Cara ngintu rumah angat

biring sempidan

Tabi Tuai GNMawar,
Meri tabi basa ke besai arap ke petara meri tuah limpah ngagai nuan belama….
Minta runding nuan tuai pasal pekara tu: Ba menua ku ditu bisi sebuah rumah panjai ti kelalu ‘angat’. Rumah panjai nya lebih kurang 23 pintu tang sida tu suah amat ditinggang penusah ianya sida serumah suah amat mati. Dalam 4 bulan keterubah tu aja dah 4 iku ninggal ke menua.Taun siti nyin kemari ti enda salah ku kira-kira 8 iku nadai.Orang ke tuai ari rumah panjai ke damping agi ngasuh sida ‘mamut’ (pindah tauka bemalam ba sebelah tanah, kerangan etb dalam sehari dua) awakka tau bulih nasit ke manah agi.Tang penusah ke nuntung sida endang baka selama.Tanya aku, bakani chara ke ulih dikena kitai nengah adat Iban awakka tau nyeliah utai ke balat agi nyadi.

 

 

BS,
Pasal pemali rumah panjai tau dipeda nuan ditu:
http://gnmawar.wordpress.com/adat-iban/adat-barumah-nyerangkong-penti-pemali-atur-pendiau-enggau-pengawa-di-rumah-panjai/

 

Ba panemu aku, rumah kelalu angat baka tu enda tau enda di genselan enggau babi siko 7 kali sepa. Tentu bisi orang ngerja penyalah besai ba rumah nya (eg. Jadi Mali, Indu ngampang, salah jalai ngintu orang ke parai, nyekang ka rumah, etc).

 

Pengawa tu dikerja enggau pengawa miring & nyampi ngena lemambang. Enti nadai nemu orang ke ngerja penyalah nya, kita sarumah nya mesti ngeluar ka utai ka dikena nya tadi. Babi nya mesti ditumbak, nambah ka utai bukai kena ngering ka samengat (baka besi, chapak lama, kebok, etc).

 

Enti bisi bala pemacha bukai bisi teleba meda orang ngadu ka pengawa tu, nimta meri penemu.

indai na

Amat munyi ko Uncle.kada nda kita tu bisi bubus ulit deh?Ba rumah kami suba bisi utai bakatu nyadi,kumbai orang ke tuai bubus ulit laban rumah kelalu inggar,nadai basa,bekarauh sebelah tanah enggau utai ke bansa nya maia kandang ulit.Penti tu amat mali.Tang nyangka pembaca bukai bisi nemu kebuah bukai ga.

Kunchit Langit

Pasal Ngintu Rumah Angat.

Aku kala bisi enggau orang ngintu pengawa ke bakatu, tang ukai di menoa kitai di Sarawak tu, iya nya di sepiak nyin, di menoa bala menyadi kitai di Kalimantan. Lebuh maya orang ke ngintu pengawa tu, aku endang udah besai tuai serta bakerja ari menoa kitai di Malaysia nyadi Liaision Military Officer ari Malaysia serta gawa di Kalimantan Barat, Pontianak. Tak di perati ka aku enggau bendar pengawa sida tu suba laban ke bisi nyimpan pengerindu ba adat asal serta ripih penemu kitai Dayak Iban ke dulu-dulu menya.

Aku ke enggau orang tu tadi maya kami bisi bejalai ka menoa Ulu ai Batang Kantu lalu masuk ka Ulu Kanyau begulai enggau Soldadu TNI (Tentera Nasional Indonesia) dalam taun late 70′s suba. Datai kami ba menoa orang siti, ke di kumbai orang Sungai Kelayam, dia kami lalu dipadah ka orang ba siti rumah dalam urung menoa nya bisi pengawa mambus ka rumah laban ke kelalu bangat angat, selalu mati serta lalu nadai temu kabuah enggau deka amat sakit.

