Pua kumbu

Rabu, 16 Mac 2011

Pua Kumbu

Pua kumbu nya bansa pua tenun asal Iban. Agi menya indu Iban balat ngemeranka pengawa betenun. Sida nemu nenun Pua Kumbu, Kain Pandak, Baju Burung enggau sirat. Kebuah sida indu Iban balat ngemeranka pengawa betenun laban niat ati sida ngambika bulih puji ba pengawa megai ubung. Pia mega indu Iban ti landik ngereja pengawa megai ubung tau dikumbai “Indu Takar, Indu Gar, Indu Sikat, Indu Kebat, Indu Tau Muntang, Tau Nengkebang”. Gelar ti baka nya tinggi amat pangkat ba pendiau bansa Iban dulu menya. Nya mih tau ngangkat status sosial sida ke indu maya nya kelia.

Dulu kelia ubung bedau bisi di menua kitai enda baka kemaya hari tu. Nya alai indu Iban ngaga ubung kediri empu. Sida betanamka taya tauka kapuk ba empalai lebuh udah tembu ngetau. Ari taya nya sida ulih ngaga ubung ti digasingka sida ngena pengasing ubung.

Lambar ubung nya tadi lalu dichura sida ngena rakit baka jerenang, engkala burung, tarum, janit, bangaley enggau urat engkudu. Ubung nya tadi lalu digulai sida enggau minyak kepayang. Udah nya lalu diperambunka di tanju beberapa malam. Pengawa ti berambunka ubung baka nya dikumbai ngembun. Kenu ku pengarap Iban, indu Iban nemu nyura enggau ngembun ubung ari ajar Indai Manang Jarai.

Dikena ngaga ukir buah pua nya, lambar ubung nya tadi dikebat tauka diikat ngena lemba. Pengawa ti nanchang lambar ubung ngena lemba nya dikumbai ngikat tauka ngebat. Pengawa tu digaga sebedau ubung nya ditenun.

Indu Iban enggai enda ngembuan Pua Kumbu ngambika

Bisi dikena sida nyambut antu pala ti ulih laki tauka ambai sida lebuh baru pulai ngayau.
Bisi digagaka sapat enti lebuh diri sebilik bisi mati.
Bisi dikena ngerayung pandung enggau meligai lebuh begawai umai.
Bisi digagaka kuta basa lebuh pengerami melah pinang.
Bisi dikena ngerayung panggang babi tauka manuk lebuh maya Gawai Antu.
Bisi dikena ngias rumah enti bisi pengawa tauka pengerami besai.
Bisi dikena nyandik anak.

Nama ukir tauka buah pua tu ti ditenun indu Iban endang mayuh macham. Iya ngambi nama macham-macham utai bap langit. Tang sebut nama Pua Kumbu ti besai tauka tinggi agi pangkat nya dikumbai sida:

Lebur Api Bali Bangkung

Bali Begajai Bali Berinjan

Kumbu Muau Bali Belulai

Bali Berandau Bali Menyeti

Remang Berarat Bali Tengkebang

Kayu Betimbau Bali kelikut

Bandau Nulang Bali Sepepat

Bali Ensuga Kumbu Rayung

Kelimpah ari nya tadi, bisi mega agi sebut nama Pua Kumbu ti baruh agi pangkat. Sebut nama pua nya dikumbai sida:

Begajai Engkatak
Leku Sawa Igi Nibung
Manang Iling Tangkung Sepepat
Orang Chayam Kara Jangkit
Gerama Murung

Sebut nama pua nya tadi endang selalu disebut orang ke tuai dalam leka main enggau jaku tuai Iban. Diatu gamal ukir buah pua nya jarang ulih dipeda. Tang taja pia, manah agi nemu sereta ngingatka sebut dama pua nya. Amat pan enda ngelala ukir nya agi tang manah kitai nemu nama sida.

Amat indu raban bansa Iban jarang agi bisi ngemeranka pengawa ngaga Pua Kumbu ngena chara embun enggau ikat tang kemaya hari tu kitai tau meda indu Iban bisi ke agi ngaga Pua Kumbu, Kain Pandak, Baju enggau Selampai ngena ubung ti bechura enggau bekebelik.

Posted by uchutedung at 6:24 PG

http://tempalaikenang-uchutedung.blogspot.com/search/label/Budaya%20Iban?updated-max=2011-07-05T23:27:00-07:00&max-results=20&start=25&by-date=false

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s