Lumbong Basa Pemati Pungka Lelaki Iban

Lumbung Basa Pemati Pungka Lelaki_Iban

Iya mega sebengkah jalai masa bala lelaki ke pegari nama mungkal menua, matak bala pindah

Bala kitai Iban siti bansa dalam dunya ke ditemu ngembuan mayuh macham adat enggau main asal lalu semua utai nya nyelaie ari enggi bansa bukai ba menua Malaysia tu empu enggau orang ari menua tasik din.

Taja pia, sekeda raban bansa ba menua bebukit tinggi baka di Tibet, Mongolia, Taiwan, Pilipin, sekeda menua Selatan America baka Peru, Bolivia, Chile, Brazil enggau dua tiga iti menua ba kandang tasik besai Pasifik, bisi udah ditemu ngembuan chura sereta enggau ukir tenun kain baju enggau pua ti nyauka sama sebaka enggau enggi kitai Iban. Mina tuju iya bisi bida mimit.

Lalu ukai nya aja, laban mayuh agi utai bukai ke sebaka enggau enggi kitai Iban, baka jalai pengidup sereta mega sekeda main asal. Ambika banding, baka ba menua Pilipin, bisi siti raban bansa orang menua nya ke empu jaku sebaka enggau jaku Iban kelimpah ke mega ngembuan chura kain enggau pua tenun nyau ka sebaka enggau enggi kitai Iban.

Nyadi siti agi pengawa tauka adat asal ti sebaka enggau enggi kitai Iban nya jalai ngintu pemati, iya nya ngelumbung. Ukai bansa sida tu ajam tang sekeda bansa ba Amerika Selatan udah ditemu bisi ngintu pemati aki ini sida kelia ngena jalai bakanya.

Ba menua kitai empu, kelimpah ari bansa kitai Iban, bansa Orang Ulu baka Kayan, Kenyah, Berawan enggau sekeda bansa ke mit-mit tauka bansa ‘minority’ ba entigis sungai Batang Rajang enggau Baram, bisi mega ngelumbung aki ini sida kelia taja pan kemaya haritu adat nya udah diketuka, iya nya nadai dipejalaika agi.

Nyadi kenang aku dalam lambar tu, datai ari penemu aku empu, beduduk ari tusui orang ke tuai dulu suba sereta mega ari pansik.

Nunda tusui sida niang ini aku Kejuang Meling, aki ichit aku Tawi Bungin, iya nya orang ke diangkatka aku nama, nya siku ari orang ke udah diberi basa mati dilumbung.

Lalu pia mega, dulu ari nya, apai iya Pengulu Bungin Anya endang diberi basa mati dilumbung. Kemayatu, lumbung seduai agi dipeda dedinggai ba atas tebiang renjam Lubuk Gagam muak ari kanan mudik Krian ari ulu Jembatan Krian diatu. Lubuk Gagam tu endang siti ari lubuk ke beberita mayuh baya ba Batang Krian.

Keba bisi sema jaku orang ‘Nyelam ba Lubuk Gagam, pansut ba Lubuk Mamut’. Tu nyema pemayuh baya entara dua iti lubuk nya ke numbas penyauh ari pangan. Mamut tu ari ulu Gagam.

Nyadi lumbung seduai nya endang mengkang dintu kami sebilik nyentukka diatu, laban endang bisi jalai meruan nengah darat, iya nya nyimpang ari jalai Kaki Wuong/Babang, siti simpang jalai enda jauh ari Jembatan Krian.

Siti penyelaie mati dilumbung tu, bala lelaki ke diberi masa pemati dilumbung nya endang dilumbung ba tanah diri empu, ukai ba pendam lalu enda begulai enggau sempar tauka pendam bala mayuh.

Pelaba aku bala pemacha, nyangka bisi enda tentu nemu nama utai ke dikumbai lumbung sereta mega nama reti pengawa ngelumbung tauka belumbung.

Nitihka siti kamus jaku Iban An Iban Dictionary ari karang AJN Richards edisi 1981, reti jaku ‘lumbung’ tu ‘rarung tauka sentubung ke enda ditumbak tang disimpan tauka ditempara dalam siti langkau tauka rumah mit’.

