GAWAI BEBANGUN MANANG

RIPIH PENGAWA BEBANGUN

November 6, 2011

Edm.Rintai Uncategorized 1 Comment

Nyadi tuju gawai bebangun tu iya nya dikena bansa Iban nyirika orang nyadi manang. Pengudah orang nya dibangun, iya lalu tau bejalaika pengawa belian ngubat orang ke sakit. Pengawa bemanang kelia berengkah bepun ari Raja Menjaya ke diasuh menyadi iya Ini Inda nyadi manang laban ketegal ipar iya bini Sengalang Burung ke seruran meayu ayu tabin enda nyamai. Kebuah bini Sengalang Burung ke sakit meayu ayu nitihka padah Ini Inda iya nya laban enda tan ngena nama iya.
Lebuh maia sida Sengalang Burung bebagi ubat, Raja Menjaya beempu ubat penyanga nyawa ke tau dikena ngubat semua penyakit. Nya kebuah Ini Inda ngasuh Raja Menjaya nyadi manang awakka ulih ngubat ipar iya bini Sengalang Burung.
Pengudah Raja Menjaya dibangun menyadi iya Ini Inda nyadi manang ba Tuchung Bukit Rabung ba menua Ketungau, Kepuas Tengah di Kalimantan Barat, nama iya lalu disebut Raja Menjaya Ke Betelaga Baruh Rang. Udah dibangun nyadi manang iya lalu betawaika bini Sengalang Burung. Nyadi betawai tu iya nya pelian dikena nukar nama orang ke sakit ngagai nama baru.

NYADI TUSUT RAJA MENJAYA BAKATU:
Raja Durung Bejuluk Lumpung Tibang Bebaring, Durung Tuai Berumah Di Tatai Belakang Tinting Ngembuan Ubat Tau Padi, Ngembuan Pengaruh Menang Bebeli.
Raja Durung bebini ngambi Endu Dara Talun Pelaga Ngemata Kuta Dinding Hari, Endu Cherembang Chermin Bintang Tukuk Lawang Pinggai Bekaki. Beranakka Raja Jembu Duduk Di Batu Tinggi Dedinggai, Meta Raja Pengibai . Raja Jembu bebini ngambi Endu Endat Baku Kansat Ngembuan Ubat Sempulai Umai, Endu Kumang Baku Pelimbang Ngembuan Lemambang Ubat Pengerai Ke beranakka sida Raja Menjaya tujuh iku diri menyadi:

1.Aki Lang Sengalang Burung
2.Matai Tuai Raja Menjaya
3.Raja Biku Bunsu Petara
4.Raja Selempetuh
5.Gangga Ganggai
6.Ini Inda
7.Raja Sempulang Gana

Nyadi nama bini Sengalang Burung sebedau ditukar ngena chara pelian betawai iya nya Indai Kechendai Bepantak Jirak, Dara Sentaba Balun Kupak . Udah betawai nama iya nyadi Endu Sudan Berinjan Bungkung , Endu Diu Tiung Menyelung.

Nadai nyemetak cherita ke nusoi bakani ko pemun orang kelia ke nyadi manang nampung Raja Menjaya , sekalika nya ari mimpi, betemu nyengala nyengenda enggau antu tauka Raja Menjaya tu segenda tubuh mangun orang nyadi manang nampung pengawa iya. Iya ke ditampung ari pengingat tuai Raja Menjaya tu Petara Manang.
Tebal agi Iban ke nyadi manang bepun ari mimpi diasuh antu enggau bunsu jelu. Kala mega antu enggau bunsu jelu nya ayan nyengala nyengenda ukai dalam mimpi. Kelimpah ari asuh antu enggau bunsu jelu bisi mega orang nyadi manang nampung aris apai indai tauka aki ini ke endang nyadi manang lalu udah bisi ngembuan engkerabun , batu karas, sakang enggau kereban bukai dikena belian.
Pengudah orang nya mutus ati deka nyadi manang iya lalu madah ngagai sida sebilik niat ati iya lalu minta sida sebilik bekira ngatur pengawa ngasuh manang mangun iya. Pengawa bebangun nyadi manang bisi tujuh iti peringkat. Siku orang tau bebangun lebih ari sekali. Enti orang nya udah dibangun, iya lalu tau bejalaika pengawa bemanang enggau belian. Enti iya ngasaika diri enda tentu pengerai udah bekau ke belian iya lalu ngasuh manang bukai mangun iya baru ngagai peringkat kedua awakka iya enda alah ayu tauka sarat menawa. Ba tiap iti peringkat mangun manang pejalai enggau leka pelian bebangun enda sama. Endur bebangun manang ba peringkat ke pengabis tinggi tauka peringkat ke tujuh iya nya ba tuchung bukit.