Sekali sida iya lalu bisi di tiki darah rumah panjai, serta darah nya nyau berambur-ambur niti ruai kira bisi 2 ka 3 pintu di pansa utai bakanya. Dia sida sarumah lalu nguji darah nya tadi enggau amau di dapur, lalu di gerami atas gumpal darah nya tadi. Kenu ku penemu sida iya, dia utai nya enti iya ukai darah jelu tauka mensia, iya tetap deka meredih serta bepupu, reti nya darah utai kamah utai enda manah meh nya. Udah ke di test sida baka nya, dia nya tadi lalu negative deh (meredih). Lalu ku penemu orang dalam rumah nya tadi, dia darah nya tadi darah datai ari Antu. Lalu rumah nya tadi dikumbai ” TIKI DARAH”

Sida lalu baum, serta mambus ka rumah lalu enda pulai dalam maya 3 hari, serta hari ke 4 baru sida pulai ka rumah nya baru. Datai sida di rumah dia sida maya ke rari ari rumah tadi lalu bisi baum deka ngadu serta ngintu rumah nya baka ke di baruh tu:-

Piring – Turun Sembilan

Babi – Enti Indu 3 kali Sepa, serta enti Babi Lelaki, udah tumbuh taring,

Manuk 3 iku.

Perengka bukai kira ke tak kena nyadi ka raban utai datas nya tadi.

Serta dia aku bisi meda orang ngayan ka Pua Lebur Api, dikena nyerayong Piring nya tadi di tengah rumah ruai Tuai Rumah, serta ka bukai nya di engkah ba Langkau Ampun ba kitai ditu, di menoa orang nyin dikumbai sida Langkau Pentik, laban ke bisi pentik dia ba kedua-dua iti langkau nya ari ulu enggau ari ili rumah sida iya.

Udah nya sida sarumah sama lalu begiga ka paung burung Papau serta enggau Embuas, laban ke penemu sida Burung Papau tu ka pintu batu awak ka enda alah langar, linsar bala antu, bala jelu enggau antu penyakit ke ngasuh sida iya lengit. Lalu tambak burung Embuas tu ku penemu sida ngasuh semua antu, semua jelu enggau penyakit bukai enda meda sida sarumah agi, reti nya burung ngerabun ka mata utai ke enda manah.

Lalu jalai sida ngintu, baka tu:-
Nama pengawa sida tu, dikumbai sida iya ngampun tauka nyukul ngagai Petara awak ka ngelindung, mandung sida ari penusah ke ka datai. Piring sida turun sembilan, manuk 3, serta babi di sayat ba Langkau ampun iya ke ari ulu Rumah, serta tuboh babi nya tadi di tumbak ka ka dia serta langkau ampun ari ili rumah alai sida numbak ka pala babi nya mega. Tembu miring dia sida sama nanam paung burung Papau ari Ili rumah serta paong burung Embuas ari Ulu rumah, rumah lalu mali pengalama 3 hari nadai tau tiki temuai, serta penti ku sida iya enda tau ngirit utai ba payung rumah, serta enda tau malu besi maya ke mali nya tadi, engai ka antu jelu ninga, reti nya bepangkung ka besi tu tadi ngangau ka utai ke bukai.

Ke pengujung pengawa tu udah sida ke be-intu-intu baka nya nayu enda temu aku rita agi laban nadai follow up, kami nyau pulai ka Pontianak baru, serta nadai ga ninga rita orang ari rumah nya nurun ka Bandar Pontianak agi.

Kunchit Langit

Unggal Biring Sempidan,

Kena endar bulu manok nuan tu Unggal, Tentu nuan tu meh Biring Sempidan Arang ke di jangka aku ke teleba rekok-rekok nan ke menalan, enda pia Unggal.

Tu siti jerita di pedua aku enggau kitai sebala ditu baru,enda tentu tak panjai endar.

Sekali menya lebuh ke agi biak, maya ke sekula ba Lower Primary dalam urong taun in the 60′s bisi ku nemu orang ngerja pengawa tu, tang endang enda mereti. Rumah orang tu di TIKI DARAH MALI serta di bumbus ka sida iya mega. Nyadi rumah tu, ke alai kami sekula, serta tak sunyi meh rumah orang tu maya ke mali nya suba. Serta pemanjai rumah tu lebih ari 30 puloh pintu . Tang pengalama sida ningal ka rumah enda aku tentu ingat , sekali ka 2 tauka 3 hari.

