UNGGANG “LEBOR MENOA”

UNGGANG “LEBOR MENOA”

Dalam menua Entanak kelia, enda jauh ari pasar Betong ke diatu bisi sebuah rumah panjai ke ngambi nama sungai Entanak mega. Dia bisi siku tuai serang ke pemadu dikenangika kelia ke benama Unggang.
Bisi sekali Unggang tu bemimpi betemu enggau Kumang seduai Lulung. Dalam mimpi nya sida tiga betemu ba bukit Santubung. Dia Kumang madahka Unggang iya deka nyadi siku tuai serang ke beberita bendar. Enti nyema iya ngayau tunga adap matahari tumbuh dia nadai siku orang ulih enchepaika jari ngelaban iya. Enti ngayau adap matahari mati dia naka Luba Santubung aja Kumang seduai Lulung ulih ngemataka iya.
Belabuh ari nya Unggang lalu beberita. Iya nyaga Batang Saribas nyentukka nanga. Enda ngira sapa ke tama Saribas maya nya sigi diserang iya magang. Unggang bisi perau pengayau sebuah ke ulih muat 100 iku manuk sabung iya. Ari jerita orang tuai nadai siti perau kayau bukai ke berani ngampir perau Unggang maya nya kelia. Bisi sekali Unggang nguluka serang siti adap Nanga Sungai Sarawak. Menua alah bebendar lalu anchur ngenjing baka ke ditebas. Belabuh ari nya, dia menua nya dikumbai orang Muara Tebas. Ensumbar Unggang maya nya baka tu Unggang “Lebur Menua, Lebur Nanga Tuang, Tau Serang”.

Unggang ke nyaga Nanga nyentukka ulu saribas tu tadi endang enda milih sapa-sapa ke diserang. Taja pia, enti bansa Laut ulih nelusurka diri peturun Abang Gudam dia sida enda kena serang. Bisi sekali Unggang undur ke Sarawak (Kuching). Datai din dia bala Cina bepinta pemendar ari iya deka bedaja ke menua Saribas. Unggang ngelalau bala sida ngasuh sida ngantung menira burak siti ke tanda maya ke datai di Nanga Saribas.
Ari nya tadi genap kali Cina ke datai deka bedaja sereta belampu ke Saribas dia sida iya ngantung menira burak ngambika enda kena serang Unggang enggau manuk sabung iya.

Ari nya tadi ulih bala Cina ke deka bedagang tama Saribas. Maya nya sida bedau bisi bekedai tang bejual ngena perau(bangkung) ke suah dikumbai Iban maya nya belampu. Laban ke minta pemendar ari Unggang, dia suah agi sida Cina tu bepengkalan enda jauh ari rumah Unggang di Entanak.Nyau kelama sida lalu muka kedai atap apung ba genturung menua Entanak.
Anak Unggang tiga iku ke benama Muluk, Ketit enggau Luta endang sama bujang berani magang. Sida tiga endang suah mantu apai sida iya ngaluska menua. Bisi sekali sida tiga tu deka belayar ngiga tajau Guchi. Enda mukai-mukai lebuh ke belayar nya dia perau sida tiga karam ba genturung Tanjung Datu ke diatu. Semina repik langkan perau aja ke bisi ditemu orang maya nya.
Peturun Unggan ari anak iya ke benama Sulan (indu) baka tu. Sulan jadi enggau Awan lalu beranak ke Undu seduai Bunyau. Bunyau tu nyadi penghulu lalu keterubah Iban ba menua Betong talukka Raja. Iya bisi anak siku ke benama Bakir ke diberi Raja kelia gelar Panglima. Maya nya menya dia Raja nirika kubu di Betong. Bala kaban belayan Penghulu Bunyau tu mih ke mantu raja nirika kubu nya. Keterubah iya di Munggu Senggang. Udah nya pindah ngagai endur ke diatu ke dikumbai orang Munggu Betong. Lebuh udah tembu kubu tu kelia, dia Bunyau seduai anak iya Bakir diasuh raja nyaga kubu nya. Bisi sekali Aji apai Limpa datai nyerang kubu nya tang enda mujur.

