Bejalai Napi Pengubah

Selasa, 20 Mac 2012
Jalai Iban Napi Pengubah

Leka jaku bejalai enti dikalih ngagai jaku Melayu nya disebut berjalan. Dalam jaku Melayu rambai jaku nya nadai lebih ari reti bejalai-jalai tauka jalai ngagai sesebengkah tempat. Dalam jaku Iban, bejalai ngembuan konsep ti balat rapat enggau budaya orang Iban empu; tradisyen ti udah dikemeranka ari kelia sereta enda ulih disimpul ngena seleka leka jaku English.

Agi bisi orang di Malaya melabaka orang Iban semina diau di rumah panjai sereta ngemeranka pengawa bumai. Nya endang bisi pengamat, sigi agi bisi orang Iban di menua pesisir ke ngemeranka pengawa bumai. Taja pia enda mega ulih disakalka fakta ke nyebut orang Iban ke baru ngangkatka diri bujang angkat ngejangka rumah panjai diri laban deka ngasaika dunya luar. Ba rumah panjai di Batang Ai nitihka pansik Peter Kedit (1993) madahka nyau deka semua orang tuai diau dia udah kala bejalai enti enda suah abis iya sekali dalam pengidup sida.

Pengawa bejalai nya siti ari budaya enggau pengawa maya nya kelia. Bejalai nya endang penuh enggau ritual sereta suah amat dikeramika dalam litericha enggau mitos Iban. Hero tebilang dalam budaya Iban, iya nya Keling endang nyadika model enggau ikon orang Iban ke suah bendar ngejangka rumah panjai iya di langit din laban ke deka ngereja pengawa bukai.

Bejalai nya ukai pengawa genjau-genjau nadai tuju. Nembiak ke deka mindah nya nyau begelumu minta sukung ari pangan diri. Sida ngembuan tempat ke deka ditapatka lalu bisi projek dalam ati kelimpah ari nemu pengelama nya ila sebedau ngemulaika diri ke menua. Pengelama bejalai nya abis kurang setengah ngagai setaun. Bejalai tu bebida ari pengawa belelang. Belelang tu reti iya ninggalka rumah nya lalu enda pulai agi lalu mutuska kaul enggau kaban belayan ba rumah panjai. Ba sekeda kes, belelang kekadang ngujungka orang ke belelang nya lalu bebini ba menua bukai lalu sekeda nya lalu enda agi ngaku diri Iban.

Bejalai mega bebida ari pindah. Pindah tu reti nya semua sida ba rumah panjai nya pindah ke menua baru. Enti kelia pindah tu kadang-kadang ketegal deka bekuli tauka bekereja makai gaji ba endur bukai. Sida ke bekereja makai gaji tu nyangka gawa kereja kolar burak tauka kolar biru. Bejalai mega bebida enggau pengawau ngayauka pala laban kelia ngayau nya mai pala pulai tang bejalai tu mai pulai duit ringgit.

Pengawa bejalai ukai semina dikemeranka raban bansa Iban aja tang mega dikemeranka raban bansa Dayak ke bukai di pulau Borneo. Ambika banding bansa Penan mega bejalai ari siti palan ngagai palan bukai laban ke betanamka mulung. Orang Kayan bejalaika pengawa dagang sida mindah kin kitu lalu iya dikumbai pesalai. Tang taja pia, orang Iban balat agi serius dalam pengawa bejalai,nya alai leka jaku “ Iban” nya empu mai reti orang ke bejalai.

Kedit (1993) madahka bisi beberapa kebuah orang Iban tu ngemeran pengawa bejalai. Sekeda ari kebuah nya ketegal faktor ekonomi. Taja pan pengawa bumai bukit tu ngambi mayuh ari maya pengidup sida tang sida ke lelaki nadai pengawa enti sida udah tembu nebas tanah alai bumai laban udah nya sida semina nganti maya ngetau aja; iya nya maya sida berangkutka padi ke rumah. Udah nya, udah maya Gawai mega sida bisi lepa baru ari batang pengawa bumai. Maya tu mih dikena bala ke lelaki nya begiga ke kampung, ngasu beburu, begigaka sayur enggau engkayu ti ulih dijual di pasar. Chara lama ke ngemeranka pengawa betanam pindah meri peluang ngagai sida begigaka tanah baru alai bumai sereta begigaka endur baru alai ngetakka rumah.

