MAKAI ASI TACHU

MAKAI ASI TACHU

January 7, 2011

Edm.Rintai Uncategorized Leave a comment

Reti leka jaku ngayau tu nyauka sama reti enggau ngayang. Tuju enggau niat leka jaku tu iya nya deka ngemedis, ngemerinsa enggau munuh munsuh. Kitai ngambi chunto leka jaku ‘ngayang babi’. Kaki babi nya ditanchang besembar, dibanchak sekali ngena sangkuh lalu ditejuka mati merinsa ngabiska seput. Nyaalai ba pengawa ngayau, orang ke deka dikayau nya endang nyauka sama nerima pemerinsa baka banding ke disebut aku dulu tadi. Semina bida iya, orang ke dikayau nya mensia nemu ngelaban nemu betaan. Nya kebuah orang ke nurun ngayau tu endang ngelengkap ka diri enggau ngepan ke chukup dikena nyeliahka diri ari penusah enggau pemedis ke tau nganu nyawa sida.

Penurun sida beripangka mimpi, diiring piring enggau betatika bunyi burung awakka penusah alah ulih diseliah. Kelimpah ari betangkin duku nyabur, bebekal rajut, pengaruh, penabar mimpi, penabar burung, sakang sunti, sakang jerungkan, sida mega bebekal jagung rendai enggau tai manuk lintung dikena nipang ipuh enti kena sumpit munsuh.

Nambahka nya , beras ke alas perut lapar, batu kuai, sempiar besi enggau lumut aping dikena ngidup ka api mega bisi dibai.

Ba sentang ngepan, sida bekenaka baju rutan ke dianyam lalu diserambi ba tubuh lalu ditanchang ba baruh kechiak awakka lekat enda nyeribak. Pala sida mega dipasukka selapuk ke digaga ari rutan lalu diselitka lelanjang bulu kenyalang tauka ruai awakka gamal sida dipeda besai nyerigai ganggam bengepan.

Sekeda pansik ke ngumbai baju dikena orang ngayau digaga ari kulit jelu beruang enggau engkuli agi mayuh meri penyaru sereta tanya. Kebuah pia laban jelu dua bansa tu mar digiga, siga lalu enda mudah ulih. Laban orang kelia bedau bisi senapang kena nimbak ngulihka jelu tu.Sema bisi pan chara nguluh ka jelu tu, enda meh chukup kulit dikena pemayuh mensia ke ngayau. Kelimpah ari baju rutan, kulit kayu tekalung mega dikena ka baju enggau sirat.

Terabai dikena sida digaga ari kayu ke liat sereta lembut lalu dibingkai ngena rutan awakka enda mudah belah. Kebuah sida ngena kayu lembut laban enti munsuh tepantap ka terabai lebuh maya ke beamuk besilat, duku munsuh lalu lekat ba terabai lalu ngemudahka sida mantap munsuh nya.

Lebuh maya orang ke ngayau udah nurun bekejang ari rumah, bala bini enggau sida serumah lalu berengkah bepenti. Sekeda ari penti pemali ke enda tau dikerja sida baka tu. Enti sida ngaga letup tauka rendai, kali dikena ngirau letup nya enda tau ditutup, awakka letupnya sepeneka engketik. Laban enti iya ditudung, nya ngeluluka laki tauka sida ke nurun ngayau nya kena pekung, kena pelampatka munsuh. Ngelutu bok pala ngena minyak nyiur mega siti pemali ke ngeluluka jalai diindik , ditengah sida ke ngayau nya lichin.

Pulai ngagai batang cherita, datai sida ke nurun ngayau nya ba endur ke enda berapa jauh ari rumah munsuh ke deka diserang, kira penyauh didinga panjong sida lalu ngaga dunju. Dunju tu endur sida belelak lalu ngiga kenyap semalam.

Ba endur sida bemalam nya dikumbai sida SINTUNG PENUDUK. Ba sintung penuduk nya endur sida manduk asi ngena ruas buluh, dikumbai sida mansuh. Asi ke udah mansau nya lalu dibagi, ditakar ngena TACHU ke dempa siku siku. Nya kebuah orang kelia enti sida kala enggau ngayau sida nyebut diri udah makai asi tachu.

Ba sintung penuduk nya mega endur sida NGUNTAK igi mudan. Reti nguntak tu muai untak pala munsuh ke ulih sida.

Urung dini hari dalam, tuai kayau lalu ngerak bala lalu nanya ka kenyap siku siku. Barang sapa ke bisi jai mimpi lalu diasuh ngibun sintung penuduk begulai enggau tuai kayau enggau sekeda bujang berani.

Pengudah sida ngintu diri, tuai serang lalu ngulu ka sida nyerang ngalahka rumah munsuh. Lebuh maia ke belaban, tuai serang endang meratika gaya pemujur serang bala nembiak iya. Enti serang sida berat, tuai serang lalu mai bala nyurut ka diri ngagai sintung penuduk. Lalu maia tu meh tuai kayau mai bala semua bujang berani ke dia mansang nyerang. Enti iya ngasaika bala bujang berani enda tetapatka pengering munsuh, iya lalu ngatur bala nyurut ka diri.

Enggau cherita ngelansa nya tadi aku ngarap ka kitai bisi peragam dalam ati ke pemerinsa aki ini kitai kelia nan ka bansa, ngulihka menoa.

http://rintai62.wordpress.com/2011/01/07/makai-asi-tachu-2/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s