Ari nya tadi ulih bala Cina ke deka bedagang tama Saribas. Maya nya sida bedau bisi bekedai tang bejual ngena perau(bangkung) ke suah dikumbai Iban maya nya belampu. Laban ke minta pemendar ari Unggang, dia suah agi sida Cina tu bepengkalan enda jauh ari rumah Unggang di Entanak.Nyau kelama sida lalu muka kedai atap apung ba genturung menua Entanak.
Anak Unggang tiga iku ke benama Muluk, Ketit enggau Luta endang sama bujang berani magang. Sida tiga endang suah mantu apai sida iya ngaluska menua. Bisi sekali sida tiga tu deka belayar ngiga tajau Guchi. Enda mukai-mukai lebuh ke belayar nya dia perau sida tiga karam ba genturung Tanjung Datu ke diatu. Semina repik langkan perau aja ke bisi ditemu orang maya nya.
Peturun Unggan ari anak iya ke benama Sulan (indu) baka tu. Sulan jadi enggau Awan lalu beranak ke Undu seduai Bunyau. Bunyau tu nyadi penghulu lalu keterubah Iban ba menua Betong talukka Raja. Iya bisi anak siku ke benama Bakir ke diberi Raja kelia gelar Panglima. Maya nya menya dia Raja nirika kubu di Betong. Bala kaban belayan Penghulu Bunyau tu mih ke mantu raja nirika kubu nya. Keterubah iya di Munggu Senggang. Udah nya pindah ngagai endur ke diatu ke dikumbai orang Munggu Betong. Lebuh udah tembu kubu tu kelia, dia Bunyau seduai anak iya Bakir diasuh raja nyaga kubu nya. Bisi sekali Aji apai Limpa datai nyerang kubu nya tang enda mujur.

Ketegal nya kelia, dia Pengarah Ringkai tu lalu dichirika Raja nyaga menua Batang Saribas kelebih tunga adap Layar. Maya nya menya Pengarah Ringkai tu mayuh bendar endur diau ba sebelah menua Betong kemaya hari tu. Sekeda ari endur sida ke berumah tu iya nya Tembawai Letung, Rantau Anak, Tembawai Gudang, Tembawai Murut Tembawai Jipun. Ba Tembawai Gudang menya dia Pengarah Ringkai kala ngaga sebuah gudang ke endur iya nyimpan tajau pemulih iya. Laban ke kelalu bangat mayuh tajau, dia gudang nya digaga endur nyimpan sekeda, Ari nya menua nya dikumbai Tembawai Gudang. Ba Tembawai Murut, dia Pengarah Ringkai nirika kayau ngagai mnua Trusan. Iya diasuh Raja ngayau kin laban bala munsuh menua nya balat udah munuh bala Iban ari Paku ke deka ngereja nyatu. Maya ke deka undur nya dia datai Melina ke beensumbar Bujang Berani. Iya madahka diri deka nepan perau Pengarah Ringkai nurun ngayau nya. Pengarah Ringkai enda tentu deka ngemai iya meda iya nyau tuai amat. Melina enda peduli lalu biar iya engkandur ba kemudi perau, enggau mih iya nepan perau nya. MEda baka nya, dibai Pengarah Ringkai mega Melina tu. Melina tu kena aya Pengarah Ringkai. Maya nya iya(melina) endang udah tuai bendar. Kebuah iya keran bendar deka nepan perau pengarah laban iya bisi mimpi. Mimpi iya nya madahka ngagai iya, enti nyema iya nepan perau Pengarah Ringkaim dia iya deka bulih dengah.
Datai di menua munsuh dia sida bedarat adapka rumah panjai. Bala munsuh, laban ke nemu bala Raja deka datai nyerang sida, dulu undur ngipa bala Raja ngaga nanga. Lebuh datai ba batang sungai siti dia bala sida Raja meda munsuh benung baru badu makai. Sida enda ninga penatai bala Raja laban ari ulu nya bisi wong sebuah lalu auh wong nya ngemenggalka pending sida. Melina tu tadi laban ke bisi senapang patah dulu meda siku munsuh benung ngirup. Tubuh sereta peninggi mensia nya jauh nyelai bendar ari kitai bukai. Enda chamang-chamang dia Melina lalu nimbak, munsuh rebah lalu mati enda tepadahka nyawa diri. Bala lalu negah sida ke baru udah badu makai nya tadi. Munsuh alah lalu kayau sida Pengarah Ringkai nya mujur. Melina lalu meri ngagai Pengarah Ringkai pala munsuh ke dengah iya tadi. Kebuah pia laban udah adat, enti nyema siku-siku nya bulih dengah sigi tauka lebih, sigi dengah enda tau enda diberi ngagai tuai kayau. Dengah MElina agi dikembuan peturun Pengarah Ringkai dataika seharitu. Sepengudah nya mega, dia MElina lalu nukar ensumbar iya ngagai “Balai Nyabung Nanga Trusan”.

