Pengawa asal Iban nabar burung ngau mimpi

Pengawa asal Iban nabar burung, mimpi

Orang dulu kelia makai mimpi, burung jai tauka belian nyeliahka penanggul dua bengkah nya

Kati kala kita ninga pengawa orang bejadika mimpi enggau burung? Ba menua kami kelia, enti orang bisi jai mimpi, jai burung, semua utai ke jai tau dipenyadi asuh manah, laban entara taun 1960 ngagai pun taun 1970 menya, agi bisi orang tuai ke nemu makai burung enggau makai mimpi.

Reti makai burung nya muai pemali burung ke jai ngena jalai intu asal kitai Iban. Lalu bakanya mega ngintu mimpi nya lalu ngasuh iya jadi manah, enda ngachau pengidup orang ke bemimpi tauka sapa ke dimimpi iya. Tau ga pengawa tu dikumbai bejadika mimpi.

Ba rumah kami kelia bisi siku aki aku ari bilik sepiak ke tebilang laban nemu – disumpah antu – bejadika mimpi enggau burung.

Aki aku nya penama Ngelambai anak Rambuyan, sekali petunggal enggau ini aku Kejuang anak Meling, udah tebilang laban selalu diasuh sereta diambi orang genturung menua kami dia, bejadika burung enggau mimpi.

Ngelambai, ke mati kurang lebih dalam taun 1969 suba, nya ukai Manang tauka Lemambang. Iya nadai penemu bukai kelimpah ari ke disumpah antu sidi bejadika mimpi enggau burung.

Laban ke balat rindu nyabung manuk, niang Ngelambai menya gagit amat nginang manuk datai ka enda tebasuka tajung iya ngagai setengah taun.

Nya alai selalu ambika sema bala kami serumah madah enti direndam tajung nya, mati magang ikan serantau ai. Tang enti lebuh makai burung nadai orang ibuh ka tajung iya ke nyau bau lantuh laban mina iya aja ke bisi penemu nya.

Kelimpah ari Ngelambai, siku agi orang ke nemu makai burung enggau mimpi ba menua kami iya nya Manang Chundi, ari Munggu Embawang kulu agi ba Batang Malupa. Nyadi laban Chundi tu ke manang, nya alai jalai iya bejadika mimpi enggau burung bisi lain mimit ari enggi Ngelambai.

Ba pengingat aku, lebuh orang nganjung mimpi enggau burung asah dipejadika Ngelambai, jalai iya bejadika dua bengkah utai ke enda manah nya, sama sebaka.

Orang ke jai mimpi enggau burung diasuh nusui penyai burung enggau mimpi sida. Udah nya Ngelambai lalu ngasuh ngikis kukut kaki jari orang ke empu burung enggau mimpi nya. Buok orang ke jai mimpi enggau burung nya mega kerat mimit lalu dipegulai enggau kukut tadi, tabak ngagai mangkuk berisi ai lalu tichau.

Udah nya lalu dibiau iya enggau manuk. Iya ke miau nya besampi minta ari petara ngasuh burung enggau mimpi nya jadi manah jadi betuah belimpah.

Ngelambai, udah abis nya lalu ngirup ai champur buok enggau kukut nya tadi kena bejadika mimpi tauka burung.

Kami sebilik suah ga ngasuh aki tuai nya bejadika mimpi tauka burung.

Naka ke ditemu semua utai ke jai nya nadai jadi pengachau udah bekau dipejadika Ngelambai. Tau nya dikumbai sidi meh laban udah ngasuh nadai apa nadai nama.

Nyadi kelimpah ari Ngelambai, bala bukai ba batang ai kami mega selalu ngasuh dua iku manang ke ulih bejadika burung enggau mimpi ngena pelian seduai.

Entara Manang Chundi enggau Manang Embas, suah agi bala mensia ngambi Manang Chundi laban iya ke deka agi enggau betundi sereta sidi.

Bala ke datai ngagai Manang Chundi menya selalu ngasuh iya bejadika mimpi.

Endang ka baka, orang ke jai mimpi nya diasuh ngikis kukut kaki enggau jari lalu tabak ngagai ai ke udah isi setengah ba mangkuk lalu ka tambah nya buok orang bemimpi nya mega kerat mimit champur begulai enggau kukut nya tadi.

Utai nya tadi lalu disua ngagai manang, ke lalu muka tudung lupung iya, ngambi kandi buntil sarang penchelap, sarang ubat pemuai utai mali, lalu dikirahka iya ba mangkuk nya. Manang pan lalu ngirup nya dikena iya muai mimpi jai.

Udah nya iya lalu berengkah bepandang. Laban menya ke jarang ngena lampu gis, kadang manang selalu bepandang ngena kelita.