Ketegal ubah pemansang dunya, bala Iban balat agi ngena awak sida gawa ba endur bukai baka bekereja nangkal getah ba kebun getah di menua ili sereta pengawa bukai baka pengawa ngaga rumah enggau pengawa ba kompeni minyak.

Belajar ba univerisiti kemaya hari tu mega dikumbai sebengkah ari bejalai. Enti kelia orang pulai mai pala tang diatu bala ke nembiak pulai mai degree. Pemayuh enggau peninggi degree ke deka diambi nya bepanggai enggau pengeliat ati Iban nya bejalai. Dalam kes ti baka tu iya nya tadi tau dikumbai ngambi pala diri empu kelebih agi baka sida ke ngambi degree ba tikas doctorate.

Taja pia, kekadang tusah ga ngumbai bala Iban bejalai ketegal faktor ekonomi aja laban bisi nya enti diperatika ari sukut budaya raban bansa Iban tu endang bansa ke enda tan diau rungguk-rungguk nadai pengawa di rumah. Pengawa bejalai ukai semina ketegal deka ngulihka duit aja tang mega bisi elemen pengerindu sereta pemerindang laban bisi bepeluang meda menua bukai.

Bala Iban gagit bejalai laban sida nemu bisi maya sida deka mulaika diri ke menua sida empu. Sida ke bejalai tu endang enda pungkang ngirum duit ke rumah ke belanja sida sebilik. Nya alai kitai suah meda sida ke pulai bejalai tu mai pulai mayuh duit sereta reta tengkira bukai kelimpah ari mai cherita ke ngerinduka ati bala bukai ke ninga; sida ke enda bepluang bejalai.

Kemaya ari tu ketegal ubah singkang pemansang dunya ti berubah enggau regas, konsep bejalai nya bisi lain mimit. Tauke penggaji pengawa nyau udah kurang ngaji pekereja ke bekereja sekejap aja tauka pengawa sambil. Nya alai bala Iban nyau lama agi ninggalka menua sida. Bejalai nyau udah nyadi chara idup ketegal fakta ekonomi. Orang deka dilatih, diberi kereja sereta gawa jauh ari menua. Sekeda nya nyau mupuk diau di nengeri. Konsep bejalai udah enda tentu enda jauh bebida enggau pemindah orang ari menua pesisir ngagai nengeri ba menua dunya ketiga (third world countries).

Bejalai kemaya hari tu mega mantu mai peneleba dalam pengidup siku-siku munyi ku siku director filem dokumenteri ke benama David Nading Moggie; ti kala menang Best Documentary in the Asia TV Awards 2010. Ku iya, ‘It was the idea of travelling and gaining experience and knowledge that prompted me in my quest to seek information and stories behind the documentaries that we made. … I hold true to my Iban roots – the concept of bejalai in life.’

Taja pan ubah pemansang ti nyegang baka ai pasang, orang Iban ke bejalai gawa ba nengeri ke gawa baik nya gawa tikas pengawa ke baruh tauka bepangkat ketegal deka ngulihka juluk ati nyadi orang ke beberita sereta beduit tetap mulaika diri ke menua sepengudah pichin ari gawa. Tu mih ke nyadi etika gaya pengidup ke beselampur enggau ubah pemansang dunya sambil ngembuan basa ngagai budaya, penatai diri enggau taka pengidup mensia. Nya mih kebuah bala Iban kemaya hari tu mujur bendar napi pengubah ke nyadai ngelingi rampa pengidup diri empu munyi ku Kedit bejalai nya udah nyadi institusyen ke idup dikena Iban napi ubah pemansang ke jampat sereta regas.

Penyanding penemu:

Peter M. Kedit: Iban Bejalai. Sarawak Literary Society, 1993.
The Star, June 20, 2011: Living the ‘bejalai’ concept
Posted by uchutedung at 6:50 PG

http://tempalaikenang-uchutedung.blogspot.com/search/label/Budaya%20Iban?updated-max=2012-05-29T21:15:00-07:00&max-results=20&start=13&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s