Kelimpah ari kayau Trusan menya, Pengarah Ringkai mega kala enggau Kayau Sadok ti ketiga. Iya ke tu laban nganti petunggal iya Panlima Bakir. Maya kayau tu menya iya nadai bulih dengah tang Raja maya nya arap bendar iya ke mai tubuh mayuh ari menua Betong. Pia mega iya bisi bulih siku anak munsuh ke diaku/diambu iya nyadi menyadi iya. Sepemulai kayau Sadok tu menya dia Raja madah ngagai Pengarah Ringkai nya menua di Betong ke pulai iya ngayau nya di gerempung iya ari darat nyentukka Batang Layar/Saribas, nya menua ke deka dikembuan iya. Pemulai nya, Pengarah Ringkai sangkai ba menua asal di Entanak lalu bedarat ke ulu Sg Engkabang niki Bukit Gerasi lalu datai di rumah sida ke di Munggu Sabut. Ari nya menya, Raja ngaku menua ke ari baruh nya nyentukka ngagai Kubu Betong, nya menua pegai Pengarah Ringkai.

Kelimpah ari kayau Trusan menya, Pengarah Ringkai mega kala enggau Kayau Sadok ti ketiga. Iya ke tu laban nganti petunggal iya Panlima Bakir. Maya kayau tu menya iya nadai bulih dengah tang Raja maya nya arap bendar iya ke mai tubuh mayuh ari menua Betong. Pia mega iya bisi bulih siku anak munsuh ke diaku/diambu iya nyadi menyadi iya. Sepemulai kayau Sadok tu menya dia Raja madah ngagai Pengarah Ringkai nya menua di Betong ke pulai iya ngayau nya di gerempung iya ari darat nyentukka Batang Layar/Saribas, nya menua ke deka dikembuan iya. Pemulai nya, Pengarah Ringkai sangkai ba menua asal di Entanak lalu bedarat ke ulu Sg Engkabang niki Bukit Gerasi lalu datai di rumah sida ke di Munggu Sabut. Ari nya menya, Raja ngaku menua ke ari baruh nya nyentukka ngagai Kubu Betong, nya menua pegai Pengarah Ringkai.

Bisi sekali lebuh Ringkai bedau dipaduka nyadi Pengarah, dia Rajah ngasuh Penghulu Bunyau enggau anak iya Panglima Bakir nyaga kubu di Betong. Bisi sekali Aji apai Limpa mai bala ari Ulu Layar datai nyerang Kubu Betong. Kebuah pia laban Aji tu ringat ke rajah ngaga kubu dia dikena nyekat bala ari ulu nurun ngayau. Sida Aji tu betatam ba Nanga Sungai Entanak enda tentu jauh ari kubu Betong. Sida nimbak kubu nya ngena meriam lalu dinding papan kubu nya rusak bendar nyau abis tebabak. Sida lalu nguji nyerang kubu nya tang enda ulih. Penghulu Bunyau enggau Panglima Bakir sereta bala seduai iya bendar amat ngetanka kubu nya. Mupuk Aji tu pulai, dia Bunyau ngangau: “Oh enda enggau kami nuan tu Aji” ko iya. Ke bendar iya sida Bunyau udah ngemai Aji enggau menyadi iya ke bukai nya talukka Rajah tang sida nyin enggai. Tambah mega Aji enggau Bunyau endang diri petunggal.

Maya laya nya suba, Linggir ke beensumbar Mali Lebu enda masuk champur ketegal iya nemu ari sepiak-sepiak endang kaban belayan iya magang. Taja pia Linggir mengkang deka ngelaban perintah Raja tang enggai ngelaban kaban diri ke tanah Rajah.

Lebuh ke diau ba Tembawai Gudang dia tadi Pengarah Ringkai nirika gudang sebuah. Kebuah pia laban endur iya ngengkah sereta nyimpan tajau pemulih iya ari ke bedagang enggau ke ngayau. Gudang nya kenu ko orang penuh dedat laban tajau pemulih iya. Diatu tajau pemulih Pengarah Ringkai tu udah dibagi ngagai bala peturun ke ngembuan bilik asal iya sereta enggau anak sereta kaban belayan ke bukai. Bisi nya mega dikena iya bebelika rengka bukai.

