Nembiak diatu patut temegah ka bansa diri

Nembiak diatu patut temegah ka bansa diri
Nadai kebuah sida enda ransing sebagi ari bansa ti kaya penemu, adat, main asal

KUCHING: Nama tanggung pengawa sastera tauka main asal ngena jaku kitai Iban dalam pengidup kitai kemaya haritu? Nemu kita? Ni penyampau iya? Mayuh; bisi ga positif enggau lalu bisi mega negatif.

Kitai mesti nemu iya nya sastera kitai bansa bejaku nyengkaum dalam semua pengawa: entang lelaki enggau indu, anembiak enggau orang tuai, kitai bumai enggau pemesai, orang ke kereja enggau sekeda kompeni, kaya enggau miskin, penyayau enggau pemenchi, jadi enggau sarak, perang enggau bebaik, bepechah enggau beserakup, enggau mayuh agi.

Kitai mega nemu sastera mai mayuh macham mesej. Taja pia, sastera nya meh pengidup ti enda ulih diseliah, nama agi dibuai.

Sastera kitai Iban? Kitai antara etnik di dunya tu ti mayuh macham adat enggau main asal. Kitai Iban kaya sastera. Sastera nya siti asil pengelandik kitai bansa ngena leka jaku ti nyadika pekara ti deka dipadahka. Sastera nya siti pekara pasal adat enggau main asal, ulah, runding sereta penemu enggau pendiau kitai.

Taja pia, gaya sastera ulih berubah nitihka jalai rebak enggau jeman pendiau mensia. Tang meh pengerembai sastera dikuasa mayuh macham pekara, baka pengerembai sosio-ekonomi, sosiopolitik enggau pemaju bansa kitai di dunya tu.

Sastera enggau leka main asal kitai Iban tumbuh maya sigi udah bisi tusun dalam jaku Iban, iya nya jaku asal bansa ti pemadu besai sereta ngerembai di Sarawak. Jaku Iban tu sama nyumbuk serentak enggau pendiau Dayak Iban di Indonesia. Jaku kitai Iban udah bisi di dunya tu kenyau ari urung 2500 ngagai 5000 taun dulu kelia.

Nitihka penemu Professor Derek Freeman, sastera kitai Iban lebih kaya ari sastera Greek (Yunani) maya jeman Homer. Jaku Freeman tu udah nyadi bukti ti nyata maya mayuh macham gaya sastera bejaku Iban ditemu ari turun menurun dataika seharitu. Bisika kitai nguji nengkebang sastera dalam pengidup kitai seharitu?

Kita nemu, sastera Iban udar beurat ari mayuh macham penemu baka puisi – dalam main asal Iban baka jaku begeliga, jaku ansah, biau, pantun, sanggai, dungai, jawang sereta mayuh main benyawa baka pengap, renung, sugi, timang jalung, pelian – enggau ensera, baka reti mitos, legenda, cherita ngerindang ati, ngasuh ketawa enggau ensera pasal jelu ti dikena ambika lalau enggau ajar pendiau kitai di dunya tu.

Agi kelia, sastera kitai Iban nyadi ka pengidup ti bepanggalka adat. Ti nyadika penti pemali sebedau ngereja sekeda pengawa.

Kitai Iban kelalu kaya enggau main asal benyawa. Tu sebaka enggau lagu puisi ti udah didinga kitai ba radio tauka maya hari gawai datai. Tauka dilaguka sida tuai maya bisi pengerami. Bala pemacha tentu kala ninga main asal benyawa baka renung, timang jalung, pelian, sabak, jawang, ganu, sugi, pengap, dungai, pantun, sanggai, jara enggau ramban sereta main benyawa bukai mega.

Lalu mayuh macham agi penemu enggau main asal rayat kitai Iban ti makin ditinggalka. Sida tu nyengkaum penemu baka tusut, sampi, biau, jaku ansah, jaku tuai, jaku muka kujuk enggau begeliga. Lalu kitai mega bisi entelah ke endang chukup manah didinga kena ngelalai reti utai besilup.