Bakanya mega Dictionary of Sea Dayak karang NC Scot edisi 1956 meri reti lumbung tu ‘siti sentubung endur engkah bangkai enda ditumbak tang disimpan dalam siti rumah tauka langkau mit’. Sentubung nya semina ditempara begantung ari tanah.

Nyadi pengawa belumbung tu ukai semina dikereja kitai Iban kelia tang bisi mega dikereja raban bansa bukai di menua kitai ditu sereta enggau di menua tasik maya nya menya tauka dulu agi munyi ke udah disebut aku dulu tadi.

“Ba raban bansa Iban, semina orang ke udah bulih nama tampak rita bedengah, nyadi pungka laki tauka tinggi pendiau bulih reta tengkira aja tau diberi basa mati dilumbung.

“Bisi mega orang ke dilumbung nya laban iya ketuai mungkal menua tauka sida ke udah pegari nama ba siti-siti pengawa

“Kitai Iban kelia meri basa ngelumbung aki ini ke patut dilumbung ngichaka semengat sida nya agi ulih ngemataka bala uchu ambu sida ke agi idup,” ku aya tuai aya Musa Giri lebuh ke bekenang enggau penulis pasal pekara tu apin lama.

Musa tu siku ketuai Iban ke kala megai pengawa besai ba opis perintah, nyengkaum nyadi Chermin HDC (Housing Development and Commission) ngagai pun taun 1990an menya. Diatu iya ngemeranka pengawa dagang.

“Nyadi laban iya enda ditumbak, orang tuai menya arapka semengat sida aki ini kitai senang ngemata sereta nulung kitai ke agi idup,” ku Musa ke begelar Remaung Raras Entegah Entara Menua. Aki Musa, Subung Bran tu sigi pungka laki menua Kedap kelia lalu bensumbar Kala Nyepit Naka Pemisa-misa, Bunga Parapenit Ka Dujung Indu Dara. Subung tu siku ari uchu tudah Anya ‘Lebur Menua’.

Pengarap lama orang tuai kelia, iya nya enggi bansa kitai Iban munyi ke udah disebut dulu tadi, iya nya ngelumbung orang ke parai, udah bulih sukung ari siku intelektual bansa Jipun penama Motomitsu Uchibori dalam siti thesis Doctorate of Philosophy (PhD) iya The Leaving of This Transient World: A Study of Iban Eschatology and Mortuary Practices (1978).

Uchibori madahka pengawa bebasaka orang mati ngena jalai lumbung nya siti jalai ngemesaika pengingat enggau guna orang ke udah nadai, udah lesi bebadi laya sulai.

Ngena jalai lumbung tu, mensia ke agi idup, ke ditinggalka orang ti parai nya sigi ngichaka semengat orang ke parai nya agi ulih tinggal lama begulai sama enggau sida, enti enda ulih selama-lama.

Laban lumbung nya ngundan bangkai orang ke udah parai, kitai ke agi idup tu agi ulih ngingat sereta begulai enggau sida lebih ari sida ke udah ditumbak lalu diau di Sebayan, pia ku penerang ari Uchibori.

Mati belumbung tu ngering sereta balat agi nyaguka peninggi penuduk lelaki ba dunya kitai Iban. Reti nya, semina lelaki aja ke dilumbung.

Dalam reti ke bukai, lumbung ungkup lelaki aja. Lalu lelaki ke mati sereta diberi basa dilumbung nya ukai sebarang lelaki, tang lelaki ke udah pegari nama nyadi pungka laki udah bedengah tauka sida udah nyadi tuai orang mungkal, berimba menua, lalu matak orang mayuh pindah mungkal menua baru.

Sida ke udah nyadi tuai megai menua, ngempung nembiak redak mayuh pan tau ga diberi basa belumbung. Ambika banding niang aki tuai kami Pengulu Bungin Anya, dilumbung

Dibali ari Ulih Anya Kedap,Borneo post,2009

http://bhsiban.wordpress.com/artikel-bahasa-iban/

One thought on “Lumbong Basa Pemati Pungka Lelaki Iban

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s