Nyadi lebu maya kachau Bantin ke beensumbar Ijau Lelayang suba dia suah bendar Raja nirika kayau ngelaban iya. Sepengudah Ngumbang “Berauh Langit” ngalih baru nanahka Bantin, dia Raja deka nirika kayau siti baru dikena iya ngukum seduai nya. Raja lalu ngangauka Penghulu Dalam Munan nguluka kayau ke sekali tu. Lebuh kayau tu suba mayuh bendar Iban ke nitihka Penghulu Dalam Munan nyengkaum Pengarah Ringkai nya empu.
Lebuh ke begempuru di Simanggang, dia bisi rita penyakit muang ai nya udah nuntung di menua ulu Batang Ai. Anak Raja (Vyner Brooke) udah nanyaka penemu Raja Charles empu. Iya dianu Raja laban irau agi ke penyakit nya kelimpah ari bala ke betubuh lebi 10 ribu iku nya.
Raban nya pan mudik lalu ngetu di Nanga Delok. Malam nya sida iya kena rampit sakit muang ai lalu mayuh bendar Iban ke bebadi maya nya. Sekeda iya lari mulaika diri ke Simanggang. Semina perau ke diuluka Penghulu Dalam Munan enggau Pengarah Ringkai aja ke datai di menua munsuh ke betubuh lebih 100 iku. Sida iya mujur nunu rumah munsuh taja munsuh udah ngelarika diri.
Sepemulai kayau nya, dia Pengarah Ringkai kena rampit penyakit muang ai tu mega. Datai iya di Betong ba Kubu menya dia iya diambat bala. Maya nya iya lalu merap siku apai tuai ari rumah panjai Lempaung ngujungka apai tuai nya mega kena sakit muang ai. Pengarah Ringkai ke sakit tu tadi endang diibun anak iya iya nya niang ini ichit kami. Iya ngapuska sepu iya di menua ke dikumbai Munggu Sabut.

Udah mati Pengarah Ringkai tu tadi dia tuai ke nganti iya tu Penghulu Biju, ke endang menyadi iya empu. Nyadi nitihka jerita, Penghulu Biju tu mih ke mungkal rumah panjai Pok ke enda jauh ari menua Betong ke diatu. Maya iya ke deka mungkl menua nya menya, iya endang minta ari Pengarah Ringkai empu. Pengarah Ringkai keterubah iya enda ngasuh laban enggaika tubuh sida bepechah lalu pengukuh sida iya mega pechah. Ninga Penghulu Biju keran dia Pengarah Ringkai meri iya tanah ke endur sida iya berumah. Lebuh ke baru berimba menua nya ke benung beigigaka paung burung, dia bala tuai bilik tedingaka burung puk. Ari nya menua nya dikumbai orang rumah panjai Pok.
Penghulu Biju tu mega siku tuai kitai Iban ke beberita megai menua adap BEtong. Iya benasib laban dibai Raja Vyner suba ngarika Iban eggau sama muka Tugu Charles Brooke ke ba Pengkalan Batu di Kuching ke diatu ke ngebuan gambar niang Balang “Balai Nyabung”.

UNGGANG “LEBUR MENUA”

Unggang tu tuai Iban Layar Ili ke idup serambau enggau Orang Kaya Beti “Tajai Ngindang” seduai Orang Kaya Akun “Bedindang” di Padeh. Sida tu nguan menua kira-kira enam puluh taun sebedau penatai James Brooke ke Sarawak. Iya dipelabaka mati dalam kandang pun taun 1780an kelia. Maya nya menya, menua endang siga laban bala Iban udu amat belaban enggau perintah (Merum) Brunei, Seru, Illanun enggau bansa Suluk.

Unggang tu tuai Iban ke pemadu kering sereta berani ngetanka menua ari serang munsuh. Sida iya ngansakka bala perintah Brunei nyerang Sarawak, Sadong Oya, Mukah lalu terus ke Bintulu. Laban empa pemalat serang Unggang tu kelia dia iya diberi ensumbar “Lebur Menua” Nama enggai ensumbar iya tu endang semampai dikeingatka datai ke sehari tu.

