Keling Dalam Litericha Enggau Budaya Iban

 

 
 
 

Sabtu, 11 Disember 2010

Keling Dalam Litericha Enggau Budaya Iban

 

Jaku Pemuka

Ninting taun enti lebuh maya pengerami gawai dia nama Keling suah amat disebut laban nya mih maya sida pengatur program gawai ngatur pekit Keling. Bala nembiak rebak baru kelebih agi sida ke diau ba nengeri nyangka enda tentu nemu sapa Keling dalam litericha enggau budaya Iban. Artikel tu nguji ngenangka pekara senentang watak Keling dalam litericha enggau budaya Iban.

 

 

Nama Keling

 

Dalam litericha kelebih agi ensera Iban, Keling tu ngembuan mayuh nama ensumbar iya. Uji peratika sekeda nama ensumbar Keling di baruh tu.

  1. Keling Datu siku ke pemadu nama mansang, Bujang Jelingau naka kala lenyau enggau orang ke teku Tikal Kajang. Labung panggaika sakai jaku nyerang.
  2. Keling manuk biring ke disabung mali lenyang
  3. Keling manuk biring sempidan arang
  4. Keling Aji Bujang Berani
  5. Keling Aji pemayuh bini, banyak rambang; Kiai Anyai penyambut sakai pemanggai lintang.
  6. Keling Aji berani ati tau serang
  7. Keling gerasi nading, bujang berani kempang

 

Keling sebilik

 

Apai Keling benama Bujang Kelemayang Panas, Tanduk Kijang Berindas, Gemuring gading taing-taing bepelimping pala patung, Cang Celawang, Gila gundi sepit api ke jari ranga-ranga, Bujang Simpang Gading tanduk Kijang Kuning. Indai iya benamaDayang Bemas Beredai enggau tuai, Bereda Berambau Dara (nadai nemu tuai); Lemba Limbang Bulan Begantung, Lemba Limbi Bulan Pegari. Aki iya benama Tambai Ciri Aka Ati Nabau Besirang. Nya alai sida Keling tu ke bendar purih ular tauka nabau.

 

 

Menyadi Keling benama Kemping Padi, mati biak lalu diau ba sebayan. Menyadi indu iya belaki enggau Manggi, manang ke tau ngubat orang. Kenu ku jerita, enti perut orang pansut, iya tau ngadu, enti pala orang belah, disimpai enggau wi labu. Menyadi indu Keling benama Kelindang Tambak Aping, Endu Suloh Bintang Betating, Rikuk Papan Berengung, Endu Rioh Bunsu Keling.

 

 

Bini Keling

 

Keling tu dalam ensera endang orang ke mayuh bini. Dini-dini endur iya belelang iya endang bulih bini. Uji peratika tibak genteran ensera tu;

 

“O buat!” ku iya, “aku enggai agi nyumpit. Aku deka nurun kin deka ngabas indu dara semak umai nyin,”pia ku Keling.

 

“Enti indu nya dua iku, enggi aku iya ke bajik agi,” pia ku Keling.

 

“Barang iya mih buat. Aku nadai jaku. Aku ga endang alah laban nuan belama be semua utai,”ku Laja.

 

 

Nya alai siti ari ensumbar Keling nya Keling Aji pemayuh bini, banyak rambang; Kiai Anyai penyambut sakai pemanggai lintang. Tu sekeda ari bini ke ulih iya maya belelang.

  1. Endu Tepiau bekangau Lemai, Endu Pating Buluh Kirai
  2. Dara Ilam ngembuan geringan gerunung besi, bunsu landak ngalan mangkang gam batu besegi
  3. Endu Sebunsol luli kapas, seketul rambu mas

 

Taja pia ari semua indu ke udah kala nyadi bini Keling lebuh ke belelang semina Kumang Jelidi endu di Pantai Nyatu Tapang ari Gelong Batu Nakong Nyingit Nyingong Nyimbang Nyerabang endang nyadika bini endar tauka bini rasmi iya munyi ku jaku orang kemaya hari tu.

 

 

Pangan Keling

 

Endang ke baka orang bukai, Keling mega ngembuan mayuh pangan ke enggau iya begulai sereta besulu. Tu sekeda pangan Keling ke sama serumah enggau iya ba Panggau Libau.

