Adat mata benda

 

Nyadi ba tuju enggau kabuah kitai Iban di Menoa pegai Saribas & Kelaka bisi ngembuan adat ke dikumbai adat Mata Benda ia nya nitih ka padah serta sara bala ke tuai-tuai dulu suba,ke alai mayuh ga sida tu udah nadai enggau kitai begulai agi, serta ia ke agi bisi pen nyau ga udah tuai, serta mata nyau rapa, pending nyau enda ninga.

Nitih ka padah serta tusoi bala tuai-tuai ke endor aku betanya, dia tuju serta kabuah ia nya 3 iti. Tiap iku kitai Dayak Iban baik ka indu tauka lelaki endang bisi dibasa enggau adat abis kurang 3 kali dalam sa-umor idup kitai, serta ia ke terubah maya ia ke baru ada dia ia lalu diberi orang mandi ka pendai, dia ia diberi adat, maya ia belaki, bebini, niri ka bilik niri ka penaik diri empu besarara pengidup ari apai-indai iya, sekali ga kitai meri iya adat serta udah ke penudi iya maya kitai besarara enggau bala ke agi idup ke penudi iya kitai di intu orang lalu diberi orang enggau adat mata benda nya tadi mega.

Kebuah ke terubah iya kitai diberi orang Adat Mata Benda maya orang ke ngintu pemati nya tadi , laban awak ka semua kaban belayan ke bisi enda enggau maya ke rabat ka iya nya tadi, nemu pemesai serta adat Mata Benda ke di beri sida sarumah enggau bala kaban belayan ke bejurai ka utai nya tadi. Kedua ia, nya awak ke dikena orang nanggam ulit rumah ke udah tingal pemati nya tadi, kira ke conto ia, enti tak bisi meh orang datai tauka orang rumah nya empu tepada ka pesilar ular sawa ke kededa muka ngesai, lalu manjung madah ka nya tedung jelu remaung ke mali meda anyam buah tanggoi seraung sundang menarang, lalu bisi tekenyit nyerais ingar nyawa lebuh iya tepeda ka pesilar ular kendawang ke bebulu biru arau berejang be iku layu pandang serarai, dia orang ke tekenyit serta manjung nya tadi lalu di ukum kitai sebagi ari 3 bagi pemesai adat mata benda ke diberi kitai ngagai orang ke mati nya tadi. Kira baka kitai meri orang ke mati nya tadi 3 igi jabir – lalu bereti nya RM3.00 da iya nya tadi lalu di ukum kitai saringgit aja.

Udah nya bedau maya ke ngetas ulit, bumbus baru ka ulit nya tadi, dia iya ke orang bukai ke bepenyalah nya tadi lalu ukum kitai saringgit baru, lalu agi ga bisi orang ngelanggar penti ulit nya sabedau ke diketas, dia orang nya lalu di ukum kitai saringgit, ulit lalu diketas laban udah bumbus 3 kali serta adat Mata Benda pen udah ga abis kena kitai ngukum orang.

Lalu kebuah iya ketiga ia nya, nyangka lebuh maya kitai sarumah deka begawai Antu lalu bisi merantu bala ke udah parai dulu suba, dia adat ke diberi ngagai ia nya tadi di ambi ka pemutus penemu, ni gaya pemesai nama raga di anyam ka iya nya, sekali ka iya semina mai Garung Tungal, Garung Ranggung 3, datai ni naka adat nya patut di bai iya serta bakanya ga adat basa kitai ngagai sida iya nya.

Tang dalam maya kitai ke beberi adat Mata Benda nya, ukai ga sebarang ku ati kiitai, laban semua kabuah serta tuju iya ke mai adat siti-siti nya tadi endang mayuh amat penti pemali.Nama kabuah pia, enti iya ke parai nya enda patut mai Menaga tau Rusa, serta tak naka tau mai Alas, dia deh bilik orang ke empu pemati nya deka angat serta enda gerai enda nyamai, laban orang ke mati nya tadi enda ulih ngema Benda ke diberi kitai ngagai ia nya tadi. Nya alai enti kitai tak asai malu meh meri kaban kitai nya adat ke mit-mit agi, tang tak main tibak lalu tabak ka aja, bisi penusah kitai ke empu pengawa ke baka nya, laban sebayan orang ke parai nya, deka minta tulong orang ke idup ngema benda iya nya tadi. Enti sebayan minta tulong, bisi parai lalu bisi enda nyamai sida sabilik.

Lalu adat mata benda ke selalu di kena kitai berengkah ari menukol tauka 50 sen, Jabir – RM1.00; Panding – RM2.00, Alas Muda RM4.00, Alas Ngerang – RM5.00, Rusa – RM8.00; Menaga – RM16.00, Ningka – RM32.00.

Adat mata benda tu berengakah ari anembiak mit tau mai menukol, lalu di anyam ka kita buah limau, lalu enti anembiak nya nyau udah sekula serta nemu bemain main anembiak rama, dia ia di anyam ka orang Sepak Raga, lalu adat ia sigi Jabir – RM1.00 lalu enti udah bujang & dara dia adat iya tau mai sigi Panding – RM2.00 lalu enti iya nya udah bebini udah belaki, bisi ruang bisi panggang, bisi bilik bisi penaik ka diri empu lalu nyadi tuai bilik, dia ia tau diberi 3 igi Jabir, lalu enti iya nya Tuai Rumah, tau mai Alas Muda tauka Alas Ngerang- RM4.00 ~ RM5.00, serta besai agi ga pangkat, jelai rita jelai nama lalu ulih ngempuru lalu ngiring bala mayuh, besai agi ga adat ia, serta enti iya nya kala enggau orang bebala lalu bisi tanda bintang betu berani, besai agi ga utai bai ia.

Semua utai tu di putus ka orang mayuh nitih ka sara serta banding penemu bala mayuh ke bejurai ka utai tu. Tang taja pen pia ia ke parai tu tadi bisi pansut penemu, sabedau iya ke ninggal ka dunya tu, madah ka diri semina tau mai adat ke mesai tu, taja pen iya nya tau kayau, tu mulau, tau serang tau pandang, tang iya semina minta tanda naka ke 3 igi jabir, dia kitai ke idup enda tau ngelaban penemu iya nya, enggai ka bisi penusah sida sabilik ke ditingal ka iya udah nya.

Lalu bisi ga adat ke disebut orang Jabir teluk bandir, Alas Rapi Babas, Rusa tisi paya serta kabuah utai ke baka tu disebut orang maya ke bejurai ka penemu lalu mutus ka adat Mata Benda, laban ke pengurang orang ke di pejurai nya tadi, laban nyangka tudah tuai maya ke agi idup, tang melintang penemu, nadai menuku mai pengidup diri, serta ngasuh silau ngasuh linsau di peda serta didinga bala mayuh. Kira ke enda manah ulah meh iya tu.

Au, ka bisi panjai mimit enggi aku tu tadi, tang nya meh, aku sekali agi minta tulong tunjuk, padah serta bantah kitai semua ke bisi nemuai ngagai blog unggal ku GNM, awak ka penemu kitai nambah manah agi. Nya aja mupok aku.

http://gnmawar.wordpress.com/#comment-42933

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s