GAWAI SAKIT ngau pengap iya.

PENGAP GAWAI SAKIT.

JAKO PENULIS

Nyadi Sampi eggau leka pengap dalam bup tu diambi ari Niang Lemambang Gana anak Rabong, di Bangkit, Paku, Saribas, ulih iya belajar ari niang Lemambang Gawing seduai niang Lemambang Lin di Suri, Rimbas, enggau di Semambu, Bangkit, Paku.

Nyadi pengap Gawai Sakit enda sabaka. Bisi ngambi Menjaya ngena Antu Ribut lalu bisi ga enda. Iya ke enda nya, Entawai seduai Kusing terus terebai neresa menoa raban manang ari tanah terus ka langit, udah nya baru nurun ka baroh alah datai ngagai rumah Iban ke begawai.

Ka pengujong jako aku, aku enggai enda meri besai terima kasih ngagai Lemambang Gana ke udah nusoi enggau silik leka sampi enggau pengap tu, awak ka bisi dibacha kitai maioh ke deka berati lalu belajar ka pengarap enggau penemu tuai bansa kitai empu ari jeman kelia sampai ka diatu, lalu kadudi hari jemah ila.

Niang Benedict Sandin

RURUN
Jerita Asal Gawai Sakit
Sampi Gawai Sakit
Pun Pengap
Ngerintai Tuai
Ngambi Ngabang
Ngua Pengaroh
Nurun Ngabang
Ba Rumah Orang Ke Begawai
Ngamboh
Mulai Ka Samengat

JERITA ASAL GAWAI SAKIT

Endang kenyau ari asal kelia, enti orang bisi sakit, dukun dulu diambi awak ka ngubat iya. Nyadi dukun nya ngelala pemedis orang ari iya begama. Udah iya ngelala penyakit, nya baru iya muchau ka pemedis nya. Enti pemedis patut diburah iya lalu murah. Enti penyakit nya patut di-intu ngena jalai bukai, iya suah beperai ngena dambar ngelingi rumah tauka ba bilik orang ke sakit nya.

Enti orang ke sakit enda gerai laban bela dukun, orang lalu beguai ngambi Manang awak ka belian. Enti udah dipelian ka Manang, lalu enda ga iya ke sakit nya gerai, nya baru ngambi Lemambang besugi tauka berenong ka iya.

Enti orang ke sakit enda ga gerai bekau diperenong tauka dipesugi ka Lemambang, nya baru baum mela iya enggau gawai sakit awak ka dipengap ka lemambang. Udah putus aum gawai sakit, orang lalu merengka utai ka piring baka ripih piring gawai burong.

Udah sedia magang perengka kena begawai, nya baru orang nurun ngambi ngabang kulu kili, katas kabaroh.

Sereta udah badu merarau, orang ke empu pengawa lalu miau ka manok kena ngerah orang beranchau tikai. Udah tembu beranchau tikai, lemambang ke udah diambi pen nyau deka datai. Sereta sida datai, orang ke empu pengawa miau ka manok baru kena ngerah ngalu lemambang ka tanah, enggau gendang enggau piring.

Datai sida ba menalan di tanah, tuai ke ngalu lalu nanya ka burong Lemambang. Enti Lemambang bisi burong, ai burong ga diator sida. Jalai ngirup ai burong tu baka ke ngirup ai burong leboh gawai bukai, satengah irup Lemambang, satengah irup orang ke empu gawai.

Udah ai alu tu di-irup, bala lemambang lalu nyebut leka pengap nunda udi orang ke ngalu sida niki ka rumah munyi tu:

Note: Udah tembu Lemambang bejalai, sida lain dudok ba ruai orang ke pun gawai, ke alai sida lalu disambut sereta dibasu bala indu. Udah tembu nyambut sida, nya baru orang miau ka manok kena miring. Leboh orang ke munoh babi ka dipeda atau nya miring, gendang rayah ditebah orang tiga renggat.

Udah tembu miring, nya baru manok di biau ka baru kena ngerah nyugu babi. Leboh tu orang bejalai tiga kali besundang niti rumah dilagu ngena gendang panjai.

Tembu nyugu babi, kira pukol lapan malam, orang makai asi. Tembu nya, baru miau ka manok kena ngerah bedijir. Udah samoa pengabang dudok berintai-rintai ba antara pantar enggau ruai, manok di biau ka baru kena ngerah nyibor.

Udah tembu nyibor, nya baru miau ka manok dikena niri ka tiang pandong ba tiap belah ruai. Udah pandong didiri, nya baru miau ka manok kena berandang jalai. Tembu nya Lemambang lalu belaboh mengap munyi leka pengap ke disebut dibaroh tu lagi.

Tang meh sereta udah orang ke sakit diambi bala Lemambang pansut ari bilik ngagai meligai di ruai, dia tuai Lemambang lalu nyampi ngena sampi gawai sakit.

http://gnmawar.wordpress.com/gawai-iban/gawai-sakit/pengap-gawai-sakit/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s