Sejarah penatai sereta pemindah raban bansa I

Sejarah penatai sereta pemindah raban bansa Iban

TULIS tu ngenang senentang sebengkah program Polemik Sejarah Malaysia Sesi ke 27 ti diatur Arkib Negara Malaysia kenaka 19 September 2012.

Dalam program nya, Sapit Dekan Fakulti Sains Sosial Universiti Malaysia Sarawak (UNIMAS) Prof. Madya Dr Neilson Ilan Mersat diberi awak mantaika asil pansik iya dalam topik ‘Sejarah Awal Migrasi Kaum Iban di Sarawak’ tauka sejarah pejalai bansa Iban ke Sarawak iya nya pemindah ari Kapuas, Indonesia ngagai Sarawak sebedau jeman Rajah Brooke (taun 1400 – 1840).

Dr Neilson siku pemansik enggau orang akademik ti seruran bejalaika pansik senentang parti politik, pengawa bepilih, Iban Diaspora di Borneo sereta pengidup raban bansa Sarawak (Iban) kelia enggau diatu.

Iya kala nulis bup ‘Demokrasi di Pinggiran’ enggau ‘Biografi Dato Sri Edmund Langgu anak Saga’. Iya mega dipilih dalam komiti ti megai tanggung pengawa mansik Kurikulum Sejarah sereta bup teks Sejarah Sekula Sekondari Malaysia (2011-2012).

Dalam Keretas kereja Dr Neilson, iya bejuraika tiga bengkah teori pejalai bansa Iban ti mindah ke Sarawak ti ditulis Benedict Sandin dalam taun 1967.

Teori keterubah madahka Iban tama ke Sarawak nengah Tanjung Datu di Lundu.
Teori ke 2 madahka Iban tama ke Sarawak nengah Bukit Merudu ti enda jauh ari Brunei.
Teori ke 3 madahka bansa tu datai ari Lembang Kapuas lalu tama ke Sarawak nengah menua Kumpang.

Teori tu suah agi dikena raban pemansik alai mayuh penerang ti udah digempuru madahka tebal agi bansa Iban ti mindah ke Sarawak datai ari Lembang Kapuas nengah Kumpang.

Keretas kereja Dr Neilson meratika pejalai bansa Iban nitihka teori ke 3 alai penerang diambi ari tulis raban pemansik ke dulu nyengkaum penulis ari menua luar.

Pejalai bansa Iban

Ku Dr Neilson, pejalai bansa Iban mar dipereti ketegal ti nadai rekod maya Iban berengkah mindah ke Sarawak. Nadai rekod sejarah ti nusui maya ke endar Iban berengkah bejalai.

Nitihka penerang Sutvile (1988), pejalai Iban nya sebengkah pengawa ti enda putus alai bansa tu mindah dalam raban ti mit lalu enda mungkur beratus tauka beribu iku orang.

Entara kebuah Iban mindah iya nya laban ke deka ngiga tanah endur bumai bekebun, ngiga kandang endur ngasu jelu sereta begigaka tanah endur berumah.

Nitihka penemu Empiang Jabu, pejalai bansa Iban dibagi ngagai tiga renggat.

Renggat keterubah iya nya pejalai Iban ke mindah ngagai Bagi Kedua Sarawak urung taun 1540 nyentuk ke 1840.

Renggat kedua nyadi ba Abad ke 18, alai pejalai Iban ngerembai ngagai Lembang Rajang, Katibas sereta Julau.

Renggat ketiga nyadi ba Abad ke 20 iya nya ngerembai ngagai Limbang, Suai enggau Niah (1927), ke Balleh (1920) sereta Lundu (1955).

Renggat keterubah pejalai bansa Iban

Renggat keterubah pejalai Iban suah dikaitka enggau cherita Beji di menua Ketapang, Indonesia. Nitihka cherita ti suah didinga, Beji nguji deka niki ke langit nengah tangga ke digaga ba atas pun entepung ketegal ti deka betemu enggau petara sepengudah ninga ari pedagang Arab (Islam) ke madah petara diau di langit.

