Pengingat enda betulis sejarah Iban dikaitka pengamat enggau jerita bukai

Pengingat enda betulis sejarah Iban dikaitka pengamat enggau jerita bukai

Posted on September 22, 2012, Saturday

KUCHING: Pengingat enda betulis ti dikembuan orang tuai ba senentang sejarah Iban kelia dikaitka pengamat enggau sejarah bukai ke bisi nyadi maya nya,”ku Prof. Madya DR. Neilson Ilan Mersat.

DR. Neilson ke nyadi seiku pemansik Sejarah penatai Iban ari Indonesia tama ke Sarawak dalam taun 1400 ngagai 1840 madah pengingat sejarah ke enda dirikut nya enggai nyadi dikelai bebula sengapa.

“Ba pengawa aku ngempuru penerang tauka pengingat sejarah lama ari orang tuai, aku seruran mandingka cherita nya enggau sejarah ke udah dirikut maya cherita nya nyadi.

“Aku betanya ngagai kaling ti landik ba pekara sejarah baka Hikayat Merong Mahawangsa tauka Raja Besiung. Lebuh aku mandingka maya nya nyadi, sejarah nya sebaka enggau cherita Beji ti udah ditusuika aku ba program sehari tu (kilah ensana),”ku Iya.

Iya mansutka penerang tu lebuh nyaut tanya dalam program Polemik ‘Petempatan Di Sarawak Dari Tahun 1400 hingga 1840 Masehi ’ Sejarah Malaysia sesi ke 27 ti diatur di Palan Penerang Islam (IIC) Jalai Ong Tiang Swee ditu, kilah ensana.

Ku iya, cherita Beji suah dikaitka enggau pejalai bansa Iban ari Ketapang, Indonesia tama ke Sarawak. Ba abad ke 16, sepengudah ninga cherita petara diau dilangit ti ditusui orang dagang Arab ti ransing ngerembaika ajar Islam, Beji lalu ngaga tangga ba atas pun Entepung dikena niki ke langit ketegal ke deka betemu enggau petara.

Lebuh dipansik, pengerembai ajar Islam di Sarawak nyadi sama maya enggau cherita Beji ti ngaga tangga ke langit.

Kitai mega patut meratika cherita ‘Pelayaran Munsyi Abdullah’ ti udah meda seiku orang Dayak ti bepantak penuh tubuh, tandu iya.

Dalam program ke diatur Arkib Negara Malaysia nya, DR. Neilson ke mega Dekan Fakulti Sains Sosial UNIMAS bisi mantaika asil pansik ba senentang ‘Sejarah Awal Migrasi bansa Iban di Sarawak’ alai iya nyeritaka pejalai bansa Iban ari Kapuas, Indonesia tama ke Sarawak nengah menua Kumpang sebedau jeman perintah Rajah Brooke.

Ku iya, pejalai bansa Iban di Pulau Borneo nempuh timpuh ti amat panjai lalu udah ngadaka siti bengkah ti dikumbai Iban Diaspora di pulau tu.

“Taja pia, baka bansa bukai ke bisi di Asia ti laun nerima urup, semua sejarah nya enda dirikut. Mayuh penerang semina dirikut sepengudah Rajah Brooke datai.

“Berindik ari nya, sejarah di Sarawak sebedau jeman Brooke enda tentu ditemu lalu jurai senentang pejalai bansa Iban ke Sarawak semina bepelasarka pengingat ti enda ditulis baka ke udah digaga Benedict Sandin,” ku iya.

Ketegal ti kurang sejarah dirikut dalam timpuh taun 1400 ngagai 1840, Arkib Negara Malaysia setuju ngena pengingat ti enda ditulis ari orang tuai nyadi sebengkah agi penerang sejarah ti diguna.

Diatu, kelimpah raban pemansik ari universiti, Tun Jugah Foundation sereta Majlis Adat Istiadat mega ransing ngempuru semua sejarah Iban ti diulih ari penerang orang ke dulu.

Read more: http://www.theborneopost.com/2012/09/22/pengingat-enda-betulis-sejarah-iban-dikaitka-pengamat-enggau-jerita-bukai/#ixzz2UmASaAfg

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s