Kelai Dalam Daya idup Iban

Jumaat, 9 September 2011
Kelai Dalam Daya idup Iban

Kelai nya tanda ke dikena semua bansa. Kelai jauh bendar berubah nitihka pemansang dunya. Bansa Iban mega bisi ngembuan kelai kediri empu dikena sida bepadah. Kenang pengarang tu nguji bekunsi bepenemu pasal kelai ke dikena bala Iban menya ngambika tau nambahka penemu bala nembiak rebak baru kelebih agi sida ke ada ba nengeri. Ari pemayuh kelai dalam bansa Iban, dua bengkah ti deka dikenang ditu nya kelai pesindang enggau pelapa.

Pesindang nya kelibak tauka sempiar kayu ti ditibak sereta diselitka ba batang kayu bukai. Suah agi iya diselitka melintang ba pun kayu.

Nyadi tuju Iban ngaga pesindang bisi mayuh macham. Enti pesindang ditibakka orang ba pun kayu buah ti benung bebuah, nya nunjukka orang ke empu pun buah nya nanka buah nya ari ke ditiki orang bukai. Batang kayu lurus sereta tau diambika kayu api tauka dibanka perau mega suah dikelai ngena tanda pesindang ngambika orang enda nebang iya. Nambahka nya, pesindang mega suah dikena nanka manyi tauka selap enggaika dipuar orang bukai. Siti agi tuju pesindang iya nya dikena ngelaika endur orang meti tauka manjuk. Pesindang bansa tu diselitka orang ba pun kayu di sepemanjai jalai dikena nangkan orang mayuh enda ngasuh sida limpang ari batang jalai. Sida enda tau limpang laban nangika dipangka peti.

Nyadi pelepa nyelai mimit ari pesindang. Pelepa digaga ari daun kayu enti di tanah. Enti di dalam rumah, iya selalu agi digaga ari kain tauka pua kumbu. Lebuh Iban baru udah ngemali umai, dia umai mali ditengah orang bukai laban nangika sida nguluka antu chit enggau antu pipit ngachau padi. Nya alai dikena nagang orang nengah umai, dia Iban ngantung pelepa di tisi umai. Baka nya mega enti Iban baru udah ngintu rumah ngena chara pelian tauka gawai. Dikena ngelai rumah nya mali ditiki temuai, dia orang ngempang jalai pendai ngena pelepa.

Pelepa ti digaga ari kain tauka pua kumbu nya suah agi dikena ngelai bilik ti mali ditama temuai ketegal orang dalam bilik nya baru udah belian. Pelepa nya digantung ba mua pintu.

Nyadi tanda tauka kelai ti udah dikenang ditu nya endang dikeingatka bansa Iban ari turun-menurun. Kelai tu endang agi meruan dikena Iban bepadah datai ke sehari tu.

Nya alai enti bisi meda kelai pesindang ba pun buah orang, anang kitai niki pun buah orang nya laban iya bisi orang empu. Enti kitai niki mega, dia kitai tau kena tunggu orang ke ngempu pun buah nya. Baka nya mega, enti kitai bejalai neresa kampung puang, anang limpang ngapa ke dalam babas enti kitai bisi meda pesindang ba tisi jalai enggaika dipangka peti. Pia mega, rumah ti udah dipelepa enda tau ditiki enggaika kitai malu ngapa kena tunggu orang.
Posted by uchutedung at 7:03 PG

http://tempalaikenang-uchutedung.blogspot.com/search/label/Budaya%20Iban?updated-max=2011-11-12T03:05:00-08:00&max-results=20&start=20&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s