RUKUN SABONG NGAU NGELALA BULU MANOK

RUKUN SABONG

1. Mimpi rurus – Manah

2. Burong rurus – Manah

3. Bulu manok maioh bunoh – Ngeraup – Siti Bulu

4. Manok manah bintih – Kering sereta Silat

5. Tisik ngemudi ka bulu manok ti manah – Tuah

6. Ngangkat ka manok ngena hari – enggau atur

7. Saa manok enggau chukup – manah intu

8. Taji ka bulih – tajam

Lapan iti Rukun Sabong ti diterang ka datas nya, rukun sabong menang, enda bertuakal agi, tentu menang. Nya baru tau berani masang manok naka pemisi, tau dipasang nerima pasang besai.

Enti kita nyabong enda ngena rukun sabong datas nya, kita semina nyabong enggau buta-tuli, sapeneka ati aja, nyabong betuakal, nyabong nasit, nyabong ngapa, nyabong nadai penemu, nyabong nadai pelajar. Tampak bendar kitai enda nemu nyabong dipeda orang ti bisi ngembuan pelajar nyabong.

Enti udah belajar sereta nemu rukun sabong, nya baru tau nyatup orang nyabong sabarang maia lalu manok ke dibai kita ka gelanggang endang disadang menang. Baka kitai ka ngerja pengawa bukai, kitai mesti bisi petua, isharat enggau rukun awak ka pengawa kitai lurus pejalai. Nadai semua utai nyamai sereta mudah diulih kitai enti enda enggau petua, isharat enggau rukun. Kitai enda tau ngutuk diri empu enti alah kategal salah petua, isharat tauka rukun, laban penyalah nya endang penyalah kitai empu ti enda chukup pelajar tauka penyabar dalam pengawa nyabong.

Besabong ka manok tu baka pengawa kitai mensia ka bentaruh ka nyawa bebuti enggau pangan diri. Sapa alah, nya mati. Nya kabuah kitai enda tau enda betati ka tiap-tiap rukun sabong, enggai ka alah uti enggau pangan diri. Kelia, enti alah uti enggau pangan diri, ngagai ringka ga pemulai sida. Nya alai rukun sabong enda tau enda dipelajar awak ka enda lebu bebuti enggau pangan diri.

NGELALA BULU MANOK

Bansa kitai iban endang udah lama bisi panemu ngelala bulu manok. Ngelala bulu manok tu siti panemu sabong ti nyelai bendar enti dibanding enggau panemu bansa bukai ke sama bekunsi ka uti sabong bakatu. Bulu manok endang dikelala bansa iban nyemaka semua bansa utai ti idup (jelu, burong, ikan, indu utai enggau bansa utai tumboh) baik ka di dalam ai tauka di darat. Lalu pengangkat bulu manok mega ditemu kitai bansa nitih ka ulah, bunyi, gaya, pendiau enggau pemakai utai idup ti sabaka bulu enggau manok nya. Bakanya mega tuah manok ti dipeda kitai ba tuboh enggau ba tisik kaki manok sabong kitai. Tisik enggau tuah manok endang nitih ka pemai enggau gamal utai idup ti sabaka nama enggau bulu sida. Semua ulah enggau pendiau utai idup ti nyemaka enggau bulu manok endang dipelajar ka kitai Iban ngambi ka nemu maia hari sida kering, maia sida makai, maia sida diau, bansa utai di empa sida enggau maia ulah bukai. Semua utai tu endang bisi sangkut-paut enggau maia kitai nyabong manok sereta enggau sapa bulu manok ti disabong kitai nya ninggang pangan diri. Ari tuah enggau bulu manok, orang ke nemu nyabong endang nemu ni bagi manok ke bebintih nya tau dulu datai kaki ba lawan diri.