Enti orang ke deka dibangun nya segulai sejalai betampung pendiau dalam rumah panjai, iya dulu ngempuruka sida serumah ba ruai iya empu lalu nusui pengawa diri ke ka minta bangun. Udah sida serumah betanya saut lalu betimbalka penemu, nya baru sida bekira ka chara ngatur pengawa . Udah maia hari bebangun nya ditimpuh sida lalu bepadah ngagai rumah bukai ke sepemakai segulai pendiau.
Pengudah tuai rumah orang ba rumah ke sepemakai nemu berita nya iya lalu ngempuruka sida serumah ba ruai lalu nusui berita pasal pengawa bangun lalu minta sandar penemu ari sida serumah . Utai ke selalu diadu maia begempuru iya nya ngumpul pupu dikena nulung rumah ke endur pengawa bebangun nya diintu. Utai ke selalu dipupu iya nya beras, padi, babi, manuk enggau utai bukai. Utai ke dipupu tu dikumbai *pupu rumah* lalu diberi ngagai rumah endur ngintu pengawa bebangun.
Udah orang ke sepemakai gawai enggau ke empu pengawa bebangun nya setuju ka maia hari bebangun nya baru sida bepadah ngagai manang ke diasuh mangun orang nya. Lebuh maia ke datai betemu enggau manang sida lalu madahka pejalai diri lalu enti manang nya setuju mangku pangawa mangun, sida ke bepadah lalu nimpuh, ninggalka buah jari dikena sida nanchang semaia enggau manang. Ba maia tu mega sida lalu nentuka sabang, upah enggau kereban piring dikena maia bebangun. Manang ke dipadah nya lalu ngiga siku agi manang ke nyadika sapit tauka penulung iya ngereja pengawa bebangun nya.
Nyau datai ba maia hari bebangun, pagi nya tiap pintu bilik serumah panjai lalu nirika pandung ba ruai diri empu. Sebatang buluh didiri ba ruai lalu ujung atas ditanchang ba gelegar sadau awakka enda rebah. Buluh nya ke sengkayau endur nyerayungka pua kumbu dikena ngaga pandung. Piring diengkah dalam pandung . Tuai rumah ngaduka piring sukul diengkah ba tempuyung lalu digantung ba atas pala tangga puting setak setak rumah panjai. Tampun antu pala mega diberi piring. Tampun ke bisi pala raja berani munsuh lalu diserayung ngena pua kumbu Nyemalau Labang. Ba pelilih menoa Ulu Padeh, Betong, pua Nyemalau Labang tu meh buah pua ke pemadu tinggi. Lilit tisi pua Nyemalau Labang bechura burak ke lalu diselat chura ke bukai. Lalu lilit ke semak buah pua nya belilit nyemaka kulit tisik ular kendawang.
Ba pengarap lama Iban, ular kendawang tu dikumbai Laja ari Panggau Libau lalu ular kendawang tu mega dikumbai ular sinu ngenang. Kebuah iya dikumbai ular sinu ngenang laban enti orang ke kala dipantuk ular nya ngenang diri ke udah dipantuk ular nya taja pan abi nya udah gerai nadai agi pedis tang tau tepulai pedis baru enti dikenang . Nambahka nya baya labang mega nyadika lilit tauka anak buah pua ke ngimbai nya. Pua Nyemalau Labang bebuah ka antu gerasi ke bediri bechekak pinggang enggau baya ke merangapka nyawa nukangka rang. Reti jaku nyemalau tu iya nya dikena nyebut antu tauka jelu ke datai beraban.
Tembu pengawa miring enggau nirika pandung ba ruai diri, iya ke dibangun nya enggau sekeda orang serumah lalu begempuru nganti penatai manang ba tengah laman tungga penatai ari pun ramu rumah. Tikai bemban anyam dua , kereban dikena miring semua disedia dia magang. Iya ke dibangun nya bengepan ngena baju burung, nangkin duku malat, ngema lupung, betangui serawong lalu betungkat bejabung langgai manuk . Ba pun gerempung jabung nya disangkingka gerunung awakka bemunyi engkeranding lebuh dientak. Bunyi entak tungkat enggau keranding gerunung didinga Petara ke diambi ngabang. Tungkat nya mega dikena lemambang tauka manang nyeliahka utai ke jai lebuh semengat sida neresa mansa menoa antu enggau sebayan . Bunyi gerunung mega dikena manang ngeripangka jalai semengat iya awakka enda tesat ba menoa ke dipansa dalam leka main.
