Cara napang

Jumaat, 3 Jun 2011
Napang

Tapang nya sebansa kayu ti kering, bedaun mit lalu suah agi ditemu tumbuh ba semak sungai. Tapang deka bendar ditepan singut. Kenu ku pengarap Iban, mayuh tapang diuan antu rembia. Nya mih kebuah orang Iban enggai enda nimang tapang dikena sida ngasuh antu nya lari sereta enda ngachau sida ke deka muar manyi. Pengawa muar manyi ari puchuk tapang dalam budaya Iban nya dikumbai napang. Kenang pengarang sekali tu nguji meratika enggau ngelansa pengawa napang tauka pengawa muar manyi ari puchuk tapang.

Sebedau muar manyi ari dan tauka puchuk tapang, dia orang deka beratika gamal idang manyi ti inggap ba tapang nya dikena nentuka pemisi iya isi. Sida bechuanka idang. Enti idang manyi nya dipeda mipis, betangkal tauka bepala, nya nandaka iya udah tau dipuar. Kelimpah ari nya mega, orang enda tau enda ngintaika bulan ti ngena baka lebuh anak bulan enggau bulan kembung surut.

Pekekas ke disediaka orang sebedau muar manyi nya baka sempun, rintung, senduk, beledi tauka tin. Sempun digaga ari kulit kayu. Rintung diterinsung ari upih mulung, jengang ari mua lalu jumpit ke burit ngambika enda mudah tetukil ba dan kayu lebuh diulur.

Ba bansa Iban bisi empat bengkah chara niki tapang. Kesatu nya ngena jalai pakau, kedua ngena chara tali tekang, ketiga ngena jalai surung kait lalu keempat ngena chara tatuk.

Chara ke dikenang ditu iya ngena jalai pakau. Enti dipakau, dia orang ngiga kayu siti ti panjai sereta ganggam. Kayu tu lalu disembarka ba batang tapang ke tiang pakau. Tiang pakau digaga betampung-tampung.ba tiang pakau nya tadi ditanchangka empalang alai berindik enggau bepegai. Penyarang empalang tu kira-kira penumbas iya alai betunjan niki. Ba sekeda menua, tiang pakau dikumbai tiang sengayan.

Udah temu pakau nya baru orang menyadika api enselua ngejang ari pun tapang dikena ngemegau manyi ngambika enda ngachau orang ti muar enggau ke nganti di tanah. Udah api dipenyadi, nya baru orang belabuh niki.

Di puchuk tapang orang lalu nepas siti idang dikena ngabas. Udah nya baru orang belabuh nimang tapang. Leka timang nya nitihka gaya manyi. Enti bisi isi, dia orang lalu muji tapang nya. Peratika chunto timang di baruh tu;
Tepas-tepas mayang gemurun,
Kantuk telasih di luar pagar,
Oh tangkas-tangkas nuan menurun,
Taka-taka iee pandey mengajar.
Anak landa di anak landin,
Tikam dengan seligi pinang be-tok-tok,
Oh badas mati tikai pandan dayang,
Baka terumbu di apung buruk.

Tembu ditimang, nya baru orang ti niki sama belabuh nepas. Sempun dibai sida dipangka-pangkaka ngagai dan tapang. Indu manyi disiar ngena sempun ti berasap ukai ngena daun api. Murun bara pai ti labuh nya dititihka indu manyi.

Udah nya baru nyubak idang ngena senduk. Senduk tu dikumbai belidau. Penudi iya baru orang ngulihka pala ti ngundan madu manyi. Idang enggau madu lalu disimpanka dalam rintung sereta diulur ke baruh.di baruh, orang nyambut rintung lalu magi idang ari manyi.

Nyadi sekumbang orang ti muar manyi tu dia orang ke nganti ba tanah megai sekeda penti. Ambika banding, sida enda tau nunu anak manyi, ikan, belachan enggau semua utai ti bebau rum. Penti tu baka nya laban antu rembia enggai ensium utai nya. Kelimpah ari nya mega, manyi pan tau lalu malut orang enti sida udah ensium bau rum. Tu tau ngujungka iya ngachau orang ke niki.
Baka nya mih jalai orang Iban ngereja pengawa ti dikumbai napang.

Nota:

sempun – torch of shavings
rintung – conical bark container used for lowering honeycombs from tapang trees or processing sago
upih – spathe of the areca palm
pakau – bind together, to lash
penti – temporary restriction on activities

Posted by uchutedung at 10:25 PTG

http://tempalaikenang-uchutedung.blogspot.com/search/label/Budaya%20Iban?updated-max=2011-07-05T23:27:00-07:00&max-results=20&start=25&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s