Konsep Petara Dalam Raban Bansa Iban ngau Sampi nugal

Rabu, 6 Jun 2012

Konsep Petara Dalam Raban Bansa Iban

Raban bansa Iban arap ngagai mayuh tuhan tauka dikumbai Petara di dunya tu (Noria:2011). Sama mih enggau konsep antu dalam raban bansa Iban mega dikumbai Petara. Munyi ku Jensen (1974) petara nadai enda manah; bisi utai ditulung sida. Reti ti ku iya nya konsep Tuhan dalam raban bansa Iban nya pekara ti sakral lalu ngembuan kuasa luar ari selama. Dalam mitos raban bansa Iban, sesetengah Tuhan nyaru diri dalam roh aki ini sida.

Bujang berani ke ngembuan kuasa ke kering sereta nyelai nya Orang Panggau. Sida tu ukai semina kering tang mega tau ajih sereta nadai orang bukai ulih ngelaban sida. Raban bansa Iban semina ulih betemu enggau Orang Panggau nengah ritual besai ke chukup enggau piring enggau ading. Tu diatur nengah pengawa miring tauka nengah pengaruh ti udah dipeturunka nengah kuasa-kuasa ari Petara, antu, semengat enggau roh aki ini ti dikenataika nengah mimpi ngagai orang Iban.

Konsep Tuhan tauka Petara dalam raban bansa Iban nya kuasa-kuasa luar biasa ti datai ari petara baka Raja Sengalang Burong, Raja Pulang Gana, Selempandai enggau Orang Panggau lalu kuasa luar biasa ke bukai ke datai ari antu, semengat enggau roh aki ini orang Iban ke udah lama lesi laya sulai. Kelimpah ari nya, raban bansa Iban mega arap ke kuasa ti datai ari jelu, burung, indu utai, bulan, bintang, matahari, sungai enggau tasik. Semaka sida benung bejalai tauka benung ngaga utai lalu tedingaka bunyi jelu, sida lalu nikal pulai laban enti sida neruska pejalai diri nyangka sida tau ditinggang penusah. Kelimpah ari nya mega nyangka utai ke ditanamka sida taun nya tau rumbau nadai bebuah tauka nadai ngeluarka asil ke ngujungka sida tau lapar pungkang.

Peratika siti ari leka sampi nugal di baruh tu mandangka chara raban bansa Iban ngangauka petara sida.
Sa, dua, tiga, empat, lima, enam, tuuu…juh.
Aku ke ngumbai kita Petara, baka nya,
Ukai aku ngumbai Petara ngapa,
Ukai aku ngumbai Petara saja,

Aku ngumbai Petara aki,
Aku ngumbai Petara ini,
Aku ngumbai Petara kejakang,
Aku ngumbai Petara puyang,
Aku ngumbai Petara,
Pengemata anak mensia
Enti nasau,
Iya nganchau keresan,
Enti nebang,
Iya ngaduka tundan,
Enti nebas,
Iya ngidarka reban.

Kita Petara, baka nya,
Anang kita ngabang kediri,
Anang kita angkat nengali.
Bepadah diri serumah,
Bebai diri menyadi,
Bekumbai diri beserekai,
Bekangau diri selangkau.

Kita ngabang baka nya,
Anang nurun tubuh murus,
Anang nurun tubuh untus,
Mai ubat teruba ingat,
Mai pengaruh gembar tubuh,
Mai keminan gembar badan,
Mai penchelap mai pengelindap,
Mai batu ai mali langkang,
Mai tanduk rusa labang,
Mai batu tapa tampung perempung,
Keruntuk tanduk rusa kampung,
Mai taring uting babi kepung,
Mai batu tanah ulih nyamah,
Di tingkah tebiang,
Mai batu getah ulih nyamah,
Di tengah lampung pundang,
Nyadi kami nugal sehari tu,
Nanam padi nanam puli.
Posted by uchutedung at 6:28 PG

http://tempalaikenang-uchutedung.blogspot.com/search/label/Budaya%20Iban?updated-max=2012-12-27T02:29:00-08:00&max-results=20&start=7&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s