Bedudok ari pelajar sabong tu anak pungka lelaki Iban kelia endang udah diajar ngelala bulu manok kenyau ari sida iya agi biak. Sida mega diajar ngintu manok sabong ti aroh ati diri empu. Enti sida nyau udah nyadi ka manok sabong orang, sida nemu ngambu bulu manok sabong nyadi ka tanda pemerani sida tauka pengering bulu diri. Pengawa ngambu bulu manok sabong tu dikerja chara besumpah ngena darah munsoh ka udah didengah sida. Bulu manok sabong tu beguna bendar dikena miau enggau niki ka bala Raja Berani enggau Bujang Berani enti sida diambi ngerja pengawa gawai besai kitai bansa. Enti salah bulu manok dikena, pengawa sida tau sabau ngapa laban salah ripih pengawa lalu enda chukup intu. Utai baka tu tau ngemedis ka orang ka bempu pengawa. Nya kabuah ngadu enggau ngintu pengawa ba pengarap bansa kitai Iban pedis bendar enti nadai penemu ti chukup kena ngerja pengawa. Nya alai anak Iban enda tau enda nemu ngelala bulu manok, ukai semina dikena bebuti nyabong aja, tang mega ka penemu kena ngerja pengawa pengarap kitai bansa.

1. ADONG (Hampala macrolepitoda): Adong tu sabengkah ari bansa ikan ke diau dalam ai di menoa ulu. Ikan tu manah raras tuboh, tisik iya burak, lalu bisi bakengkang mirah redam ba tengah tuboh. Kepai ba iko, tisi tubuh enggau baruh tubuh iya mega bisi mirah. Bisi mega ikan adong bakengkang tiga betangkan ba belakang. Iya ti bansa tu nya disebut ADONG RUNGGU. Bisi mega orang ngumbai ikan Adong tu JUAK. Enti orang enda betati ka gaya Adong enggau Juak, orang enda nemu penyelai iya ari pangan diri laban tisik enggau kengkang seduai iya sama redam mirah. Jalai kitai tau ngelala ikan dua bansa tu iya nya, ikan Adong nya kuchup mimit mulut iya lalu ikan Juak nya nyelenga agi mulut iya laban tukang mulut iya besai agi. Baka jalai kitai ti ngelala mulut ikan terubok enggau ikan bekawal.
Ikan Adong

Ikan Adong

Nyadi ikan Adong enggau ikan Juak enda makai lumut tauka lukut kayu, lukut batu, buah enggau indu utai. Ikan dua bengkah tu makai ikan, undang, raban bansa engkatak baka sida pama, reriga enggau arok bulan. Ikan Adong ennggai makai ginti ti beumpan ka umpan dikena nganti ikan bukai. Iya semina makai ginti ke beumpan ka undang mesai tunjuk jari. Endor nuan nganti ikan tu di kaki rantau tauka dipala lubok. Ikan dua bansa tu mangah lalu enda tau enda makai.

Ikan dua bansa tu mega ikan pintar. Enti leboh iya agi kenyang, raban ikan dua bengkah tu nemu ngaga diri nelap bendar lalu besulu enggau ikan ti ukai bansa iya empu tang enggau ikan bansa bukai ti mit baka ikan enseluai, lansi enggau kepiat. Enti leboh iya berasai lapar, iya lalu nyambar sida nya ka diempa iya.

Ari nya kitai iban buIih sempama jako “Baka Aum Juak” – udah manah begulai enggau pangan diri, enti lapar sida lalu makai orang nya. Ikan Adong tauka Juak tu rangka. Iya deka bendar makai bansa engkatak ke terjun ka dalam Sungai. Kategal rangka sereta mangah, ikan dua bengkah tu suah parai beli. Ikan dua bengkah tu deka bendar nangkap mata ginti ti nadai umpan baka ginti mata achar.

Dia tadi aku nerang ka mimit pasal ulah enggau pendiau ikan Adong. Diatu aku deka ngenang ikan Adong diambi ka bulu manok.

Source materials on Bulu Manok Iban: Bujang Sugi and Rukun Sabong by late Mr. William Duncan.

http://gnmawar.wordpress.com/main-asal-iban/nyabong/#comment-41663

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s