  1. Apai Karung besi, Bujang Legan
  2. Bungai Jawa @ Bungai Nuing,
  3. Kemping Padi
  4. Laja Lau Mua
  5. Manggi
  6. Pandak Segatak
  7. Pinang Ipung
  8. Puntang Medang,
  9. Renggan.

 

Ari sida ke dirintai di atas, Laja enggau Bungai Nuing ke suah amat disebut dalam ensera Keling. Sempurai Gundai ba sekeda menua baka orang Balau suah agi nyebut iya enggau nama Bungai Nuing. Pungga enggau Seguntang suah di cherita kediri tang nyangka tau mega iya nya Keling iya empu.

 

 

Menua Keling

 

Nitihka ensera, Keling tu mih asal orang ba Pulau Borneo. Ba Pulau Borneo tu mih sida bisi begulai enggau bala Iban lebuh sida Iban tu ngenataika diri dia. Sida ngaga genturung pendiau ba ulu Sungai Kapuas, Kalimantan Barat. Sebedau nya sida ngentakka pendiau diri ba menua ke dikumbai Semitau Tuai.Ari Semitau Tuai sida terus mindah sampai ba menua ke dikumbai Tampun Juak. Lebuh sida ditu, mayuh amat pekara ke nyelai nyadi ti baka penyakit ke balat ngerekai ngujung mayuh bala sida mati. Kenu ku jerita bala sida ba genturung pendiau tu kala diserang lelabi enggau ikan kenyulung.

 

Dikena ngelarika diri ari penusah tu, Keling enggau Tutong nguluka rayat seduai pindah ngagai Nanga Sekapat, peti ai Kapuas. Lebuh maya ke diau ditu mih sida nitihka jerita mitos, laya bisi nyadi ketegal ari Laja enggau Sempurai. Sempurai ketegal pemangah enggau penyegak iya suah amat belayaenggau petunggal iya Laja ke ngujungka Keling mutuska penemu beserara enggau bala Iban lalu mindahka diri ke langit.

 

 

Keling pindah ke langit lalu mai menua iya Panggau Libau Lendat Dibiau Takang Isang. Ditu Keling ngentapka pendiau diri enggau bala rayat iya ba menua ke dikumbai Buluh Aur ba nanga Sungai Panggau. Nama menua Panggau tu mega disebut enggau mayuh nama baka ke bisi dirintai ditu;

  1. Panggau Libau Lendat Dibiau Takang Isang
  2. Pangau Libau menua ke sigi luchak lunyau kena biau takang isang
  3. Panggau Ragai ke dedinggai bintis langgai kechuai nandang
  4. Panggau Ragai bintih langgai kempat tiang

 

Menua Keling tu kenu ku jerita nya ba pintu langit entara dunya enggau sebayan. Nitihka ensera, sida Keling tu berumah ba gentiring langit kuning pandang perenching nyang jera. Lebuh ke udah mindahka diri ditu bala sida Keling nadai agi nyadi mensia tang bebali nyadi ular.

 

 

Pemanjai rumah panjai sida Keling nitih ku cherita nyau sehari tajai terebai ngakak ngelayang, rumah pandak enggi sida puting sesetak nyilung remang. Nitihka jerita, temuai ke deka nemuai ngagai bilik Keling mesti mansa 170 buah pintu sebedau ngenataika diri ba bilik Keling.

 

 

Bisi mega jerita nyebut kebuah Keling pindah. Keling belaya enggau pangan diri berebutka pengaruh pesaka tuai. Sida belaya enggau ApaiSabit Bekait berebutka pengaruh batu pengait mesai lilit labung kanggan. Nya alai Apai Sabit Bekait lalu pulai ke tisi langit bekuta rapit baka tumbit pintu belulang.

 

 

Bisi sekeda belaya enggau Keling berebutka taring tengiling tau ke aring simpai lengan. Nya alai mindah ga Keling lalu berumah di Tinting Panggau Libau Gegiau Takang Isang, di tuchung Engkeranji Padi Richah Rami munyi bala pengabang.

 

 

Watak Keling

 

Lebuh ke ngangkatka diri bujang, Keling tu endang sigat, kering sereta ngembuan pemerani. Kelimpah ari nya, iya mega ngembuan kuasa tau ajih lalu ulih bebali nitihka deka atilebuh ke belaban enggau bala munsuh. Keling mega suah mali diri nyadi orang bukai. Dalam ensera Adi Pau enggau Engkeratong Ayam Raja terang bendar nunjukka Keling tu bebali nyadi orang ke jai gamal.

