KONSEP-KONSEP DALAM BUDAYA IBAN

Khamis, 31 Januari 2013
KONSEP-KONSEP DALAM BUDAYA IBAN

BUDAYA, AKOMADASYEN, AKULTURASYEN, AMALGAMASYEN

Panyun Jaku

Sekali tu pekara ti deka dikenang dalam artikel tu iya nya sentang konsep budaya dalam raban bansa Iban sereta iya ke bisi kaul enggau pekara nya baka akomadsyen, akulturasyen enggau amalgamsyen. Nyadi tuju bekunsi penemu ditu sentang pekara tu semina deka mai kitai sama-sama beratika pekara tu ari sukut raban bansa Iban.

BUDAYA

Mayuh bendar karang udah ditulis sentang budaya sechara generik sereta ngenangka budaya raban bansa bukai tang jarang amat kitai bisi macha iya ke ngenang sentang raban bansa Iban. Siti tanya diken ngeruga runding raban pemacha iya nya sentang reti enggau guna budaya. Ba penemu raban pemacha nama reti enggau guna budaya? Lalu enti ulih beri chunto. Ngelama tu raban penulis ke nulis sereta bejaku sentang pekara tu balat agi bekenaka leka jaku daya idup dikena sida nyebut budaya. Nyadi aku ukai enda selubang penemu enggau sida tang aku meda rampa reti leka jaku budaya tu besai agi. Tambah mega aku mega bisi kala nulis sentang reti budaya enggau daya idup ba artikel aku ke bukai. Tau dipeda ba blog tu mega.

Nyadi budaya nya tau diretika gerempung program akal pikir (software of the mind). Budaya mega tauka dikumbai kitai ‘mind-set’ tauka bingkai akal pikir ke nyadi ari pengarap (beliefs), kur pendiau (values), kelai (symbols), ‘batang’ pengawa & pendiau rama (sosial ideals). Kemaya hari tu, reti budaya besai bungkur. Iya nyengkaum pengasai ati siku-siku mensia nyentukka tukuh bansa (national character), pengawa rama di opis nyentukka peragam enggau emosyen dalam runding mensia sereta budaya mega tau dikumbai chara pengidup mensia dalam komuniti, nyengkaum adat, institusyen, pengarap, enggau kur pendiau. Nitihka Kim Ann Zimmermann Culture is the characteristics of a particular group of people, defined by everything from language, religion, cuisine, social habits, music and arts.

Budaya ngembuan empas ba pikir sechara terus, tauka nengah proses sosialisasyen siku-siku individu ke dalam kandang budaya nya, tauka ukai sechara terus, iya nya lebuh individu belajarka jaku budaya – jaku nya pan siti chuan tauka pattern ti terenak ari budaya.

Budaya raban bansa Iban ngembuan sekeda tukuh ti mungkur budaya intelektual, pengelandik jari, pengelandik verbal enggau penemu ngidupka diri tauka survival.

Budaya mega tau berubah nitihka singkang pemansang dunya. Reti nya budaya enda meku tauka statik. Kelimpah ari nya mega rampa menua dalam enggau ari luar raban mensia, nempa lalu tau ngubah budaya sesebengkah bansa. Reti nya budaya tu dynamic. Nya alai rampa budaya tu nyengkaum politik enggau pekara ti bekaul enggau hal dagang ke tau mejal sereta mansal mensia berubah.

AKOMODASYEN

Akomodasyen dalam budaya suah diberi definasyen munyi tu; pengeran ati ke deka ngemasukka elemen budaya sesebengkah bansa ke dalam budaya bansa bukai sereta ngubah pendiau diri empu ngambika nyamai bekomunikasyen enggau orang ke ngembuan budaya ti enda sebaka.

Nya alai, akomodasyen dalam budaya belabaka individu deka nimbal nguna chara ke bekabih enggau budaya jaku ke dikena mansutka penemu tauka penerang.

AKULTURASYEN

Akulturasyen tau dikumbai proses beambuka pengarap enggau pendiau raban bukai tau mega dikumbai baka kumang menyarung. Taja pan ke suah agi bansa ke mimit tubuh ngambu pendiau sereta jaku bansa ke mayuh tubuh, kekadang tau ga iya bekalih. Elemen budaya bansa bukai ke diambu dalam proses akulturaysen mungkur; pengerindu bejaku nguna jaku bansa bukai, mandang sereta nitihka ulah enggau kur pendiau bansa bukai sereta nyadi raban gerempung sosial enggau institusyen rama.

Nambahka nya, akulturasyen mega nadai sapat ari sukut politik tauka kelai bansa. Proses ngubah budaya siti-siti raban tauka individu ketegal budaya ke bekabih enggau ke bukai. Proses ke dikena siti-siti raban bansa nerenakka budaya sida ba siku-siku raban berengkah ari peringkat anak mit lalu proses tu dikumbai sosialisasyen.

AMALGAMASYEN

Proses begulai ke endur raban ke mimit tubuh tauka ke endang nyengala begulai enggau raban ke mayuh tubuh ke mega endang nyengala nengah chara belaki-bebini ke ngasilka raban tauka bansa baru, ambika chunto baka Serani. Tu ke disebut amalgamasyen.Bansa ke baru nya ngembuan daya idup ke bisi penyelai ari enggi apai indai sida.

Penyimpul Jaku

Nya ke baka kenang ngelansa sentang konsep budaya sereta pekara ti bekaul enggau iya. Taja pan ngelansa dipelabaka ulih meri penerang mimit ngagai kitai semua. Enti deka nemu enggau lenak agi tau macha bup penyanding penemu sentang budaya tauka ngelawa sekeda laman web ti bisi ngenang pekara tu enggau dalam agi.

Penyanding Penemu

http://www.carla.umn.edu/culture/definitions.html

http://www.livescience.com/21478-what-is-culture-definition-of-culture.html

Posted by uchutedung at 8:04 PG

http://tempalaikenang-uchutedung.blogspot.com/search/label/Budaya%20Iban

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s