KELINGAI, UKIR NGAU PANTANG

KELINGAI

November 17, 2012

Edm.Rintai Uncategorized Leave a comment

Bansa Iban endang udah ari jeman kelia idup belalauka Adat, Main Asal enggau Pengarap. Adat, Main Asal enggau Pengarap dititi ditali sida nitihka ajar Petara. Sida ngena utai ke diajar Petara nyadika turai dikena ngeruruska pejalai pendiau enggau pengidup. Siti ari utai ke nyadika turai pengidup bansa iban kelia iya nya ukir enggau kelingai. Kebuah iya dikumbai turai pengidup laban sekeda ari adat basa diberi ke orang ke nyadi tuai mungkal menua, tuai kayau tuai pulau dikenataika ngena chara ukir. Sekeda ari chunto adat basa ke dikenatai ngena chara ukir iya nya sungkup ke digaga ka Raja Berani ke diukir enggau naka pemanah. Kelingai ke digaga ba tubuh ke dirakit ngena sakang penawar utai ke jai mega dikumbai turai pengidup laban nya nyaga orang ke empu tubuh ke dikelingai nya awakka gerai nyamai nadai utai nganu.

Nyadi ukir tu bisi digaga ngena dua iti chara, iya nya ngena chara chura, pantang enggau tebuk. Chara chura enggau pantang tu digaga ba kulit tubuh lalu chara chura enggau tebuk tu digaga ba kayu.

Nyadi ukir ke bechura digaga ba kulit tubuh tu dipasuk ke dalam kulit ngena chara pantang. Along ke bechura chelum ke ulih ari arok arang dipasuk ke dalam kulit ngena utai ke bejuring mit ke ditatuk nengebus kulit ke lalu ngemasukka along chelum ke dalam kulit. Nyadi pengawa natukka utai ke bejuring nya dikumbai bepantang. Nyadi ukir ke nyadi lalu lekat ba kulit tubuh nya dikumbai kelingai.

Ngaga kelingai ba tubuh bisi dua iti kebuah. Kebuah kesatu iya nya dikena ngemasukka utai ke beguna baka rajut, pengaroh, sakang, gagah enggau pemanis. Nyadi kebuah kedua iya nya dikena ke pengelaie udah datai ba menua orang. Lebuh datai di menua orang kelingai digaga lalu nyadika tanda lebuh pulai ke menua. Maya ke pulai datai dimenua lalu dikenang, kelingai nya digaga ba menua anu tu.

Ngaga kelingai dikena ngemasukka rajut, pengaroh, sakang, gagah enggau pemanis begunaka pengawa miring enggau bebiau. Nyadi rengka piring ke enda tau enda dikemisi lebuh mantang kelingai ba tubuh iya nya; daun sirih, buah pinang puda, kapu, daun ruku, letup, asi pulut, asi amat enggau siku manuk lanjau dikena miau piring. Dungul manuk ditisil lalu darah dikendas ngena bulu manuk lalu diengkah ba piring. Duku ke kering semengat diengkah ba semak endur miring lalu diketup orang ke miau piring dulu sebedau iya miau piring laban nya dikena iya ngeringka semengat. Kebuah pengawa bepantang kelingai tu begunaka piring laban maya tu kitai ngangauka Petara, Bunsu Jelu, orang Panggau datai lalu ngasuh sida nyukung nulung merening ngiching pengawa ke digaga nya

Nyadi kelingai ke digaga, lalu bisi mega sekeda dirakit ngena utai ke beguna dikena nyaga tubuh, meri pengering, penampak iya nya rayuk ke neladan Pengait, Gerama, Jelenga Udun, Nabau Berasuk, Ringkak (engkatak), Bungai Terung, Buah Engkabang enggau Buah Rambing. Bisi mega kelingai digaga enda dirakit tang semina ke pengias tubuh aja. Ukir ke neladan utai tumbuh enda tau digaga nyadika buah kelingai laban utai tumbuh tu enggai nyadi digaga, diberi pemakai.