Manang datai pengawa miring lalu berengkah. Selambar tikai bemban anyam dua dianchau ditengah laman. Letup lalu ditabur atas tikai endur ke miring. Tuai manang enggau sapit iya lalu berengkah miring. Kereban piring dikena ditu iya nya: Daun sirih, buah pinang puda, kapu, daun ruku, semakau, Letup, sagun, penganan tempa, telu manuk enggau asi pulut ke dilulun dalam ruas. Udah nya piring lalu dibiau ngena manuk. Tembu miau piring dunggul manuk lalu ditisil, darah lalu dikendas ba piring. Piring ditu turun tiga. Siti piring ke diungkupka Sempulang Gana ditumbak ba tanah baruh endur miring. Piring ke diungkupka antu rua diengkah ba seregan lalu dianjung ke babas. Piring ke diungkupka Petara langit diengkah ba kelingkang lalu digitang atas endur miring.
Udah tembu ngatur piring tuai manang ke lengkap ngena ngepan, bebaju burung, betungkat bejabung, ngema lupung lalu berengkah matak jalai nyebut leka pelian bangun bejalai niki rumah panjai ari tangga pun ramu. Iya ke dibangun nya bejalai entudi tuai manang lalu ditangkanka sapit manang enggau siku orang ke mai setungkul pua kumbu bali belulai ke dilekat ba ujung kayu lalu disan. Ba dalam leka pelian mangun orang nyadi manang, pua kumbu bali belulai dikenaka setungkul, tajuk dikena manang lebuh maia iya luput enggau dikena ke tajuk babi ditanju. Orang serumah ke enggau ngelalu manang bejalai betangkan betunda udi.
Lebuh manang niki tangga rumah, gendang dikena ngelaluka penatai manang lalu ditaboh. Tuai manang ke bejalai niti ruai nuju ruai iya ke dibangun lalu nyebut leka pelian bangun madahka penatai diri. Sapit manang enggau iya ke dibangun nya lalu ngelembung ka leka main ke disebut tuai manang. Manang enggau orang ke bejalai ngelalu penatai manang dilanggar ngena ai tuak lebuh ke mansa pandung ba ruai sepintu sepintu.
Datai ba ruai iya ke dibangun sida lalu nudukka diri ba ruai nunga pandung. Manang enggau iya ke dibangun lalu nyerungkai lupung diri empu. Semua kereban dalam lupung diambi keluar, diengkah ba atas pua kumbu. Udah nya baru sida nusun lalu nyimpan kereban nya dalam lupung baru. Lupung nya lalu diengkah ba tisi pandung. Ba pandung dia bisi sigi kebuk enggau sepun sabang api. Pengawa manang ke beserungkai , betusun, besereningka batu karas dalam lupung dikumbai *nirika pandung manang*.Udah tembu nirika pandung manang, iya ke dibangun nya lalu bejaku nusui cherita kebuah iya ke minta bangun. Orang ke bisi betungga dia lalu sama sama betanya besaut betimbalka penemu.
Udah badu merarau gendang rayah tiga renggat lalu ditaboh. Letup ditabur ba dalam bilik iya ke dibangun. Semua kereban piring dibantaika magang. Pengawa miring lalu berengkah. Ditu piring turun Sembilan. Semina manang aja megai piring, iya ke dibangun enggau orang bukai ngemata aja.