Kita nemu, maya Raja Brooke merintah menua Sarawak, sastera kitai Iban udah ditulis sereta dipansik enggau chukup penalam.

Sastera kitai udah ngerembai ke menua tasik lalu bulih puji ti chukup tinggi. Sida ke udah ngaga pansik tu iya nya, A.W. Stonton, W. Howell, J. Derek Freeman – penulis Anya Kedap kala begulai enggau Freeman di Pulau Pinang dalam taun 1975 – Carol Rubenstein, Baughman, Erik Jensen enggau mayuh agi. Lalu mayuh bup tulis sida tu tau dipeda ba Mijum Sarawak.

Mega,sekeda bup sembiyang kristian ditemu nulis sastera kitai Iban, baka Jalai Pengidup 1, Penyanggup Lama enggau Jalai Pengidup II. Siku orang putih AW Stonton mega udah ngaga jerita pandak Ensera Manang Gagak.

Jaku kitai Iban ngerembai mimit sepengudah menua kitai merdeka. Pengerembai sastera kitai Iban ulih dibagi dua: ari taun 1963-1977, ti disebut rambau Biro Sastera Borneo lalu ari taun 1977 sampaika seharitu, disebut rambau Dewan Bahasa enggau Pustaka.

Maya tu meh jaku Iban bisi dipelajarka dalam sekeda sekula ti mayuh anembiak kitai Iban. Jaku Iban deka nyadi pelansar ngambika anembiak bansa kitai ngelala jaku Iban sereta adat main asal kitai Iban.

“Utai ti nyadika penyekat, bisika anembiak kemaya haritu nemu reti sastera aki ini kitai? Ni pemayuh anembiak kitai bansa ti nemu pesaka peturun aki-ini kitai ti besangkut paut enggau sastera kitai Iban?” kenu ku siku profesor ari Unimas ke enggai nama iya disebut ditu lebuh bejuraika pekara tu enggau siku ari penulis.

Mega, bisika bansa kitai Iban di dunya Sarawak agi kiruh enggau sekeda sastera kitai bansa? Dini kitai nyimpan sastera kitai Iban dalam pengidup kitai seharitu?

Pengidup kitai balat bendar bekaul enggau adat kitai. Ukai enda diasai, sastera kitai pengidup kitai.

Taja pia, semina kitai enggai kiruh lalu enggai beduli ketegal kitai enda ngaku diri kitai bansa ti tulin laban ti dikungkung adat basa kitai.

Kitai ngasaika diri nyelai ngembuan bemacham chara deka bejalaika sekeda adat. Kitai ngasaika diri ditanchang lalu malu ngembuan sastera ti nyelai ari bansa bukai. Kitai enggai ngaku.

Salah sapa? Engka salah bansa kitai empu? Salah aki-ini sereta apai indai kitai empun laban ti mutuska diri ari pengidup peturun bansa kitai.

Angka salah rayat ti enda seati seudah bisi ngembuan agama? Angka salah bansa kitai laban ti udah bepolitik lalu enda ngelala pendai penatai diri empu? Salah sapa ke bendar? Sapa ti ulih ngetanka sastera kitai ti unik sereta nyelai tu. Sapa ti deka ngetanka sastera kitai ti chukup tebilang tu. Sastera kitai deka punas enti enda terus dikemeranka.

Lalu pia mega bansa kitai ti tulin mega tau nyadi punas enda temu tunga dudi ila enti nembiak rebak baru diatu majak ngejang diri ari penemu asal bansa diri. Tanya kitai empu sekalika kitai temegah ati ngembuan penemu enggau main asal ti jauh kaya ari mayuh bansa bukai di dunya tu.

Dibali ari Ulih Jaya Ramba,Borneo post 2009

http://bhsiban.wordpress.com/artikel-bahasa-iban/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s