KEDU “LANG NGINDANG”

KEDU “LANG NGINDANG”

Kedu tauka ensumbar iya ke tampak agi iya nya Lang Ngindang tu tuai Iban Skrang ke diau di Nanga Bunu. Perintah Rajah Brooke kelia enda kala nyebut nama iya Kedu tang ngena nama ‘Lang Endang’. Ketegal pemerani enggau penaluk nembiak ke iya dia iya dichirika perintah nyadi penghulu di Nanga Bunu, Skrang. Kedu suah nguluka bala iya ngayau ngalahka bansa Kantu ke diau di Merakai di menua Kalimantan, Indonesia. Maya nya Kalimantan tu kena pegai perintah Belanda. Iya suah nurun ngayau ngena perau kayau sebuah ke besai bendar. Amat Kedu kelia beberita berani tang iya semina tau kayau aja.
Bisi sekali iya beban perau pengayau ba munggu sigi di Tinting Ensanga anatar Ulu Tebat enggau Ulu Buai di Skrang. Ednur tu enda jauh ari rumah panjai sida. Udah kayu ditebang iya tumbang iya pan lalu ngetu belelak dulu. Iya ngalika diri ba bandir kayu ke udah tumbang nya tadi. Laban ke kelalu balat lelak, dia iya lalu telelap tinduk jenak amat.
Lebuh ke tinduk tu, dia Kedu lalu bemimpi asaika agi nebang kayu sepi iya. Lebuh ke ngeringak nebang kayu dia iya meda tak bisi rumah panjai orang ari atas iya ke nebang kayu nya. Lebuh iya malik ke atas, dia iya bisi meda siku indai tuai orang nyenguk ari mua jenila. Indu nya malik ngagai iya lalu bejaku nagang iya nebang kayu ngelingi nya enggaika ngerusak madang pisang madang tebu sida di ujung bilik. Ninga indu nya ngerara iya dia Kedu lalu nyaut, iya madahka diri enda nemu dia bisi rumah orang.
“Rumah sapa tu dih?” ku iya nanya indu nya.
“Tu mih rumah panjai orang Gelung”. saut indu nya. “Tutung bisi ditu” ku iya baru.

Ninga indu nya munyi nbya, Kedu lalu niki rumah sida nya. Datai iya ba tengah rumah dia Tutung lalu ngelaluka iya. Kedu pan duduk ba ruai Tutung. Lebuh ke berandau, dia Tutung ngelalau Kedu enda ngasuh iya nebang kayu sengapa semak rumah iya enggaika ngerusak utai tanam ngelingi endur nya dia. Sekali agi Kedu madahka diri enda nemu nya bisi rumah ba genturung nya lalu nya kebuah iya enda madah dulu sebedau nebang.

“Jemah ila enti nuan ngereja pengawa ke besai, anang enda ngangauka kami nuan. Tu ngambika kami nulung nuan” pia ku Tutung.

“baka ni jalai aku madahka kita dih?” tanya Kedu.
“Ah, bunuh nuan manuk siku, ambika piring lalu kangauka kami enggau nyawa ke inggar. Kami deka datai nulung nuan”. pia ku Tutung nyaut iya.

Tutung lalu madahka Kedu tu ‘tau kayau’ laban iya udah ngenataika diri di rumah orang Gelung.

“Enti nuan nurun nguluka kayau, nuan mesti ngangauka kami minta tulung” ku Tutung.

Udah nya Kedu lalu tedani. Nya baru iya nemu nya mimpi. Iya pan mulaika diri ke rumah.

Taja Kedu tu udah dichirika orang nyadi penghulu tang iya mengkang enda puas ati ngagai perintah Sarawak ketegal ngasuh rayat mayar chukai pintu. Kedu tu lalu ngapi-ngapika nembiak iya enda ngasuh sida mayar pupu nya. Kelimpah ari nya, iya mega ngelanggar atur perintah Sarawak laban suah matk kayau ngalahka bansa Kantu di Merakai, Kalimantan.
Pekara ke balat bendar ngasuh ati iya tebunsa ngelaban perintah Sarawak nya laban perintah udah nyerang bala iya lebuh bala iya mansang deka ngayau ngalahka bansa Kantu. Pengeringat ati iya maya nya endang enda ulih ditagang agi. Dia Kedu lalu berengkah angkat ngelaban perintah.
Ketegal penyalah iya nya mega dia Tuan Maxwell, Residen menua Simanggang maya nya lalu ngasuh Orang KAya Pemancha Nanang nguluka bala perintah nyerang rumah Kedu tu di Nanga Bunu dalam taun 1879.

Udah alah di Nanga Bunu, Kedu enggau bala manuk sabung iya Uching “Kesulai Tandang”, Aming “Ijau Kemelang” enggau ke bukai nyengkaum Sigat ari Tanjung, Basek “Tengkujuh Darah” ari Nanga Tanyit, Dunggau ari Nanga Murat enggau Busut ari Enteban lalu lari. Sida ke lari tu ngaga kuta di tuchung Bukit Stulak.
Dalam taun 1881, dia sekali agi bala perintah ke betuai Orang Kaya Pemancha Nanang ngayau ngalahka Kedu “Lang Ngindang” di Bukit Stulak. Kedu pan alah mega ditu. Udah alah dai Kedu enggau bala iya nundukka perintah. Sekeda ari bala iya pulai ke Skrang lalu ke bukai nya lalu nitihka Kedu pindah ke Kanowit. Kedu diasuh perintah meri sepuluh igi tajau nyadika jamin iya enda ngaga pengachau agi ngelanggar undang-undang perintah.

http://forum.engkabang.net/index.php/topic,21391.100.html

4 thoughts on “KEDU “LANG NGINDANG”

    1. Jetie Ambin

      Uchu Lang Buban, kindly identify yourself. Aku tuk peturun Baring Lang Buban serta Kedu Lang Ngindang. Look for me at Facebook.

      Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s