KEREBAN PIRING DIKENA BEBANGUN
1.Tilan siku – ditunu dulu awakka mansau
2.Gerama siku – ditunu dulu awakka mansau
3.Ikan belau – ditunu dulu awakka mansau
4.Kusing siku – ditunu dulu awakka mansau
5.Daun lalang – selambar lalu dikerat ke piring, selambar ke buah tengak babi
6.Upa banjang
7.Buah banjang setangkai
8.Upa tepus
9.Upa senggang
10.Buah senggang setangkai
11.Bungai telasih
12.Daun sirih
13.Buah pinang puda
14.Kapu
15.Semakau
16.Daun ruku
17.Telu manuk
18.Letup (kelimpah ke dikena ka piring, letup tu endang semampai dibai lalu ditabur dulu lebuh maia miring, ngelalu petara, ngelalu pengabang enggau ngelalu manang
19.Sagun
20.Penganan tempa
21.Asi kuning – asi dichampur ngena kunyit awakka chura iya kuning
22.Asi burak
23.Asi chelum
24.Asi pulut – dilulun ngena ruas
25.Ai tuak
26.Minyak nyiur
27.Sugu – dikena nyugu babi
28.Buluh temiang – seluntang ruas
29.Bulu landak tiga iti
30.Ubung mirah – setengah depa, ke tengak babi
31.Daun enggau pun Sabang api
32.Benda irun sigi
33.Tajau menaga sigi
34.Pua kumbu Lebur Api – ke tajuk perau
35.Pua kumbu Bali Belulai tiga lambar. Selambar tajuk babi di tanju, selambar ke serayung pandung lalu selambar dikena mungkur iya ke dibangun lebuh iya luput
36.Kain kebat selambar
37.Kain belachu sedepa
38.Kebuk lima igi
39.Anak babi dikena bechenaga siku (kurang lebih 7 Kg)
40.Manuk lanjau siku dikena miau piring
41.Gharu ditunu lebuh maia gendang pampat ditanju
42.Dua iti sayuk pinang dikena ngaga perau
43.Setangkai mayang pinang
44.Seleka pelaga ke tating perau
45.Siti tengak pirak – ke tali tating perau
46.16 iti mata ginti
47.Selambar tikai senggang
48.Selambar tikai bemban mit anyam dua – ke lapik endur babi gali ba tanju
49.Siti rangki – ke tumpang perau
50.Panchung buluh 18 iti endur nyimpan ai tuak lalu diengkah ba pandung manang. Utai tu dikumbai Rumbang Menjaya
51.Bebendai , Narai, Tetawak, Gong, Ketebung, Engkerumung enggau dua bilah Beliung Lajung dikena begendang, gendang rayah enggau gendang pampat
52.Sangkoh sebatang
53.Sumpit tapang sebatang
54.Rutan dikena ngaga bengkong endur manggaika tajuk perau
55.Selambar tikai bemban anyam dua kelapik endur miring ditanah
56.Beras tiga genggam dikena ngaga ara lalu siti talam temaga endur engkah beras
57.Kerupak pau (kulit buah langir ke udah dijembui) enggau entemut dikena ngintu babi

Udah tembu ngadu ka piring tuai manang lalu berengkah ngaduka perau ngena sayuk pinang. Limpir tisi ujung sayuk pinang ke digaga nyemaka perau ditabung beukir ngena lungga. Rutan dibengkung ba ruang sayuk pinang endur manggaika pua Lebur Api ke ditikal ke tajuk. Rangki ke tumpang perau di tanchang ngena ubung mirah diengka ba baruh kemudi perau. Pelaga ke tating perau ditali ngena tengak pirak diengkah ba ruang perau. Udah tembu ngaga enggau ngias sayuk pinang nyemaka perau tuai manang lalu ngelinsu sayuk pinang nya ngena minyak nyiur. Maia nya mega iya lalu nyebut pelian bangun dikena muji pemanah perau ke digaga ari sayuk pinang nya. Udah nya tuai manang lalu miau semua kereban nya ngena manuk. Tembu biau dunggul manuk lalu ditisil, darah dunggul dikendas ba semua kereban ke dikena miring enggau perau. Semua piring ditu sembilan iti. Siti piring diberika babi lebuh maia babi udah diberi mandi ditanju lalu siti diberi lebuh maia babi deka digayang. Tujuh iti piring diengkah atas tabak ba pandung manang. Piring tujuh iti tu dibai ngena tabak lebuh ke tanju enggau maia ngelalu Raja Menjaya.
Tembu miring dibilik, tikai senggang selambar dianchau ba tanju. Letup ditabur ba arus ke ditengah manang bejalai pansut ke ruai. Tuai manang bejalai dulu, betungkat, mai tabak ke endur engkah piring. Iya ke dibangun bejalai nadai utai bai , betungkat entudika tuai manang. Sapit manang nangkan dudi, betungkat, mai sayuk pinang ke udah diiyas nyemaka perau. Orang ke bukai mai manuk dikena bebiau, tetawak selebuan enggau rumbang menjaya 18 iti
Lebuh sida bejalai pansut ari bilik, tuai manang lalu nyebut leka pelian bangun ke lalu dikelembungka iya ke dibangun enggau sapit manang. Lebuh sida udah ngelebus pintu tempuan gendang rayah lima renggat lalu ditaboh dikena ngangkatka lupung ba pandung diruai ke tanju. Ditanju lupung, rumbang menjaya enggau piring lalu digempuru berimbai. Ba pugu tanju api lalu dipenyadi atas bedilang. Garu enggau bungai telasih ditunu ba bedilang. Utai ke dikumbai bedilang iya nya batu ke umbas pemesai endur bejadi api baka reti dapur.
