Budaya Dalam Jaku Iban

Khamis, 9 Disember 2010
Budaya Dalam Jaku Iban

Puas udah aku berunding deka ngalihka leka jaku Budaya ngagai jaku Iban. Sekeda ari chara nya betanya ngagai bala pangan Iban ke udah masai dalam pengawa nulis dalam jaku Iban. Sekeda ari sida tu endang udah nulis beberapa buah bup dalam jaku Iban. Leka jaku ke dikena sida nya daya idup. Nyadi aku nadai ngumbai leka jaku nya salah semina ba penemu aku leka jaku nya enda tentu engkeman. Kebuah pia laban belalauka sekeda dictionari ke dipansik aku, nadai leka jaku ke endang bisi nyebut terus senentang leka jaku budaya. Nya alai sekali tu aku nguji mantaika beberapa penerang tauka bukti ti nerangka leka jaku budaya enggau daya belalauka beberapa buah dictionari.

Keterubah tu aku nguji mantaika penerang senentang leka jaku daya. Belalauka An English-Iban Dictionary, Anthony Richard, Penerbit Fajar Bakti Sdn. Bhd. 1997, madahka reti leka jaku daya nya means, way, dodge. Ambika chunto – Iya ngiga daya ngelepaska diri. Iya nadai daya ngidupka diri.

Dalam dictionari Bahasa Iban-Bahasa Malaysia ke dikeluarka Dewan Bahasa dan Pustaka(1989) reti leka jaku daya nya upaya, cara, usaha, ikthiar, kekuatan, tenaga, pengaruh. Bedaya – ada daya/berdaya. Chunto: Iya enda bedaya nanka diri.

Nitihka dictionari Iban-Melayu-Inggeris, Sarawak Iban Writers’ Association, 2010 madahka reti leka jaku daya nya ulih upaya, usaha, tauka effort.

Tang ku dictionari Handy Reference Dictionary of Iban and English, ke ditusunka Vinson enggau Joanne Sutlive madahka leka jaku daya nya mai reti means of livelihood, way of life, to dodge.

Nya alai nangkanka tu aku nguji nerangka leka jaku budaya belalauka dictionari ke dikeluarka Dewan bahasa dan Pustaka. Budaya dalam dictionari nya mai reti tiga iti iya nya kesatu, tamadun tauka peradaban, kedua – kemajuan fikiran, akal budi (cara befikir, berkelakuan dsb…) lalu ketiga nya bersifat budaya, yang mengenal kebudayaan yang sudah maju (akal budi).

Berbudaya nya mempunyai budaya, memiliki cara berfikir dengan akal budi yang sudah maju. Ambika chunto – bangsa yang berbudaya.

Membudaya nya menjadi kebiasaan tauka kelaziman membentuk kebudayaan. Membudayakan nya mengajar tauka mendidik seseorang atau masyarakat supaya berbudaya. Iya mega tau mei reti membiasakan sesuatu perilaku/perbuatan yang baik supaya berbudaya atau beradab.

Nyadi kebudayaan nya keseluruhan cara hidup (yang merangkumi cara bertindak, berkelakuan dan berfikir) serta segala hasil kegiatan dan penciptaan yang berupa kebendaan atau kerohanian sesuatu masyarakat, tamadun, peradaban, kemajuan (akal budi). Ambika banding – Melaka merupakan pusat kebudayaan melayu sebelum kedatangan orang Barat. Pembudayaan nya proses tauka cara membudayaka sesuatu baikka iya pemikiran, ilmu enggau ke bukai.

Ari leka jaku budaya tauka daya idup munyi ke disebut sekeda orang aku nguji ngerapatka leka jaku nya enggau culture. Nitihka Vinson and Sutlive (1994), culture nya jalai pengidup tauka semua adat enggau penemu sebansa orang ke diajar ngagai serak baru. Nyadi ditu iya bisi nyau deka sebaka enggau reti daya ke diberi seduai iya ke diterangka aku dulu ari tu. Tang seduai mega setuju madahka reti means nya mega daya.

Nitihka Kamus Dwibahasa Bahasa Inggeris-Bahasa Melayu, Edisi Kedua DBP, culture nya cara hidup sesuatu masyarakat; kebudayaan; budaya. Iya mega mai reti perkembangan kecerdasan manusia dari segi fizikal, daya berfikir, semangat dll. Siti agi reti leka jaku culture nya bekaul enggau beradab.

Kepenudi bendar nya belalauka Oxford English Dictionary, 2002 madahka leka jaku culture nya 1. the arts and other manifestations of human intellectual achievement regarded collectively tauka 2. the customs, institutions and achievement of a particular nations, people or group.

Belalauka semua komen diatas aku nguji nginjau leka jaku budaya dikena aku madahka jaku culture tauka budaya dalam jaku Melayu. Taja pan polisi nginjau dalam jaku Iban (Sistem Jaku Iban Di Sekula, 2007) berat agi menatika jaku English ketegal iya ti entap agi dikena ba tikas antarabansa sereta mayuh udah berasuk enggau jaku Iban kenyau ari jeman Rajah Brooke kelia ti megai Sarawak, aku agi ngemeratka jaku seperugan iya nya jaku Melayu laban ke engkeman agi enggau jalai pengidup Iban sereta mega nitihka arus pemansang jaku kemaya hari tu ke ngemeratka jaku Melayu nyadika jaku bansa ke dikena ba sekula.

Aku endang nadai nagang orang ke agi deka ngena leka jaku daya idup dikena ngalihka jaku budaya tauka culture laban tipa-tiap iku kitai endang ngembuan prinsip enggau teori dikena kitai ngetanka penemu kitai empu.

Penyanding Penemu
1. An English-Iban Dictionary, Richard Anthony (1997), Penerbit Fajar Bakti Sdn.Bhd.
2. Handy Dictionary of Iban and English, Vinson and Joanne Sutlive (1994), Tun Jugah Foundation
3. Kamus Bahasa Iban-Bahasa Malaysia, Dewan Bahasa dan Pustaka (1989)
4. Kamus Tribahasa Iban-Melayu-Inggeris, Harry Usup Umbar, Geoffrey Singgon, Timothy Salang (2010), Sarawak Iban Writers Association
5. Kamus Dwibahasa Bahasa Inggeris-Bahasa Melayu edisi kedua, Dewan Bahasa dan Pustaka (2002)
6. Kamus Dewan edisi ketiga, Dewan Bahasa dan Pustaka (2002)
7. Concise Oxford English Dictionary, Oxford University Press (2002)
8. Sistem Jaku Iban Di Sekula, Kementerian Pelajaran Malaysia (2007)
Posted by uchutedung at 6:34 PTG

http://tempalaikenang-uchutedung.blogspot.com/search/label/Budaya%20Iban?updated-max=2011-07-05T23:27:00-07:00&max-results=20&start=25&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s