“Aku bepandang tu kena ngiga reti pelian lemai tu,” ku niang Manang Chundi menya lalu minta kelita nya beri semak agi ngagai iya laban tudah tuai ke numbas pengelansik.

Udah api kelita disua semak agi ngagai iya manang lalu nguing baru ngagai lupung iya lalu ngambi uyuk mit siti, sarang batu karas iya. Dia iya lalu bepandang. Bala orang ke ngulu iya dia ngenjing nadai engkeretik meda pemanah batu karas lalu meratika pengawa iya ke bepandang.

“Manah agi nuan belian ka mimpi nya,” ku jaku orang ke empu mimpi jai nya.

“Au, belian meh tu lagi. Nyadi dua iti pelian malam tu. Terubah tu pelian pedis lalu udah nya baru ngambi semengat,” ku manang madah ngagai sida ke ngulu iya dia.

Lebuh ke belian pedis nya manang pan lalu belian ngelumu semengat sida ke jai mimpi nya sebilik.

Orang pan lalu berengkah ngadu perengka kena manang belian. Laban ke belian muai mimpi jai, manang enda tau enda ngena Pagar Api, iya siti bengkah atur pelian ke ngambi lalu ngelumu semengat ke udah tesat tauka tepejuh jauh.

Nya alai ba atur pelian, Pagar Api nya besai amat reti kena nagang semengat limpang jauh ngagai menua sepiak kin.

“Nyadi mimpi ke jai enda tau enda ngena pelian pedis nya baka mimpi tesat, mimpi ba langkau kediri sereta mimpi ba menua Sebayan,” ku Majit Chundi lebuh ke ditanya penemu iya pasal pengawa belian.

Majit tu petunggal aku ke diiru niang manang Chundi suba. Nyadi iya bisi nemu belian mimit tang enda kala bebangun nyadi manang, lalu endang enda ngemeranka pengawa belian taja ngembuan mayuh penemu pasal pengawa nya.

Enti belian Pedis, orang sebilik nya dipinta nganchau tikai mit alai belian. Tikai nya enda tau tikai bebuah tang mina anyam dua, anyam tiga lalu anchau ba tengah ruai.

Udah nya lalu duduk ka kebuk numbas pemesai ba tikai nya, engkah ka batu enggau engkah ai dalam nyin sereta engkah beras tujuh leka. Beras nya enda tau beras patah.

“Orang pan lalu nentangka kayu ari tiang tempuan ngagai tiang panggau. Dia alai nanchangka enteran sangkuh tauka berayang. Mata sangkuh tauka berayang tutuk ba dalam kebuk nya tadi. Nyadi nya kumbai orang pugu pagar api,” ku Majit nampung jaku iya.

Nyadi utai ambi ka pagar api nya kemali tauka buluh. Enti iya kemali pun iya tetak ngambi sejengkal lalu nya gaga ka tangga semengat. Tangkal ngambi tujuh iti tang siti tunsang, siti enda lalu digembarka ba batang iya nya tadi, ditanchang ba sangkuh nya.

Manang mega minta dekuh diketak lalu dipansutka sida ke dara, tang enda tau disandik.

Nya alai ku niang Manang Chundi menya: “Kita anang malu ngetak nya. Tang lebuh mai pansut kitu, bai binching aja, anang nyandik laban mali ku jaku tuai, enggai ka lebuh kita beranak ila, lanjut tusu.”

Jarang enda engkakah ketawa bala ke bisi dia ninga jaku bungah Manang Chundi menya. Ninga bakanya enda ga bala sida ke dara lembau ngetak dekuh. Tang bala nembiak ke mit agi mayuh enda nemu utai ke kumbai dekuh.

Udah sikap magang utai di ruai sida ke dara dua iku pan lalu pansut mai dekuh ke ruai. Nyadi orang bukai enda tau bejaku tauka nanya seduai nya. Lebuh datai di ruai seduai nya lalu disambut bujang ke ngaga pagar api.

Manang pan lalu ngasuh orang ngelempai ubung ke jadi ka tangga semengat, ba kayu pagar api nya. Kain bebuah jadi kembai bunga engkah dia ga. Udah nya baru manang madahka jalai pelian iya, sereta lalu berengkah belian.

Udah badu belian, lalu bulih semengat, nya baru iya ngelam semengat nya ba bubun orang ke dipelian iya nya.

Naka ke udah, nadai ga kala ninga orang ke udah dipenyadi iya mimpi bulih penusah tauka bebadi tekala nya. Nyadi pengawa bejadika mimpi enggau burung jarang bendar dikemeranka bala Iban diatu, laban orang ke bebatang nemu ngereja pengawa tu nyau udah nadai agi. Iya mina tinggal nyadi pengingat aja.

Dibali ari: Ulih Anya Kedap

http://bhsiban.wordpress.com/artikel-bahasa-iban/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s