Iya ke dibangun nya diasuh duduk unjur enda bebaju atas tetawak nungga piring, rumbang menjaya enggau lupung. Sumpit sebatang didudukka ba kebuk lalu diimbai nyemak iya dia. Puting kain belachu sepiak ditanchang ba batang sumpit. Sigi kebuk diengkah nyemak ujung kaki, sigi diengkah ngimbai belakang lalu dua igi diengkah ngimbai ari kanan enggau kiba iya ke duduk nya. Tuai manang lalu nudung iya ke dibangun ngena pua kumbu bali belulai. Dua piak jari iya ke dibangun nya diasuh megai ujung kain belachu. Pengawa tu dikena betemuka semengat iya ke dibangun nya enggau Yang tuai manang.
Manang lalu nyebut leka pelian bangun, bejalai betungkat ngelinggi tanju tiga kali besundang. Udah nya manang lalu begendang pampat tiga renggat. Badu gendang pampat tuai manang lalu nyebut pelian bangun ngangauka Yang iya datai, letup lalu ditabur ba tanju. Tuai manang lalu maut bau iya ke dibangun nya lalu diasuh gali telentang. Lebuh iya ke dibangun nya gali telentang tuai manang lalu nyipat tubuh iya kedibangun nya ngena mayang pinang. Maia tu mega tuai manang lalu nyebut leka pelian bangun muji pemanah tikai senggang ke antap enggau pemanah pua ke tajuk. Lebuh maia tu, iya ke dibangun nya luput lalu betemu enggau Yang tuai manang. Sapit tuai manang lalu ngurut betis iya ke dibangun lalu nyebut leka pelian bangun ngajihka pejalai pelian iya ke dibangun nya nyidi ngasi jemah ila. Udah nya iya ke dibangun dipaut tuai manang ari belakang diasuh duduk. Lebuh maia tu iya ke dibangun nya agi dibungkur ngena pua kumbu. Jari sepiak kiba enggau kanan iya ke dibangun nya lalu dipasuk ke dalam moa kebuk . Lebuh maia tu tuai manang lalu ngangauka nama iya ke dibangun. Iya ke dibangun lalu nyaut *ut*. Enti iya udah nyaut reti nya iya udah ngeleda. Bungkur pua kumbu lalu dibuka, tuai manang lalu miau iya ke dibangun nya ngena manuk. Udah tembu biau, dunggul manuk disayat, darah dikendas ba kening iya ke dibangun. Udah nya iya ke dibangun lalu ditudung ngena pua kumbu lalu di ma orang bukai masuk ke bilik. Di bilik iya diasuh natka diri nyandih ba benda irun. Gendang rayah ditaboh tujuh renggat dikena ngangkatka semua kereban enggau lupung ari tanju ke pandung diruai.
Urung pukul lima lemai pengawa ngelalu babi berengkah. Tempara ke enda berapa tinggi digaga ari buluh diengkah atas tanju lalu dilapik ngena tikai bemban anyam dua. Gendang dikena ngelalu babi lalu ditaboh. Siku orang bejalai dulu nyan sangkoh udah nya ditangkanka orang ke ngaling babi. Bala orang ke indu ke bebaika ai dichampur kerupak pau enggau entemut ke disimpan ba kendi temaga bejalai nangkan dudi. Indu ke dipadu ngintu babi bejalai entudi nya mai pinggai ke di isi minyak nyiur enggau sugu.
Tembu bejalai niti ruai tiga kali besundang, bala sida ke ngelalu babi lalu pansut ke tanju. Letup lalu ditabur ba tanju. Babi lalu diengkah atas tempara ke udah di antap ngena tikai bemban anyam dua. Tikai bemban ke antap babi nya dianchau ngunjur nitihka riris rumah. Sida ke ngelalu babi lalu bejalai tiga kali besundang ngelingi babi. Pala babi ke gali ba tempara nya diasuh nunga ke ujung tanju. Selambar pua kumbu diredai ke tajuk babi. Serepak beranyam ke digaga ari buluh temiang enggau bulu landak siti digitang atas tajuk babi. Siku indu ke dipadu ngintu babi berengkah meri babi mandi ngena ai ke dibai ngena kendi temaga. Udah nya babi lalu diminyak , disugu. Udah tembu sugu babi lalu diberi makai piring. Babi ditejuka gali ba tempara nya semalam malam. (sinu ga meda tudah babi, amat meh udah diberi mandi, disugu lalu kenyang makai piring tang kaki ga ditanchang, chelap)
Pengawa besambung baru udah badu makai lemai. Urung pukul lapan malam gendang rayah lalu ditaboh enda ngetu sepengelama orang siku ke berayah niti ruai tiga kali besundang. Iya ke berayah tu belabung kain belachu, belanjang bulu ruai nangkin duku malat. Udah iya badu berayah iya lalu duduk semak pandung manang. Udah nya tuai manang lalu megai, mangku sayuk pinang ke udah diiyas nyemaka perau lalu berengkah nimang sayuk pinang. Pengawa tu dikumbai * nimang mayang*. Tuju pengawa nimang mayang tu iya nya dikena ngeruruska pengawa iya ke dibangun awakka tampak randak ngasi nyidi bisa randa.
