SABAK BEBUAH

SABAK BEBUAH ( GENTERAN NGENTUM PINTU TANAH )

Penerang :
Sabak bebuah tu siti ari bansa leka main bansa Iban ti masuk dalam bagi invokesyen. Genteran ngentum pintu tanah tu disadakan tukang sabak lebuh maya ngintu pengawa pemati ( rabat ) dikena nganjung semangat orang ti udah mati pulai ngagai sabayan. Lekamain tu ulih dikena ngajar ba tikas pelajar sekondari baruh.

Dinga tak lalu nyapa Endu Sudan ke tau
nyulam landik nyungkit,
Jawai Burai Lungan ngemataka gam
tanah rapit.

Pintu tanah enda tau alai bepagah ngujika
pemerani,
Pintu tanah lang enda tau alai
beperangsang nguji ka ati,
Enggaika pintu tanah rapit tekinsit jai
tetukang.

Nuan dih muka ke kami dih wai sulu,
Pia ku jaku Endu Darai Rambai Geruda
tunang bujang Keling midang

Aku nadai ari pia ku jaku orang ke empu
menua,
Aku agi nakar gar enggau buah empurung
alang,
Agi belabaka ai lia di pala dulang midang,
Enggaika lelepan keran mata rendang.

Enda mih aku ulih kenda pia,pia ku bala
sida Raja Suga Uga,
Enda tau dikenda nadai ari limpang,
Lalu angkat dih Endu Sudan ngambi
labungan buluh balang,
Ngambi belia bandir tapang,
Lalu bediri angkat nyingkang.

Uji ngadang dulu deh nuan Yak Kerimpak Tanah Kuning,
Endu Terebu Baku Besumping,
Takang bindang berenaing,
Kedua bali nama Endu Terebu Baku Bekaki,
Endu tudung mua peti,
Nya ga Endu Bunsu Samali Tanah Nyadi,
Enggaika nuan tekenyit ati,
Aku nginsitka pintu tanah rapit enggau belia bandir tapang,
Enggaika nadai jalai sida Niram pulai ka menua di Batang Mandai renjan,
Keba Niram berani ati mutus tajam tetap nanam sudan lambar jerungkang,
Nya ga tuai Raja Sebayan datai ari Batang Mandai nyapan,
Ari tanjung mulung beranyam pisit dan betumbuk takang,
Tau alai tubuh 79 teruan ka telian ujan labuh jarang.


Uji rari dulu dih nusun Endu Tikar Limar Tekesai,
Endu Belulin Tinchin Bekawai,
Kedua bali dama Lulong Segupung Tampuk Bungai,
Sudan ke meruan ripan ambung rawai,
Nya orang ke berumah di sidak tanah luchak alun sedak rau rangkai.

Lagi meh pia ku bunsu kemembai,
Aku pen enggai mih kena tinggang tekang tanah perai,
Nganti aku udah ngambi anak kelatang baju panjai,
Nipas punggai pelepetan puang,
Ukai nya ulih aku sengapa pia,
Ulih aku pegi nangga gigi gumbang bebungai,
Diberi Sultan Raja Berunai lebuh tembai iya ke ngaku aku menggandai tangkai menimang

Uji rari dulu deh Endu Kumbau ke bepanau deguk,
Kumang ke ngelagetang bauh buk,
Lagi meh pia ku bunsu Senuruk,
Aku pen enggai meh kena tinggang tekang tanah buruk,
Nganti aku udah ngambi selapuk buok aku baka tampuk temedak upang,
Ukai nya ulih aku sengapa pia,
Ulih aku pegi nangga gigi gumbang belambuk,
Diberi Sultan Raja Suluk lebuh kami ke betunga ka sepuk semakau dagang.

Lalu disubak Endu Dara Takang Kawa,
Pintu tanah burak enggau bulu landak betengelang labang,
Lalu dibuka iya pintu tanah lada enggau belia bandir tapang,
Dinga tak lalu rengai-rengai deh pintu tanah perai tetukang sawang tekusai,
Indah enda munyi Seripah Dayang Mai gagaka laki iya Patinggi Datu Intai ke tau merau ngena singkap pinggai pemakai,

Melit ujung Tanjung Serit,nyelepak silak Nanga Berunai,
Enda ga iya karam dipangkaka gemuan gumbang bebungai,
Tang ukai semina naka nya,
Ukai enda iya tu ke tau nerebaika daun biru tuai,
Ke tekusai munyi tangkai idang gamang.

Tak nyau chit-chit dih pintu ladu tanah rapit,
Tetukang sawang lalu tekinsit,
Munyi ketawa bini Patinggi Datu Serit Amit,
Gagaka laki iya Patinggi Datuk Kedit,
Tau melit ujung Tanjung Serit,
Ngena singkap chawan chubit,
Tang ukai semina naka nya,
Ukai enda iya tu ke tau nyilup langit enggau lit lambar bekuang.

Lalu ketawa enggau panjung-panjung sida begayang bujang lempung,
Gagaka pintu tanah gadung udah sawang tetukang lalu tetanggung,
Nyau bisi jalai pulai ka menua sida di tanjung madang nibung ke berayung mayang.


Batak ieh bala kitai dulu,
Pia ku bala anembiak gempung Niram ke betundan angkat nyingkang,
Berunyut meh kitai tu baka sabut nyiur undang,
Abu dulu neresu jemu ambun midang.

Udah nya baru Dara Takang Kawa lalu ngunchi pintu tanah nyadi,
Baka ke ngunchi peti lantak bejuang,
Lalu didundung iya enggau kelutung bedil sebatang,
Nya baru tak lalu rapit pintu tanah mit enda ulih ginsit nadai meranggang.


Dibantaika;

Linggoh Untan
SK Ulu Kabo, Saratok.

http://www.moe.gov.my/bpk/pNp/jaku_iban/lekamain/invokasyen/sabak.htm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s