komiti Gerempung Dayak Sarawak (SDNU) sitak Sibu madahka, enti nadai orang ngemeratka penanggul tu nadai orang bukai agi ulih dikandal enti enda bansa kitai empu.

Nya alai, ku iya, sebedau tu iya mega bisi meri gagong ngagai gerempung main asal ba sekula sitak menua tu.

“Tu ngambika sida (nembiak sekula) nadai penanggul senentang bekenaka ngepan ke chukup nitihka pematut sereta nadai penimpang,” pia ku iya madah.

Iya mega madah, gagong ke digaga iya mega bisi dibeli ari menua luar sitak tu.

“Bisi mega bala pemesai meli gagong tu ngambika nyadi jerukan atap tauka tanda pengingat ngagai temuai ke dipebasa maya datai ngulu pengerami ke diatur sida,” pia ku iya madahka baru.

Maya ditanya senentang bakani chara iya begagaka ngepan tu, Sammy madah diatu gagong mar agi digaga laban kulit jelu siga tusah digiga laban nyau deka punas.

“Aku bekenaka kulit jelu kambin bansa Jamnapuri ke dibeli ari menua India laban semina ba menua tu aja bisi jelu nya,” ku iya.

Sammy nerangka baru, iya bulih setok tu ari ejen ke udah diberi pemendar ari menua Jakarta, Indonesia.

“Kulit kambin tu besai agi enti dibanding enggau kambin ba menua kitai,” pia ku iya madah maya ditanya kebuah iya enggai ngena kulit ari menua tu empu.

Taja pan baka nya, Sammy madah, setuk kulit kambin tu enda bisi belama nya alai ku iya, maya meli kulit kambin nya, iya meli enggau penyampau ke mayuh ngambika enda meri penanggul lebuh deka ngaga gagong.

Gagong ke dijual iya entara rega RM450 katas sereta bepangai enggau rengka bukai ke bisi disangking ba gagong nya baka taring jani, manik enggau barang bukai.

Sapa bisi ati deka meli tauka buking gagong tau betelefon ngagai iya empu nengah lumur 013-8184540.

Read more: http://www.theborneopost.com/2010/10/14/gagong-perengka-ke-beguna-ba-bansa-iban/#ixzz2W0xPyRu5

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s