Lebuh Unggang baru ngangkatka diri bujang, dia iya bisi mimpi. Iya bemimpi asai ke merau ari Nanga Layar/Saribas lalu sangkai ba tengan bukit Santubung. Iya ke baka nya laban ke dipuput ribut. Ari tengan bukit Unggang majakka pejalai diri niki ke tuchung. Bedau lama udah ngejangka endur perau iya nya tadi Unggang betemu enggau indu dua iku. Indu dua iku nya bajik bendar gamal dipeda iya. Meda Unggang dia, indu nya lalu bejaku. “Ngena nuan datai ditu Unggang. Kami duai tu baru udah badu mandi.” pia ko siku. Iya madahka Unggang enda ulih lama berandau lama lalu nyurungka Unggang batu perunsut. “Tu ambi nuan ke pengaruh tu Unggang. Iya tau dikena nuan matak serang. Semua menua ari Luba Santubung nebing kanan teruska Nanga Layar(Saribas) alah magang laban serang nuan ila. Tang enti nyema nuan nyerang ngelui luba tu nungga ke Tanjung Datu, kami duai sulu nuan tu enda agi ngemataka nuan” pia ko seduai. Seduai nya tadi lalu madahka diri Kumang seduai Lulung ari Gelung Batu Nakung.

Udah ke bemimpi tu, Unggang lalu beban perau pengayau sebuah ke besai bendar. Ruang perau nya kenu ku sida ke tuai, tau alai nganchauka tikas idas siti. Ngena perau nya iya nyaga Nanga Sungai Saribas nyentukka ulu Layar. Iya nachahka semua orang ke enda dikelala enti sida namaka diri ngagai Nanga Saribas. Laban perau pengayau Unggang tu besai, nya alai enti iya ngayau, iya enda mai perau mayuh, semina dua tiga buah aja. Nya alai iya enda kala alah laban munsuh lebuh belanggar di sungai tauka nebing tasik. Laban pengering Unggang, enti nyema orang ninga rita iya bisi beripa di tasik ari Nanga Saribas terus ke Luba Santubung, nadai siku orang berani belanggar enggau bala iya.

Udah lama Unggang udah main beripa ba tasik baka nya, nya baru bisi bansa Cina datai bedagang di menua Sarawak. Lebuh bala Cina dagang betemu enggau Unggang di Nanga Sarawak, sida iya madahka diri deka bedagang ke Saribas. Unggang madahka tau enti sida iya deka nerebaika menira burak ba bandung sida. Bala Cina pan madahka diri besetuju nerebaika menira burak. Nya alai sida iya pan diasuh Unggang bedagang ke Batang Saribas.

Nyadi barang keterubah iya dibai bala Cina bedagang ke menua Saribas nya periuk temaga, periuk petani, pinggai mangkuk, besi gerunung, geri, pelaga, marik lama, marik engkabang, rangki enggau tanchut birang. Nyadi utai ke dikena bala Iban meli tu iya nya padi. Nyadi maya tu, rutan, damar enggau utai bukai ke diulihka ari kampung enda dibeli Cina. Maya tu menya rega sigi pelaga nya sepasu padi.

Nyadi Cina dagang maya rambau tu kelia semina bedagang aja lalu sida nadai mendam berumah dalam Saribas. Enti barang sida udah abis laku, sida mulaika diri ke Sarawak (kuching). Sambil nya sida nerebaika menira burak ba tiang layar sida awakka bala Unggang ari Saribas ke beripa ba tasik ngelala sida.
Nyadi semua bansa bukai ke enda nerebaika menira burak enti bisi ayan endang diserang bala Unggang magang. Tu nyengkaum bansa Illanun enggau Bajau ke endang munsuh lama sida sama beripa di tasik nunga ke utara Nanga Saribas. Nyadi bansa Laut Saribas ke tau nusut diri empu ari peturun Temenggong Kadir seduai Abang Gudam enda dibunuh laban sida nya endang gulai bansa Iban.

Siti ari serang Unggang ke beberita amat ke meruan dikeingatka orang dataika seharitu nya nyerang Nanga Sungai Sarawak. Lebuh serang tu suba sida ke dia endang alah amat-amat ngenjing baka ke ditebas menua nya digasakka bala Unggang. Ari nya Nanga Sungai Sarawak digela orang Muara Tebas dataika seharitu.