 

 

Lebuh ke ngangkatka diri bujang, Keling baka orang bukai mega belelang ngagai menua bukai begigaka penemu enggau pemandai. Belalauka bukti tu nyemetak bendar enti bala Iban deka nambahka penemu sereta pengelandik diri sida mesti bejalai ngagai menua bukai ngiga peneleba.

 

 

Keling tu orang ke bisi penemu, pemintar sereta bisi pengering ati lalu bisi pengerajin.Iya megai pengelurus lalu endang enda kurang pengasih ke mensia mayuh. Iya mega landik bejaku lalu megai basa sereta lalu nemu mega semua adat enggau tusun jalai adat asal. Nya alai ba menua iya empu, Keling tu endang tuai sida serumah.

 

 

Ketegal pemerani Keling suah matak kayau lalu nyadi tuai kayau lebuh ke ngayau ngelaban bala munsuh. Ketegal nyadi tuai kayau ba menua iya, keling dikangauka orang raja berani tauka bujang mali balang nadai kala sabau dalam kayau nadai kala balang dalam perang. Nitihka ensera, Keling tu keterubah pegari bekau sida menang lebuh sida ngayau ke langit ngelaban Apai Sabit Bekait.

 

 

Kaul Keling enggau raban bansa Iban

 

Munyi ke udah diterang tadi Keling beserara enggau raban bansa Iban ketegal beberapa kebuah. Ngajar bala Iban bemain tabuh gendang rayah. Nya alai ketegal pengerapit kaul Keling enggau bala Iban iya endang suah amat dikangau ngabang lebuh bala Iban bisi pengerami gawai.

 

Nya alai enda mih aku layu nyebut tuai antu, tuai orang di Gelong Batu Benang enggau tuai orang di Panggau Libau gegiau Takang Isang …

 

Ni Nading Panas Kuning,

Baka perendang bunga besi,

Nya ga Sepit Api Gila Gundi,

Pengetis kaki simbang terabang,

Bejalai selilit nisau langit besabung gelung.

 

Nya berada apai nua Keling Aji,

Ke berani tau serang,

Tuai orang di Panggau Libau,

Menua luchak lunyau,

Kena biau jila isang.

(Pengap Gawai Burung – genteran ke ngerintaika bala tuai antu)

 

Dalam biau pengabang Maya Gawai Pangkung Tiang, Keling mega bisi dikangau. Peratika chunto ba baruh tu.

 

… ukai enda kita ke duduk berimbai,

Diadang kami kena imbai

Raja Selempandai seduai Biku Bunsu Petara

Lalu kening kita kena perening Keling seduai Laja…

 

Siti agi tanda bansa Iban suah ngangau Keling maya gawai nya maga Gawai Sakit. Peratika chuntotu:

 

…nait ke Bukit Lubang Sawa,

Numbuk di tuchung Sandung Gemala ke sengenda tampak terang,

Beseberai enggau batu jerua pansa beras kuning,

Pandang perenching jalai raya,

Di bandung engkeramba gaga Keling,

Ke bepencha landik beladang,

Ke sasipa ngaki kuta.

 

 

Nya alai pun raban bansa Iban nemu adat miring endang nunda pengawa sida Keling ke berumah di gentiring langit kuning pandang perenching nyang jera. Kelimpah ari nya orang ke berani berambunka nyawa nyadi soldadu enda mudah dialahka sengapa enti bisi dibantu Keling. Nitihka pengarap Iban kelia, orang ke mujur betemu enggau Keling dalam mimpi endang deka berani baka Keling.

 

 

Dalam bup Tiga Belas Bengkah Mimpi, Benedict Sandin, BLB nyeritaka senentang sekeda sida bujang berani Iban baka Dana beensumbar Bayang, Orang Kaya Pemancha Nanang enggau Unggang lebor Menua endang bisi ditulung Keling. Nya alai sida tu endang diketakutka bala munsuh.

 

 

Penutup Jaku

 

Nya mih sekeda penerang ke uji dikunsika ditu senentang watak Keling ke bisi ayan dalam litericha Iban sereta mega dalam budaya Iban kelebih agi lebuh ke ngintu pengerami gawai. Taja pan kenang tu agi rapas sereta agi bisi penyaru tauka penyalah ke disadang sigi bisi ayan, penulis ngarapka iya agi ulih nyadika penyanding penemu ngagai bala pemacha kelebih agi sida ke nembiak rebak baru.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s