Bala kami anembiak sekula tadi, diau di Boarding House ke enda jauh ari rumah panjai nya. Serta maya sida ke ngintu ia pen bisi ga aku ingat tang cara-cara sida iya ngintu nya tang endang enda berati ka iya suba, laban ke agi anembiak serta enda tentu nemu utai ke baka nya. Tak dikumbai kami pengawa miring rama sengapa aja.

Di pelaba ka aku, tentu bisi iya ka sebaka enggau intu orang di Kelayam Ulu ai Batang Kantu (Empanang) nya suba mega. Sayau agi biak, enti enda bisi endar ka pengingat lalu di pebagi ka kitai sama-sama ditu.

Kabuah alai rumah orang tu bisi angat serta enda tentu nyamai di wan sida laban, dulu menya bisi bansa ke udah nguan menoa ari Ili Nanga Ai sida , bisi besumpah enggau pangan diri serta betanam ka ngeli Antu Gerasi ke puh bejalai maya tumbuh Lambur, Antu Abu ke beduru munyi pambu Guntur, lalu mega bis betanam ka ngeli Remaung, ke be pun ke Bujang Inin, bunsu Remaung ke mali meda bunga tangi serawong bebuah Sundang Menarang.

(Tanggoi Serawong – buah ke di anyam orang bechura Merah enggau Chelum). Kenu ku jerita tuai, enggai sida Bujang Inin (Bunsu Remaung ) meda buah tanggoi ke baka nya. Deka ngasuh sida ia mangah lalu deka naju ka anak mensia, ku penemu tuai.

Kabuah sida ke Tuai dulu menya besumpah nya laban berebut ka menoa, serta sumpah sida iya, “Enti bisi mensia berumah lalu didinga kukok manok ari Nanga Ai ke alai sida nya diatu, deka enda nyamai serta tusah laban utai ke ditanam nya tadi”. Nyadi maya orang kerja kayu (Timber extraction) dalam taun 1960++ suba, bisi bala orang ke kerja diau dia, tang enda lama. Abis kayu mindah ga orang ka bukai.

Bansa orang ke besumpah tu ukai bansa kitai Iban tang bansa asal ke empu menoa nya dulu kelia. Bansa Asal tu agi bisi begulai enggau kami, tang nyau enda tentu mayuh agi, lalu sida ke enda berumah be-entugu , lalu nampong kitai Iban, bisi kedua sida masuk Islam serta bisi ga masuk Christian baka kitai Iban ke diatu.

Nya aja utai ke ulih pedua aku enggau kitai sabala ditu. Enti agi bisi, ila ga aku nibak mimit. Mupuk aku.

 

Kunchit Langit,
Terima kasih ka penemu nuan pasal jalai ngintu rumah angat nya tadi. Mayuh anembiak rebak baru enda nemu reti ulah diri ke tau mai rumah nya nyadi angat, anang ke nemu chara ngintu utai bakanya.

Ba menua kitai ditu, bisi ga aku udah ninga orang “mupus” ka rumah bakanya menya, dikena sida ngupas rumah angat. Tang aku empu enda kala meda chara orang ngerja pengawa tu. Arap ka pemacha bukai tau nambah ka penemu bakatu ngagai kitai bukai.

Terima kasih.

biring sempidan

Bisi ga ku berandau pasal utai tu madah ngagai sida ke tuai2 agi ba penemu ti ulih ku ari intenet, dalam nya ku ninga siku org tuai nyebut kelimpah ke menua angat ketegal ulah diri empu enda tentu manah bisi megaia ulih angat endur rumah nya digaga ba endur ti enda patut.Rumah panjai tu digaga ba tanjung ti beantara ke dua iti sungai…Nma reti ia tu tuai?

