Renung Semain ngau Sakit

RENUNG

Penerang:
Leka main Renung tu bisi 2 bagi iya nya renung dalam bansa Leka Main Pemerindang enggau bansa Leka Main Invokasyen. Sebaka enggau leka main Sugi Sakit leka main Renung bansa Invokasyen tu mega dikena ngangauka petara datai ngabai pengawa ti dintu. Leka main tu suah dikena berenungka manuk, utai ti ditanam enggau perau kejang deka belumba (Regatta).

Chunto Renung

a. Renung Namaka Tuah Pagi
b. Renung Sakit

RENUNG NAMAKA TUAH PAGI


Penerang:
Renung betama pagi tu dikena namaka Petara Tuah udah bekau nimang semalam-malam tadi. Antu Tuah dialuka enggau piring ke udah dirintai benung bilik enggau tajau tuah udah direbah dibap enggau pua kumbu nunga ke ruai, sereta enggau ai tuak ke udah dirintai di atas papan dalam jalung ke ngundan leka marik tauka duit siling.


Gurah segurah ai pansut ari alam tanah,
Ngangkatka urat nyaguka rau,
Pantai ngampuhka..aa .. pantai.

Gurung segurung pasang di Batang Sadong,
Ngampuhka pun suntai ,apung tesuntai.

Nya baru ada kelah sekelah,
Kusing indu entambah lari ari menua tisi,
Pindah ngagai menua tengah,
Napatka buah nyamai lengain aiih… nyamai.

Rintau serlntau meh emperau indu semah,
Semaya dia a mudik simpang Batang Rajang panjang panjai reregah,
Mudik simpang Batang Ngemah,
Keran ka napatka buah ensurai buah aiih..buah ensurai

Sapa meh anak temuai ke datai tumu pagi lam-lam,
Nyerumba kukuk manuk jelayan
Nyerumba seruah serenti babi nyepan,

Bangat tak legam-legam ngena kelambi baju hitam.
Baka kaban burung rambai,

Sapa meh anak temuai ke datai tumu pagi hari raya,
Nyerumba kukuk manuk banda,
Nyerumba seruah serenti babi sepa,
Laban mata enggi tubuh rinda aku enda ngelala,
buntau bejaga nunggah pengabai.

Sapa meh anak temuai ke datai tumu hari petang,
Nyerumba kukuk manuk labang
Nyerumba seruah serenti babi belang,
Bangat renggang belelanjangka bulu kenyalang
selat enggau lengkang langai tajai.

Sapa meh anak temuai ke datai pagi tumu,
Nyerumba serauk kukuk manuk sidu,
Nyerumba seruah serenti babi asu.
Bangat tak lendu-lendu besimpai kuntu malu batu galang didingai.

Tengkurung batang rekung enggi tubuh lempung aku,
enggai nyadi diberi aku nyaris gurung-gurung,
Munyi panchur wung numbuk nerajang.

Aku ka ngenang Remias Titi Atas tampak panas nyang gadung,
Kumang Kejatan Bintang tapatka bujang belelang nurun ngemedung.
Limu ngalu merengu Lang Mukung.
Sadi Lemaie Lang Rangki siku menyadi tunggal tiong.

Sapa ke datai nandai ngabang nindung,
Bangat tak bekejangah di kala pah lapan beranggung,
Begerayuk di ukir rusuk neladan kantuk resam kampung
Bangat tak nyampun di tegulun jari ujung.


Pedas ari kayas rapi kampung,
Rentur ari aur Nanga Gelung
Bangat nika ari tuga tnggul nyelutung
Enti sema bujang tu legi lengau ngambang,
ngundang tubuh lempang aku,
disimbang pantang papan padung,
Enti iya sema bisi nyungkap tubuh jimat aku,
di kibung kuap belalaika kap nyamuk merengung,
Enti sema iya bisi nunjan tubuh rempan aku di tilam kerekam pajak geman lalang setembung,
Enda sekali-kali meh tubuh bela aku lengau asa menitika diri luya
di pua sili sawa nabau nyekilung,
Enda sekali-kali meh tubuh gamal aku menitika diri tekebar
di rampang pakar tajar nyenyuar ikan adung.
Isa meh laki aku lembau nangi,
Aku ju ke tisi, Iya ku kedut aku paut ke dalam kibung,
Ngambika kami dua iya gali rerenjung baka jelatung batang aiih… akit batang.