Udah tembu nimang mayang, pengawa mupu beras lalu berengkah. Beras ke dipupu ari tiap iti pintu nya dipanduk ke diempa maia makai salau malam nya. Daun sabang selambar ditinsung bebuntut lalu dipasuk ba siku lengan tuai manang. Daun ke udah ditinsung nya dikena nakar beras ke diberi sepintu sepintu. Daun ke ditinsung teman siku lengan nya dikumbai * pasu manang*. Tuai manang, iya ke dibangun enggau sapit manang lalu bejalai niti ruai mupu beras. Tuai manang nangkin seluk dikena engkah beras ke ulih mupu. Tuai manang enggau sapit iya ke bejalai niti ruai tu nyebut leka pelian bangun madahka diri ke mupu beras lalu ngetu ba tiap iti pintu ke dipansa niti ruai. Orang ke empu bilik lalu nyuaka beras ngena seluk, tuai manang lalu nakar beras nya ngena pasu manang udah nya baru iya muangka beras ke dalam seluk ke ditangkin. Beras ke dipupu nya lalu diberi tuai manang ngagai orang ke empu bilik endur bebangun. Beras nya lalu dipanduk ke empa maia makai salau malam nya.
Urung pukul sepuluh malam, asi pulut tiga luntang enggau penganan tiga singkap disimpan ba pinggai diengkah ba tiap iti pandung ba sepemanjai ruai. Gendang rayah lalu ditaboh Sembilan renggat dikena ngelaluka penatai petara langit. Tuai manang, sapit tuai manang enggau iya ke dibangun duduk ngibun pandung. Orang ke ngelalu petara berengkah bejalai ari ruai iya ke dibangun lalu nuju penatai pun rumah, udah nya lalu pulai baru ke ruai iya ke dibangun, sekali besundang aja. Tembu ngelalu petara, siku orang ke dipadu lalu miau petara enggau bala ke bisi duduk begelumu dia. Dalam leka biau, disebut batang pengawa ke diintu. Tembu bebiau dunggul manuk lalu ditisil, darah dunggul manuk lalu dikendas ba lupung. Penganan enggau asi pulut ke diengkah ba pandung orang serumah lalu digumpul, dibai ngagai ruai iya ke dibangun lalu diempa bala ke begelumu dia.
Urung dini hari gendang rayah sebelas renggat ditaboh dikena ngelalu Raja Menjaya. Tuai manang, sapit tuai manang, iya ke dibangun lalu bejalai nuju penatai pala tangga rumah. Orang serumah ke bukai mai setunggul letup, manuk kena bebiau, kelita, piring enggau tikai bemban selambar bejalai entudi sida tiga. Tikai bemban dianchau ba tempuan semak pala tangga, letup ditabur atas tikai bemban. Piring diengkah ba atas tikai, kelita diengkah semak piring lalu ditungkun. Tuai manang, sapit tuai manang, iya ke dibangun bediri bedigir antara ruai enggau tempuan. Bala ke bukai bediri melakang dinding tempuan. Tuai manang nyebut leka pelian bangun dikena ngelaluka penatai Raja Menjaya. Udah tuai manang badu nyebut leka pelian bangun, siku ari orang ke dipadu lalu miau tungga ke moa pintu pala tangga. Ba leka biau, iya ngelaluka penatai Raja Menjaya. Udah tembu bebiau bala sida tu lalu bejalai betunda udi nuju ruai iya ke dibangun. Tuai manang bejalai dulu ditangkanka iya ke dibangun, sapit manang, iya ke mai setunggul, enggau bala ke bukai. Semua kereban dikena nganti penatai Raja Menjaya dibai pulai magang ke ruai iya ke dibangun.