Kunchit Langit

Unggal Biring Sempidan,
Nemu ku reti ku nuan nya Ungal. Bisi ga orang nyebut nya Tanah Kepit Ai, enti ari kiba enggau kanan sama bisi ai lalu besatup ba ai ke di Ili endor tanah nya mati, lalu tanah nya lalu nyadi tanjung kiba enggau kanan orang mudik tama sungai salah ari siti anak sungai udah ke ngeleka ka sungai ke besai agi. Kitai ke mudaik ari kiba kanan sungai nya tadi lama amt tepeda ka pangan diri.

Aku udah bemalam lebuh ke agi kerja Prentah suba ba endor ke baka tu, dia kira kurang lebih jam semak pukul enam lemai, hari lalu hujan nyala ke enda tentu lebat, kira nyau lekat di atas daun, serta mata panas agi bisi mancar kena urong dada kitai serta enti di kampung nyau kena dan kayu baruh iya.

Dia siku ari bala kami, lalu tepeda ka Indu siku bakemban tauka bedandung kain kangan chelum naka dada, duduk di atas dan ke nyuntai ke enda tentu landai iga lalu nunga ka belakang kami sebala 5 iku. Udah iya meda nya, dia iya lalu ngangkat ka Senapang ia lalu ka ditembak ia, dia aku meda ia tak tekenyit gamal, lalu malik ngagai uchak nya tadi, ke alai iya lalu nunjuk ka aku serta kami 5 iku lalu tepeda ka utai balat amat nyelaie bakanya. Aku lalu ngerara serta nagang iya awak ka enda nimbak utai nya tadi. Tang seninjik amat ga uchak tu tadi lalu enda nyadi ngachit ka Riffle ia, enti nyema di tembak, entah meh, ni enda gaya kami sebuat kini. Udah nya aku lalu betunu ka sepupu ke digaga sida Indai di menoa ke endang dipesindang ka aku belama enti lebuh bejalai, serta nyau enda lama udah nya hari pen hujan ga lebat, utai nya tadi lalu ayas nadai di peda kami agi.

Bisi endar berasai takut, sepi aku, lalu digenggam-gengam ku leka utai, sepi aku agi ga bedau, datai ka pagi, tembu ngintu diri kami lalu bejalai baru nuju jalai besai ke alai orang lalu meri kami ration, serta lalu majak ga bejalai baru. Nyadi jerita tu kira ke di simpul aku enggau jaku pandak, tanah ke baka tu endang enda manah endor ngetu tauka endor berumah, nya alai tanah tu tau dikira mali, lebuh aku ke bakenang ka utai tu ba orang ke tuai-tuai agi penemu serta nemu burung enggau adat berumah.

Tang diatu utai bakanya nyau nadai dipeduli orang agi, laban mayuh amat jalai orang muntang serta ngadu ka ia awak ka enda mali. Tang taja pia, aku nyerah ka utai ke bakatu, ngagai pengelantang runding serta pikir siku-siku mensia ke bisi di pansa utai ke bakatu, diatu, serta ka jemah ila ia.

Lalu siti da agi utai ke bisi nyelaie temu aku, ia nya tanjung ke dipeling ai serta enti ai besai dia tanjung nya tadi lalu putus laban ampuh ba pun tanjung nya tadi. Tu pen dipeda aku, kira enda tentu manah, laban orang ba rumah ke bakatu bisi nyadi penusah besai carut diri sarumah lalu parai 2 iku sekali laban penyarut nya. Dia anak ari siku ke parai nya tadi lalu bebalas ka apai ia, dia lalu tebalas ga pemati apai ia nya tadi, tang pemati serta dalam rumah nya bedarah lalu nyadi dua iku.

Mayuh amat penti pemali ke endur kitai Iban berumah mesti ditith ka kitai, baka ripih paung burung serta atur ramu, lalu atur tanah ke deka alai kitai berumah nya selain ke ditemu, mesti dipelajar ka dulu awak ke kitai ke deka nguwan rumah nya deka minta diri gerai nyamai, lantang senang, bulih pengeraja enggau jelai rita. Nya alai orang tuai-tuai dulu menya tak naka penyiru diri ngintu serta niri ka rumah, awak ka nadai tulih ka penusah.

Nya aja dulu, mupuk aku.

 

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s