Lalu bejaku endu Seganggang Runggu Engkechung Kampung
Dini die tau jaku nya selantang engka anak umbung
Kati enda nya meh orang ke ditagaka kitai pedara lima piring tepung
Orang ke dianti kitai ari bulan sigi nyin kemari,
nyungkangka kembung …. Nai sapa meh nya beradai indai tangkai karung
pemedung – Nya meh Segangga Ganggai datai nandai ngabang ngipung ari Sepenigung Gigi Gumbang.

Enti munyi meh pengua karung pemedung ..Aram meh tua lengau mawa gagaka iya bakih nyangkung,
Lalu nyingkang kumang di sebalang kaki nanggung.
Nukangka lawang pintu tapang betatingka ke timbang munchul gung.
Datai di bilik baik rarik kikik tajau lempaung lalu
nentang ngagai panggang runggang tating lampang gemala raung.
Lalu nyempiarka menaga urar tajau lempaung
jari kiba enggi indai Encherangga muda nantai perecha batan sedundung,
jari kanan nantai chawan beundanka bedindam beram ai tepung.
Lalu nguing ke ramping tubuh lempung , peda da be-endit-endit lampit ringgit wang burung lelendu rawai pintu nyagu ke tusu dua betuntung,
Kekaling di sumping pending baka ari nungging tesilup chundung.
Pejalai lubah Kumang Kelinah baka rayah nibung berayung lalu duduk iya di lngkuk tikai tudung lung.
Betungga mua betapak dada enggau orang ka nina ngabang ngipung.
Lalu berimbai enggau Segangga Ganggai penama Segangga Gunggung.
Lalu tuchum Tempulu Dundun senyum nguing nyengung..apu udu pengaga die wai menyadi lempang lemi tubuh lempung.
Lapa kebuah enda gagaka die wai menyadi ,
ari kemari aku udah lama nganti die di geri tangga tampung.
Ari ensana aku lama udah ngipa kita di saka jalai pengelaung,-
Apu amat penapat meh dik indai ruai berambat Engkechung Kampung – Tu kelai peluh ling-ling enggi dik di kening muting idung.- Peluh lesak enggi tubuh biak dik baka ke udah ngebak umai kampung.
Ulih dik sigi indu iluk di tunjuk jari ujung lantang di lempuang tampung gelung tau belepu ke pugu entimu gadung beratung enggau gelamit benang ubung.di cherak dulang midung . tang enda sekali-kali aku wai menyadi ngelebu dik ka udah lama nganti aku ari kemari enggau tumpi piring tepung.
Peda tunjuk lansau enggi tubuh pipau ada kachau-kachau nyengkau pisau nyapai kantung . Lalu ditunggangka iya di dulang tapang alih kabang mata beliung – peda pengaruh udu pemayuh-mayuh nyau merupuh tinggi bedunjung –peda ada betilega tanduk bepanga lima nikal ngelung.Peda bekeranding batu cheling betampung enggau taring babi kampung. Peda ada betekechit batu kait pematak ringgit pala agung . Peda ada beribut batu semut tau ngangkut pandai nugung. Ada memelan ubat jedian kena besimpan menuhka rementan tibang betampung.

Peda ada lelugah batu tuah mesai buah mawang kachung . Peda ada lelendu perugu batu genali nusu bungkung semambu ngandung. Gemala panggum adung batu lua tedung kena beruntung menang bedagang. Aku embik ke dik tu indai rangki bedidi Engkechung Kampung kena aku nganti serenti babi kampung kena aku nipak arak enggi dik ai tepung. . Baka tu sekali –kali wai menyadi aku ngabang ke Batang Ai Lubuk Subung, Baka tu meh salai peneka makai kepai ikan adung. Utai dempa enda saga peneka aja nyawa ngipung. Tuak nanya ke nyeradak enggau tachak rabak ujung dabung. Aku dialu Remayah Bini Tibung indu di leyu Nyatu Tapang. Enti pia dini nya alah tesa aku ngena laja atung pematang. Dini nya alah tiap aku ari singkap pinggai lelayang. Enti pia uji dulu luntang ke tengang sambung ke tabir.Uji enti pia dulu kempat meh ke kikat kail ke pemantil.Enti baka nya lalu dulu angkat meh kita indai Impin berambat anang enda jimat-jimat enggai ke kain kita nyerungap pantil..aih.. ngaduka pantil.

Dikarang : Pengajar Jadam anak Datok
Pengajar Sigie anak Badang

Asal renung diambi ari: Lelmambang Muyan anak Meringai

http://www.moe.gov.my/bpk/pNp/jaku_iban/lekamain/invokasyen/renung.htm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s