Udah tembu ngelalu Raja Menjaya, tuai manang lalu ngaduka rengka dikena ngelala Yang iya ke dibangun nya. Beras tumpu tiga genggam diara ba talam temaga, diuyut ngena kain kebat lalu digantung semak pandung. Tuai manang lalu nimang beras ke diuyut nya. Timang tu dikumbai *Tebang Nuang Ambak Di Batang*.
Udah tembu nimang Tebang Nuang Ambak Di Batang, api ke terang ba ruai endur bebangun dipadam. Orang ke ba ruai endur bebangun diasuh pindah ngagai ruai sepiak semak nya. Iya ke dibangun diasuh duduk unjur semak pandung enda bebaju. Sapit tuai manang ngua nguaka sayuk pinang ke udah diiyas nyemaka perau atas pala iya ke dibangun. Lebuh ke nguaka sayuk pinang atas pala, iya lalu nyebut leka pelian bangun. Tuai manang lalu maut iya ke dibangun nya gali telentang. Udah nya lalu dibungkur iya ngena pua kumbu. Tuai manang lalu nyungkap masuk pua ke dikena mungkur iya ke dibangun lalu ngena bulu landak nanchum isi iya ke dibangun nya endur ngemasukka ginti. Ba semua ujung tunjuk jari, ba ujung tunjuk indu kaki, ba tumbit kaki enggau ba bau atas tulang ketapi. Semua ginti ke dipasuk iya nya enam belas iti. Lebuh ke masukka ginti ba tubuh iya ke dibangun, tuai manang lalu nyebut leka pelian bangun dikumbai *Tebang Meleti Tundan Tinggi Nama Nyadah Namaka Ginti Awak Nuan Jadi Gepi Kaban Manang*. Udah nya tuai manang lalu maut belakang iya ke dibangun nya awakka iya duduk. Kebuk sigi diengkah semak iya ke dibangun lalu jari iya diasuh bepaut ba moa kebuk. Tuai manang lalu nyebut leka pelian bangun dikena ngangauka semengat iya ke dibangun nya pulai. Enti semengat iya ke dibangun nya udah tepulai, iya lalu ngeleda luput. Iya lalu nyaut tuai manang ke ngangau ka iya, *ut*. Udah nya iya ke dibangun nya di ma, dibai tama ke bilik. Iya ke di ma tama ke bilik ditudung ngena pua kumbu. Di bilik iya di asuh natka diri. Udah nat ka diri enda lama iya lalu pansut ka ruai, duduk semak pandung. Nyadi ba kelulu pengawa bebangun, tuai manang ngeluluka diri nyadi Raja Menjaya ngemasukka ginti ba tubuh iya ke dibangun nya. Pengawa ngemasukka ginti nya dikumbai * bekeliti*. Kebuah ngemasukka ginti laban awakka iya ke dibangun nya tuai bulu enda alah ayu bejalaika pengawa manang.
Udah tembu bekeliti , api ba ruai endur bebangun lalu di idup awakka terang. Orang serumah lalu betugung ke ruai endur bebangun nya baru. Tuai manang lalu nyebut leka pelian bangun dikena nurunka beras ke diuyut semak pandung. Talam endur engkah beras lalu dikeluar ari uyut. Manang lalu meratika ara beras. Enti beras ke diara ba talam nya ayan rayuk ke ngambi gamal lelabi, reti nya Yang iya ke dibangun nya lelabi. Enti Yang iya Lelabi, iya enda tau munuh, makai lelabi. Guna Yang tu nyadika gembar , pengimbai, penyukung enggau penulung orang ke nyadi manang lebuh sida belian.