Nyadi anak Unggang tiga iku lelaki nya Luta, Muluk enggau Ketit. Sida tiga tu baka apai sida iya kering sereta liat ati. Sida tiga tu belayar ke Pulau Belitung semak Pulau JAwa laban deka ngiga tuchung ke besai bendar tau dipasukka ngagai pala. Sida iya bendar amat deka meli tuchung nya ngambika bisi ke pesaka besai sida sebilik. Taja pia enda mukai-mukai, sida tiga tu enda pulai ke Saribas agi. Bisi orang nya nyebut, bisi nemu rampang perau sida ba pasir semak Nanga Ubah kilah Tanjung Datu kin ke agi. Ketegal pemarai bala anak lelaki Unggang tu, kuasa serang menua Batang Layar / Saribas lalu tampak agi dipegai Linggir “Mali Lebu” ari Paku enggau anak OKP Dana “Bayang” di Padeh.

Nyadi uchu Unggang ke benama Bunyau seduai Mauh nya tuai Iban ili Layar ti keterubah iya nundukka Rajah lalu nulung sida ngaga kubu Lili di Betong dalam taun 1858. Kubu tu dikena perintah ngelaban Aji apai Limpa anak orang Kaya Pemancha Dana di PAdeh enggau Ulu Layar. Terubah iya kubu tu didirika di Munggu Senggang ari ili Kampung Melayu Betong ke diatu. Udah nya iya dipindahka ngagai Munggu Betong ke diatu. Munggu nya diatu uda rata lalu digagaka sekula SK Abang Abd KAdir. Kubu Lili tu agi meruan ari mua sekula nya sereta berimbai enggau masjid. Bala Laut/Melayu netap diau ari ili kubu tu laban irau ke serang Aji ari Ulu Layar / Padeh.
Ichit Unggang ke benama Bakir anak Bunyau enggau Melina “Bujang Berani” pan sama bela bujang berani. Bakir diberi gelar PAnglima ketegal nulung perintah ngelaban Aji ari Padeh, Rentap di Bukit Saduk enggau Bantin seduai Ngumbang di Ulu Batang Ai.

Ngelansa kenang ngagai ichit Unggang ke benama Melina “Bujang Berani”, iya tu endang suah nitihka kayau Panglima Bakir ke endang petunggal iya empu. Nyadi sekali maya iya udah tuai bendar, iya bemimpi madahka ngagai iya enti nyema iya nitihka kayau Trusan nepan perau Pengarah Ringkai, dia iya deka bulih dengah. Hari orang nurun ngayau Trusan kelia iya napatka perau Pengarah Ringkai. Pengarah Ringkai maya nya enda nemu chara deka ngemai iya laban Melina udah tuai. Melina madahka enti Ringkai enggai mai iya nepan perau, iya sanggup engkandur ba kemudi amat mih perau nya enggi Pengarah Ringkai. Datai di Trusan endang amat baka ke dipadah mimpi. Melina bulih dengah siku ke ditimbak iya lebuh tuai orang nya benung ngirup ai enda jauh ari wong. Dengah iya diberi iya ngagai Pengarah Ringkai nitihka adat lalu ensumbar iya ditukar iya ngagai Melina “Balai Nyabung Nanga Trusan”.
Nyadi Panglima Bakir mati dalam taun 1874 udah nya siku agi ichit Unggang “Lebur Menua” ke benama Pengarah Ringkai ke beensumbar “Bedilang Besi” nyadi keterubah iya Iban dichiri perintah maya nya megai pangkat ‘Pengarah’. Iya dichirika perintah Brooke menya nyadi Pengarah di Kubu Alice di Simanggang dalam taun 1886. Kelimpah ari nya, Pengarah Ringkai mega dipilih perintah begulai enggau Orang Kaya Pemancha Nanang nyadi kaban Kunsil Nengeri dataika iya mati dalam taun 1902. Udah nya tuai Layar lalu diganti Penghulu Biju, menyadi Pengarah Ringkai. Penghulu Biju tu mih dipaduka perintah Raja Charles Brooke suba bejadika Brooke Memorial di Kuching menya(ke bisi gambar Balang “Balai Nyabung”) Penghulu Biju badu nyadi penghulu dalam taun 1922 lalu mati tuai dalam taun 1927.

http://forum.engkabang.net/index.php/topic,21391.80.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s