Taja pia, Beji enda mujur betemu enggau petara ketegal pun entepung nya tumbang sepengudah diempa indu sampuk.

Sepengudah diau di Ketapang pengelama beratus taun, peturun Beji lalu mindah ke Kayung.

Di kayung, peturun tu betemu enggau pedagang menua Arab ti ransing ngerembaika ajar pengarap Islam ti ngujungka peturun Beji bebelah dua.

Raban ti setuju nerima pengarap Islam mengkang diau di Kayung lalu raban bukai ke enda setuju mindah ari Kayung lalu ngejang ke Ulu Kapuas.

Nitihka Sandin (1994), peturun Beji udah mindah ngagai mayuh palan berengkah ari Ketapang nuju ke Kayung lalu nuju ke Ulu Landak. Ari nya raban tu mindah ngagai Malawi alai sida iya ngentapka pendiau diri pengelama 3 peturun. Udah nya peturun Beji tu mindah ngagai Sintang lalu ke Sungai Kapuas.

Peturun mindah ari Sungai Kapuas nuju ke Sungai Skayam ke diuan bansa Mualang. Ari Sungai Skayam raban tu mindah ngagai Sungai Sanggau.

Di Sanggau bisi genturung pendiau Iban ti chukup besai alai udah nya sekeda peturun tu lalu mindah ngagai sekeda kandang endur di Batang Kapuas. Udah nya pejalai tu dilanjarka ngagai Semitau lalu terus nuju Ketungau alai peturun tu udah ngentapka pendiau diri di kandang endur ti dikumbai Bila Dua Tapang Praja.

Pejalai bansa Iban tama ke Sarawak berengkah ari Bila Dua Tapang Praja di Sungai Ketungau alai tebal agi penau senentang pejalai Iban mindah ke Sarawak berengkah ari kandang endur ngelingi Sungai ketungau.

Cherita Beji enggau siti agi cherita, Tembawai Tampun Juah suah dikaitka enggau cherita penatai bansa Iban (enda direkod) tama ke Sarawak. Enti bansa Iban ditanya ari ni penatai aki ini, Iban tebal agi deka ngaitka diri enggau Beji tauka Tampun Juah. Kedua-dua cherita tu dikena nerangka pejalai bansa Iban kelia menya.

Bila Dua Tapang Praja

Pejalai bansa Iban ti mindah ari Ketapang ngagai Bila Dua Tapang Praja nempuh timpuh beratus taun.

Di Bila Dua Tapang Praja, peturun Beji berengkah begulai enggau raban petara ke beguna dalam pengarap Iban iya nya Sengalang Burung, Sempulang Gana, Seregindi, Seregindah sereta ke bukai.

Ambika Chunto, dia mih endur Serapoh teulihka ajar ari Puntang Raga senentang chara ke betul ngintu pemati.

Udah nya anak lelaki Serapoh ke benama Menggin jadi enggau anak Sengalang Burung, Dara Tinchin Temaga (Sandin 1962). Anak Menggin ke benama Sera Gunting nerima ajar ari Sengalang Burung lalu ajar nya dipeturun ngagai bansa Iban nyentuk ke diatu.

Ari Bila Dua Tapang Praja, bansa Iban berengkah tama ke Sarawak nuju menua Undop, Batang Ai, Skrang, Lemanak, Bukit Balau, Merdang di Samarahan, Saribas, Selepong, Melugu, Gua, Nyelam, Klauh, Engkeramut. Maya pejalai keterubah tama ke Sarawak semua tu bedau ditemu tang dipelaba urung taun 1540.

Di Bila Dua Tapang Praja mega bansa Iban berengkah nemu bekayau alai Serapoh nerima ajar ari siku petara ti madah siti chara kitai nembuka pengawa ngulit iya nya bekenaka pala mensia …berengkah ari nya (beratus taun dulu) pengawa kayau lalu dikemeran nyentukka jeman Rajah Brooke.

Dibali ari: http://www.theborneopost.com/2012/09/25/ibanpenatai-pemindah-bansa-iban
Posted by uchutedung at 6:28 PG

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s