Urung pukul tujuh pagi pengawa bechenaga lalu berengkah. Rengka gendang lalu dibai, ditaboh niti ruai dikena ngiring pengawa bechenaga. Siku orang dipadu bejalai dulu ngerandang jalai mai sangkoh. Sangkoh nya disan, mata sangkoh dibungkus ngena daun sabang api tiga lambar. Sida ke bukai bejalai nangkan mai setunggul , letup, piring, ai disimpan dalam ruas, ai ke bechampur kerupak pau enggau entemut dibai ngena kendi temaga, minyak nyiur enggau sugu dibai ngena pinggai. Udah tembu bejalai niti ruai lima kali besundang , sida lalu pansut ke tanju. Di tanju sida lalu bejalai ngelinggi babi ke gali lima kali besundang. Lebuh ke bejalai ngelingi babi, letup ditabur ba babi ke gali. Udah bejalai ngelinggi babi lima kali, sida lalu ngetu. Indu ke dipadu nyugu babi lalu meri babi mandi ngena ai ke dichampur kerupak pau enggau entemut. Udah ai dalam ruas buluh abis dikena manjah babi, ruas nya dipechah lalu dipuruk ke baruh tanju. Minyak nyiur dipuru ba pala enggau tubuh babi udah nya babi lalu disugu. Udah babi disugu, pelalung daun lalang enggau bulu landak siti lalu di tanchang ba rekong babi. Udah nya babi lalu dibiau ngena manuk biring. Ba leka biau disebut pemanah ngepan ke dikena babi . Udah tembu biau, dunggul manuk disayat, darah dunggul dikendas ba kening pala babi. Babi ke gali nungga ke ujung tanju lalu diputar awakka pala iya nungaka ruai. Pua kumbu ke tajuk babi dibuka, daun sabang api tiga lambar diengkah ba rekong babi, mata sangkoh lalu direjang kedalam isi rekong babi. Pengawa ke munuh babi ngena chara tu dikumbai *ngayang babi*. Darah babi ditimbun ngena pinggai. Udah babi mati, perut lalu dibuntas ngulihka atau. Atau babi diengkah ba pinggai belapis daun sabang api tiga lambar. Atau babi dibai ngagai semak pandung, tuai manang lalu nenung atau babi. Udah nya iya lalu madahka reti atau babi. Udah ditenung atau babi dibai kebilik dapur lalu ditunu awakka mansau. Udah tembu meda atau babi tuai manang lalu ngupak sayuk pinang dua iti ke diiyas nyemaka perau. Mayang pinang dikeluar ari sayuk. Udah dikeluar, tuai manang lalu meratika gaya puting lambar mayang. Udah nya tuai manang lalu nerangka reti mayang pinang nya. Nyadi utai ke dipadahka mayang pinang iya nya gaya juluk ati iya ke dibangun nya lebuh iya udah nyadi manang ila.
Atau babi ke udah mansau tunu dibai ke tanju ngena pinggai. Ditanju atau babi ditetak bekerat kerat. Iya ke dibangun diasuh duduk enda bebaju atas bebendai ditanju. Darah babi ke disimpan ba gelas dikendas tuai manang ba tubuh iya ke dibangun. Udah nya tuai manang lalu nyapi kerat atau babi ba mulut iya ke dibangun nya. Darah babi ba gelas lalu diasuh irup iya ke dibangun. Darah teda irup iya ke dibangun lalu di irup tuai manang enggau sapit tuai manang. Sida tiga ke ngirup darah babi tu enda tau mutah, enti sida mutah reti nya nikalka tuah. Enti tuah nya ditikal sida alah ayu. Lebuh tuai manang
ngendaska darah babi ba tubuh iya ke dibangun nya, iya lalu nyebut leka pelian bangun ngajihka iya ke dibangun nya kebal ari semua utai ke jai.
Udah nya tuai manang lalu nepas tubuh iya ke dibangun nya ngena mayang pinang ari pala nyentukka kaki lalu nyampi ngajihka iya ke dibangun nya gayu guru gerai nyamai. Mayang pinang ke udah kena betepas nya dibai ke bilik lalu digantung ba atas moa tajau lalu ditejuka dia . Mayang ke digantung ba atas moa tajau lalu retai labuh kedalam tajau. Mayang ke udah retai gugur labuh ke dalam tajau enda tau dibuai. Iya diteju ke dalam tajau belama lama.
Semua piring dalam pandung dibai ketanju. Manang enggau iya ke dibangun bejalai betungkat ngelinggi tugung piring ditanju nyebut leka pelian bangun. Tuai manang ngeraup piring ngena jari lalu naburka piring nya ke belakang atap rumah. Udah abis piring ditabur manang enggau iya ke dibangun lalu bejalai betunda udi ari tanju ke bilik. Datai dibilik sida tiga lalu ngentung sadau ngena pun tungkat dikena nandaka pengawa bebangun tembu. Gendang rayah lalu ditaboh dikena ngiring pengawa ngerumpang pandung diruai. Manang enggau iya ke dibangun lalu mai lupung ari ruai ke bilik. Pun sabang api ke diengkah ba pandung diruai diambi lalu ditanam ba tanah ujung bilik iya ke dibangun. Pengawa bebangun tembu lalu berengkah ari nya iya ke dibangun udah ulih bejalaika pengawa bemanang enggau belian. Tuai manang enggau sapit iya diberi orang ke empu pengawa bebangun sabang enggau upah. Udah badu makai seduai lalu pulai ke rumah diri.

http://rintai62.wordpress.com/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s