KELINGAI PENGAIT

Kelingai rayuk Pengait digaga ba buah betis lalu tuju iya dikena ke pengentap kaki awakka enda mudah tegelinchir. Maya ke ngaga kelingai rayuk Pengait tu sekeda rajut dirakit enggau along lalu kala mega resa ke ulih ba kaki jelu rusa dikena awakka kaki iya ke beempu kelingai nya laju singkang baka perejuk jelu rusa. Nyadi resa tu utai ke *bebatu* nyadi ba tunjing jelu rusa.

KELINGAI GERAMA

Kelingai rayuk Gerama tu digaga dua iku berimbai ba belakang ba adap tulang ketapi. Rayuk sepit Gerama nya digaga nyuntai manggai mimit ba tandan bau. Gagah dirakit ba along dikena ngaga kelingai Gerama. Kelingai Gerama digaga ba endur tu laban dikena ngayuka tanggam lengan tangkap jari teguh baka sepit Gerama.

KELINGAI JELENGA UDUN

Kelingai rayuk Jelenga Udun digaga ba tengah belakang baruh pegu. Asal utai ke dikumbai Jelenga Udun tu iya nya abi tajar duku ba kayu ke enda berapa basai ke betimbal sebaka penalam ari sepiak sepiak. Kelingai Jelenga Udun tu digaga ba endur tu dikena *nyaga* pegu lalu mega dikena ngayuka gagah bau sepiak sepiak sama bela. Ba rayuk Jelenga Udun tu rajut kebal enggau gagah dirakit ba along dikena ngaga kelingai.

KELINGAI NABAU BERASUK

Kelingai rayuk Nabau Berasuk digaga ba lengan antara siku enggau gerempung tapa jari. Ba adap semak mulut Nabau digagaka rayuk engkatak ke pemakai awakka iya enda ngachau orang ke empu lengan endur iya lekat nya. Rajut ke dikena ngerakit along dikena ngaga kelingai tu iya nya *pemanis jari* enggau sakang penolak. Utai ke diberi lalu disurung ngena jari moa ari ke bekelingai nya *manis* lalu pia mega enti bisi utai ke jai diberi orang lalu disambut ngena jari ke bekelingai nya, dia utai ke jai nya “tepulai” ngagai orang ke meri.

KELINGAI RINGKAK

Kelingai rayuk Ringkak (engkatak) digaga ba rekong baruh dagu. Iya digaga ba endur nya laban dikena ngayuka sada nyawa orang ke empu kelingai nya semampai terit enda kerarau tajapan orang nya lama bejaku. Disema baka Ringkak ke bemunyi semalam malam maya ujan lalu nyentuk ka tawas agi meh penerit bunyi nyawa enda berubah. Nyadi utai ke dikena ngerakit along kena ngaga rayuk kelingai Ringkak tu iya *ubat kena bejaku*, enggau sakang. Penabat enti bisi pengaroh jai kena empa iya lau nyadi tawar enda bisa .

KELINGAI BUNGAI TERUNG

Kelingai rayuk Bungai Terung tu digaga ba tandan bau dua piak tunga ke moa. Along dikena ngaga Kelingai Bungai Terung tu dirakit ngena pemanis enggau penampak. Dikesema jaku, ari jauh udah lelidak penampak kelingai Bungai terung enggi sanu.

KELINGAI BUAH ENGKABANG

Kelingai rayuk Buah Engkabang digaga ba belakang muak ari kanan enggau kiba beripih dua tiga igi berengkah ari baruh tulang ketapi nyentukka punggung. Kelingai Buah Engkabang tu semina dikena ke pengias aja.

Image

KELINGAI BUAH RAMBING

Kelingai rayuk Buah Rambing (baka bintang) digaga ba tengah belakang beripih dua tiga igi berengkah ari baruh pegu nyentukka punggung . Kelingai Buah Rambing tu mega semina ke pengias aja.

http://rintai62.wordpress.com/2012/11/17/kelingai/#comment-19

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s