TIMANG GAWAI BENIH

3 bengkah leka main:

LEKA MAIN INVOKASYEN
Leka Main Pemerindang
Leka Main Adat Basa

Leka Main Invokasyen

TIMANG

Penerang:
Besangkut-paut enggau pengarap lama kitai Iban dikumbai kitai Beburung. Piring disediaka sebedau berengkah ngereja pengawa.Piring tu dikena mujuk nundukka sida ti dikangauka. Bala petara endang bisi menua kediri empu nya alai sapa tauka sada enda tau enda betul. Enti salah sida tau enggai datai lalu enggai makai piring ti udah disediaka.
Bala petara ti dikangau lemambang ke mengap nitihka gawai ti diintu. Di baruh tu chunto gawai, leka timang enggau bagi petara ti dikangau sereta penerang tiap-tiap genteran leka timang.

TIMANG BENIH (GENTERAN NYARAP)

Penerang:

Timang Benih tu selalu dikereja kitai Iban ke agi ngena pengarap lama(asal) nyembah Petara Padi, lalu selalu diintu maya udah lepas ngetau tauka maya nyau ka ngepunka pengawa bumai.

Semua benih ke deka ditanam maya taun nya lalu ditugungka ba pun ranyai sereta lalu dibungkur ngena pua kumbu, nya ke ditimang lemambang semalam-malamnya.

Ba sentang genteran Nyarap tu, dia lemambang ngading bala pungka lelaki raja berani kitai Iban ngambuh duku udah nya lalu disarap. Semua duku ke disarapnya semua tajam sereta makai.

Udah ubah sugi gelanyah, melingkat besumping sulat,

Duku udah diansah, nyaduh ke tubuh beratur nyarap,

Orang ke mansang ngemurau isau latuk,

malik ke tereduk meda pelanduk merejuk mumpun buan,

Lalu tegenung Kumbu Rayung, tegepang Bujang Sekumpang Mujuk,

Badas nya unggal, ku jaku Kutuk, tu burung nyetuk,

ajar Bandar aya Lang Benguk, bakatu sekali burung niang Asuk,

ke dikena iya negah Kantu duduk benung turun, mupuk tinduk di atas pengkalan.

Orang ke mansang murau isau dajap,

Tepeda ke ingkat beberap di puchuk peputan.

Lalu ngenung Kumbu Rayung, tegepang bujang Gelayan sigat.

Badas nya unggal, jaku Ketupung Lanchat, tu meh burung rat,

Ajar aya Lang Bengap, bakatu meh burung niang Nasat iya mansang nyarap,

Ga enggi Nasat enggau iya negah indu Kantu Seremat benung ngelekat,

Bedengah rawai empat, kelima tangkap di lebuh karangan.

Nya baru bilai isau salu sarap di ai chiru liur bunsu Raja Remaung,

Tutuh ke di tandan bau Lepo Pu lalu tingkar lengan,

Ketawa kekau gaga dibai empu iya ngalahka kubau Lung Nawang.

Bilai besi bidik sarap burik di ai mudik pechik liur Bejampung,

Sayat di rakat jaga di sik isau salu putus penarik urat pelepetan.

Ketawa lelekik besi bidik gaga dibai empu iya ngerarik rekung tampung selambang.

Nya baru bilai isau tatah tebelingkah di pun pah,

Tetumpah darah nesah salah bulan.

Bilai isau liup sarap rurut di gelung perut pansut seraput lemak dalam.

TIMANG BENIH (GENTERAN BETUSIKA MIMPI)

Penerang:

Kitai bansa Iban kelia ending sigi selalu pechayaka mimpi. Nya alai sebedau ngereja pengawa kitai Iban sigi selalu betanyaka mimpi betanyaka kenyap pangan diri. Kitai Iban sigi takut ngelaban mimpi ngelanggar kenyap, selalu kitai Iban diau enda kereja enti kitai enda manah mimpi jai kenyap.

Dalam leka timang tu, dia lemambang ngading orang ketuai betanyaka mimpi bala sida ke indu-indu ke tinggal di rumah maya ke ditinggalka bala sida pungka lelaki bejalai.

Kemayuh agi mimpi sida ke indu-indu tu manah, ngayuka pemulai sida ke lelaki bisi mai utai tauka buah jari.

Engkelili dua kali engkelili rumbau nyadi,

Nyaduhka tubuh ngenang orang indu ke di rumah betusika mimpi,

Bejaku bini Menari Lang Jugu, selantang anak indu,

Kati kita bisi mimpi tinggalka emperuji ati emperaja dulu,

Ngerangai senawai igi tematu?

Bisi indai karung pemangku, mimpi ke dudi nya ke ditusi,

Mimpi ke dulu enda ditiu, mimpi malu di lebuh munggu tatai panjai.

Badas nya anak, nya ngayuka emperaja dulu pulai ila,

Ngempuruka kitai kalu pauh bejenggi.

Bejaku bini Menari Lang Sengalang Burung, selantang anak umbung,

Kati kita bisi mimpi tinggalka emperuji ati emperaja idung,

Ngerangai senawai igi nibung?

Bisi beradai indai karung pemedung, mimpi ke dulu enda ditiu,

Mimpi ke ditusi nyerumba rayuk kukuk manuk sabung,

Nya ke diitung tubuh lembung, mimpi nanggung lesung ke benung ruai.

Enti pia badas meh nya anak, ngayuka emperaja idung,

Ngerempungka kitai tambung kemantan padi.

Bejaku bini Menari Lang Muking, selantang anak ming,

Kati bisi mimpi kita tinggal emperuji ati emperaja jeling,

Ngeranjai senawai igi janting?

Bisi meh indai karung peminching, mimpi ke dulu enda ditiu,

Mimpi ke dudi nyerumba rauk kukuk manuk biring,

Nya ka diselinting tubuh ramping, mimpi ngasing di lebuh tinting balai ruai.

Badas nya anak, ngayuka emperuja jeling,

Pulai ila mampingka kitai pating isang lelundi.

Bejaku bini Menari Lang Bengap,

Kati kita bisi mimpi tinggal emperuji ati emperaja kejap,

Ngerangai senawai igi melupat?

Bisi meh indai karung menyimat,

Mimpi ngebat di tanah lengkap pam ke landai.

Badas nya anak ngayuka emperuja jimat,

Pulai ila mangkatka kitai buah lensat bekechuat baka lalat mantang maji.

http://www.moe.gov.my/bpk/pNp/jaku_iban/lekamain/invokasyen/timang.htm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s