Sampi gawai

“Oh ha ! Oh ha ! Oh ha !,
Sa, dua, tiga, empat, lima, enam, tuuuuuujuh!

Ni kita petara aki petara ini,
Kita petara apai petara indai,
Kita Keling Bunga Nuing,
Kita Laja Bunga Jawa,
Kita Gerasi Tuok-tuie,

Kami tu ukai ngangau ngapa, ukai nesau pia aja,
Kami sedia enggau piring enggau ading,
Enggau tengkira enggau reta,
Enggau penganan enggau santan,
Enggau rendai enggau penyarai,
Enggau letup enggau pulut,

Kami ngangau, kami nesau,
Kami mai kita ngabang, mai kita mansang,
Mai kita makai, mai kita nandai.

(Kami mantaika piring, ngenahka ading,
Piring penganan, piring penyaran,
Piring Arak, Piring Tuak,
Udah sedia, udah nyengenda,
Ditikai wi, tikai peradani,
Ditikai rutan, tikai bemban.)

Kita ke ngabang bakanya mega,
Anang datai tuboh puang, tuboh sabatang,
Anang mai tuboh murus, tuboh untus,
Tang mai ubat serangkap genap,
Mai batu teruba nemu,
Mai pengaroh gembar tuboh.

Anang engkah ngapa, engkah pia,
Engkah ba piring, engkah ba ading.
Ayan ka ba tegalan,
Lengka ka ba pedara,
Sikap ka di ketupat.
Ngambi ka kena peda, kena tela,
Kena iching, kena perening.
Awak ka kena genggam, kena simpan,
Kena sandoh, kena taroh,
Kena japai kena pegai.

Enggau sampi tu,
Aku Minta kami chelap-embab,
Minta gayu-guru,
Gerai-nyamai,
Senang-lantang,
Bidik-lansik,
Betuah-belimpah,
Kaya-raja nguan menoa,

Kami minta tulong, minta sukong
Minta peda, minta tela
Minta tulang, minta pandang,
Minta iching, Minta perening,
Minta iring, minta bantu bala kitak

Awak ka kami mudah bulih duit, bulih ringgit,
Bulih padi, bulih puli,
Bulih reta, bulih tengkira,
Bulih setawak, bulih menganak.
Ngambi ka kami jelai rita, manah nama,
Nuchong baka bukit Rabong menoa,
Tinggi baka langit nungkat neraja,
Terang baka pandang bulan purnama.

Nya alai dinga ka kangau anak mensia, kangau anak uda,
Minta tulong, minta sukong kita.

Oooooohoi !!!

Diubah mimit ari:
http://gnmawar.wordpress.com/leka-main-iban/nyampi-maia-gawai-dayak-1hb-june/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s