PELANDAI

PELANDAI

 

Penerang:
Tuju lekamain tu sebaka enggau lekamain ti bukai. Bisi besibil mimit laban leka main tu dikena bebuti ngelalaika sekeda utai nitihka ati Tukang Pelandai empu.

 

Chunto Leka Main Pelandai

 

Aih….menyadi
Aku deka bambaika Kumang, menyadi Dayang Puyu,
Bejuluk Jambu Datai ari ulu enggau dan-dan
Deka bambai ke Kumang Dayang Menchi
Bejuluk Munti datai ari ili enggau perugan-rugan

 

Uji giga ke aku nya menyadi
Ngagai Segera Pangka Pasang
Uji ansau ke aku nya menyadi
Ngagai Sebuau Seagang Agang
Aih…Uji padah ke aku menyadi
Dini ai endur iya mandi besungga ngela
Dini tanah endur iya berumah mula ada
Dini ai endur iya mandi
Mesai belungkin burit jalung?
Dini tanah endur iya berumah
Mesai tempukuk belakang raung?
Menua iya di Kerimpak Batu Lemak
Baka kupak umbang ban
Di Terumbu Jerangku Babai
Ai besai pandi pelangkan
Kati nya ukai Raja Janggut nya menyadi
Pandai surut bejalai ke belakang?
Ukai Tuan Atan nya menyadi
Ganggam lengan beduri berang?

 


Aih…menyadi
Aku deka bambai ke Lulung Bunsu Tanjung Nyurung
Bebabanung baka benung Tajau Menaga
Aku deka bambai ke Kumang Dayang Beremas
Mua begerias baka panchar bulan perenama
Aku deka bambai ke Kumang Dayan Kelinah
Selalu besembah di mua Petara
Aku deka bambai ke Dara Lemuk
Ke selalu duduk nunga Raja
Uji giga ke aku nya wai menyadi
Ngagai Segera Pangka Pasang
Uji ansau ke aku nya menyadi
Ngaga Sebuyau Seagang Agang
Aih…uji padah ke aku menyadi
Dini ai endur iya mandi besungga ngela
Dini tanah endur iya berumah mula ada
Dini ai endur iya mandi
Mesai belungkin burit jalung?
Dini tanah endur iya berumah
Mesai tempukuk belakang raung?
Menua iya, menyadi
Di padung begantung baruh hari
Betilamka ruman daun padi
Di padung begantung baruh dunya
Betilamka ruman padi puya
Kati ku de bangat enda nemu nya menyadi
Nya meh ke dikumbai orang Kumang Dayang Demit nya menyadi
Jumpit burit duduk kekalik
Kumang Dara Lulung nya menyadi tugil tumbung duduk gegilik

http://www.moe.gov.my/bpk/pNp/jaku_iban/lekamain/invokasyen/pelandai.htm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s