Gawai Pangkung Tiang

Rabu, 16 Jun 2010
Gawai Pangkung Tiang

Raban bansa Iban ngembuan mayuh macham pengerami gawai. Sebengkah gawai ti jarang diintu tauka jarang ditemu orang ke rebak baru kemaya hari tu nya Gawai Pangkung Tiang. Iya patut diatur dulu ba sesebuah rumah panjai ke baru udah tembu sereta diwan, sebedau orang rumah panjai nya tau nirika gawai bukai.

Enti Gawai Pangkung Tiang udah didirika, rumah panjai nya tadi dikira udah tuai lalu nadai penti pemali nirika pengerami gawai bukai. Reti nya, semua bagi pengawa ti ditagaka dikereja ba rumah panjai nya tau diatur magang laban enti nitihka adat lama iya nadai pulaika penanggul agi.

Gawai Pangkung Tiang diintu enti bisi rumah panjai dirarak lalu mungkal berumah baru ketegal angus, ditabanka tanah tusur tauka ketegal rumah udah lama sereta jai. Orang ti ngatur gawai tu endang orang ti bepenemu senentang adat enggau atur ngintu gawai tu. Sida tu dikumbai lemambang lalu bisi penemu nentuka ripih enggau tusun pengawa gawai nya chukup genap sereta silik dikereja ngambika nadai penimpang enggau pengurang. Enti sema rumah panjai nya nadai lemambang, sida tau ngambi ari menua bukai.

Penatai lemambang ti diambi diambat bala nembiak ngena gendang, ngena piring ngena ading ngagai tiang pengingat. Udah nya, sida lalu bedara sereta mengap ba tiang pengingat rumah panjai nya.

Pedara sida lemambang tu dikena nawar salah kenyap salah pengangkat, salah mimpi salah hari enggau nyangka ke bisi salah burung enggau salah tenung. Pedara nya dibagi, ngambika burung jai ditinggalka di tanah, lalu burung tuah ti manah dibai niki ke rumah.

Udah nya, bala lemambang lalu angkat mengap tama rumah panjai, niti ruai sekali besundang sebedau sida nudukka diri ngimbai pandung besai ke didirika ba ruai tuai rumah. Sida lalu ngatur piring ke padung nya. Kelimpah ari pandung nya genap pintu rumah panjai nya mega bisi nirika pandung mit ba ruai diri empu.

Penembu bala lemambang nyendiaka piring pandung, sida lalu ditikika begulai enggau pengabang mayuh. Udah ti betiki, maya hari salah kelala, nya maya sida ngetu nganti ripih pengawa sebengkah agi lebuh ke mengap baru sepemanjai malam. Apin bala lemambang nampung pengap ke ujung ke agi, seraban orang ari rumah panjai nya empu dulu begendang lalu berayah ngerandang jalai.

Kereban ti dikena lemambang lebuh mangkung tiang nya nyengkaum batang kayu lemuni, randau malam enggau ruas asi pulut. Sebedau ngerak tiang, piring disediaka ba kelingkang tauka pinggai. Ai mega disediaka dikena meri tiang nya mandi. Utai ti dikena berunsut baka batu enggau pau, minyak wangi dikena mechik tiang.

Udah tiang pemun ba genap pintu dipengapka, bala lemambang minta bala petara enggau sida anda mara datai ngabang. Udah nya baru tiang pemun dipangkung ngena ruas asi pulut ngarika bala petara ti udah dikangauka ngena leka pengap. Nitihka pengarap Iban, sebedau dipangkung, tiang nya endang agi tinduk. Nya kebuah tiang nya dipangkung dikena ngerak iya ari tinduk ngambika iya dani lalu nerima piring ti udah disediaka. Tembu nya sida serumah lalu minta tiang meri penyamai, pengerai, pengaya enggau pengeraja.

Semalam-malam, bala lemambang endang nadai ngetu mengap niti ruai ngelingi pandung rumah panjai nya. Leka pengap sida nya sigi ngangauka sida petara datai ngabang lalu nyukung pengawa nya. Lebuh hari nyau deka tawas, pengap bala lemambang pan sangkai.

Tumu pagi nya bala lemambang belabuh mengap nimang tiang pemun, meri tiang mandi apin ke mangkung tiang nya ngambika iya dani lalu ulih nyukung ngempung rumah panjai nya.

Udah kemas bala lemambang tama ngagai sepintu-sepintu bilik mangkung tiang pemun, nya baru gawai nya dikira tembu. Abis pengawa nya, pandung lalu dibuka lalu dirumpang. Bala pengabang mayuh sama mulaika diri ngagai menua diri empu.

(Dibali ari Pembrita 3/2005)
Posted by uchutedung at 5:22 PG

http://tempalaikenang-uchutedung.blogspot.com/2010/06/gawai-pangkung-tiang.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s