Pemungkal pengawa bemanang dulu menya

Pemungkal pengawa bemanang dulu menya
Tweet
Post a new topic
Post a reply
2 posts • Page 1 of 1
Pemungkal pengawa bemanang dulu menya

Postby Ryna » Sun Dec 23, 2007 11:39 am
Tebal agi bala anembiak kemaya haritu bedau kala ninga pengawa belian, lalu bisi sida ke udah kala ninga tang nyangka enda kala meda orang belian, tauka bemanang. Tang anang mega tekenyit enti kita bisi ninga orang agi bisi begunaka pelian kena berubat ba tengah nengeri besai Kuching. Kebuah pia, laban agi bisi sekeda bala kitai Iban di Kuching ke mengkang ngintu pengarap lama, lalu agi arap ka pelian nya ulih ngubat sekeda bansa penyakit ke enda mudah diasuh gerai ulih lutur ba sepital tauka klinik. Lalu di menua pesisir endang agi bisi ga sekeda pelilih menua di Batang Saribas enggau Krian eng-gau ai bukai ke agi nge-meranka pengawa belian. Semina siti aja penanggul sida diatu, iya nya bala manang nyau semakin kurang sekurang. Sida ke agi idup nya pan nyau mayuh udah ngelui 80 taun umur, mayuh nadai ngeli agi ke ngujung leka pelian sida nyau enda tentu betul sebut. Enti enda betul sebut leka pelian enggau puchau, manang nya tentu enda mengat sidi. Taja pia, aku deka ngenang mimit pasal pengawa bemanang, naka ke ditemu ari peda diri empu sereta mega ari padah orang bukai. Nyadi karang cherita tu nitih ka padah orang ke tuai dulu suba sereta mega belalau ka siti bup ti ditulis pangan aku niang aya Benedict Sandin (1918-1982). Kelimpah ari nya bisi ga sekeda isi karang tu ulih aku ari niang apai aku tuai lemambang Salok Anak Jembu (1910-2002) enggau niang Manang Chundi a.k.a Apai Guok sida ari Munggu Embawang, Malupa.

Nyadi nitih cherita sida ke tuai enggau bup niang aya Benedict, Aki Lang Sengalang Burung, Aki Jugu Menaul Tuntung bebini ngambi Indai Kechendai Bepantak Jirak, Dara Sentaba Balun Kapak. Tang sekumbang seduai ke udah jadi melaki bini, Indai Kechendai Bepantak Jirak tak seruran mayur-ayur tabin bebirin lembau makai, pedera renga lain asai, sakit lengit enda nyamai. Orang nadai nemu pemedis iya, tubuh iya kuning lalu nyawa nadai ulih dibai makai. Lebuh rambau nya mensia endang bedau bemanang, bedukun tauka nyadi lemambang. Abis meh runding sida enda nemu jalai ngubat iya. Dia Sengalang Burung berunding mai orang mangun menyadi iya empu ke benama Raja Menjaya jadi manang bali. Reti nya lelaki mali diri jadi indu. Udah iya dibangun sida, nya baru dama Menjaya disebut orang Raja Menjaya ke betelaga baruh rekung, Manang Bali menyadi Aki Lang Sengalang Burung. Tau mega iya disebut Matai Tuai Raja Menjaya, Manang Langgung Ngembuan Puc-hung Penyangga Nyawa. Sereta iya udah dibangun, Menjaya lalu betawai ka Indai Kechendai, lalu dipindahka iya dama ngagai Endu Sudan Brinjan Bungkung, Endu Diu Tiung Menyelung. Udah gerai iya, nya baru seduai beranakka lapan iku anak. Nyadi nitih ka bup niang aya Benedict Raja Durong ripih anak seduai munyi ke di baruh tu:

Nyadi ari asal kelia, orang jadi manang ukai ari asuh antu, tang bepun ari dibangun mensia rambau sida Sengalang Burung diri menyadi. Nyadi Sengalang Burung enggau Raja Sempulang Gana sama bisi lemambang enggau ma-nang kediri empu, laban seduai iya suah nirika gawai besai. Nyadi dama lemambang sida Sampang Gading, Empulu Arang enggau Tepung Bulu, ke lalu ngajar semua leka main ka gawai sebengkah-sebengkah, ke agi di-kingatka sereta lalu ditam-pung enggau dikena bansa kitai Iban datai ka kema-yatu. Udah bekau Menjaya Raja Manang dibangun jadi manang, enti orang bisi sakit lengit enda gerai, mensia lalu bambi ka manang belian. Nyadi pelian manang mayuh bengkah enggau mayuh dama. Orang ke jadi manang pan pia mega mayuh endar gelar. Bisi sida digelar Manang Bidu, bisi Manang Chelung, bisi Manang Likup, bisi Manang Jelapi, bisi Manang Jarai, bisi Manang Jaban, bisi Manang Lansu, bisi Manang Megit enggau mayuh bengkah dama bukai lalu tebal agi ngena dama tauka nama diri empu. Tu nunda ka padah niang aya Benedict ba bup Raja Durong. Nunda padah niang aya Manang Chundi menya, utai ka iyang sida pan enda sebaka. Bisi sida beyiang ka Menarat, bisi beyiang ka Menaul, bisi beyiang ka Nyumbuh, bisi beyiang ka Baya, Lelabi, Kijang, Kenyalang, Tedung, Adung, Remaung enggau Antu Gerasi. Lalu bisi mega madah diri beyiang ka ular enggau antu bukai sereta bisi mega madah beyiang ka anak Buau. Ku iya: “Ripih enggau dama pelian manang pan enda ga sebaka laban nitih ka nama utai deka dipelian enggau gaya pelian sida.”

Dama pelian sida munyi tu:-

1) Betepas

2) Mensiang Bunga

3) Besagu ayu

4) Nemuai ka Sebayan

5) Berenchah

6) Beburung Raya

7) Beruwa

8 Bebaju Besi

9) Betanam Pentik

10) Beremaung

11) Ninting Lanjan

12) Nyelambayan

13) Bepancha

14) Ngelanjan

15) Besimbang Garung

16) Betukup Rarung

17) Begiling Lantai

18 Benunuh Buyu

19) Betiti Tendai

20) Nebang Rumah Gerasi

21) Beserara Bunga

22) Sebayan Dalam

23) Nyabung

24) Batak Lampung

25) Bunggar Unggar

26) Betimba

27) Pagar Api

Nyadi endang ka baka manang, enti sida udah suah belian, sida empu tau nyadi enda pengerai. Nyadi pemedis nya dikumbai sida laban Sarat Menawa, reti nya enti baka perau nyau udah kelalu sarat, sida enda tau enda nirika Gawai Manang ke dikumbai sida Betimba, kena sida mangun diri empu baru ngambika panjai umur lalu tan belian. Nya baka kitai diatu ke ngechaj bateri awakka tan lama agi. Iya meri pengidup baru ngagai bateri nya, bakanya ga iya meri seput baru ngagai manang nya. Tang baka semua kitai idup ba dunya injau tu, manang pan mati ga. Nyadi enti manang mati, adat pemati iya lain mimit ari adat Iban bukai. Sereta iya udah apus seput, enti manang nya tulung iyang menarat, bangkai iya deka disingitka enda lama, apin iya diberi mandi. Enti iya tulung iyang baya, sekalika antu gerasi tauka menaul, bangkai iya enda semina disingitka tang lalu ditungkupka enda lama, baru meri iya mandi. Pia mega sereta seput manang udah apus ba bilik, orang lalu nutung ka ketebung baruh kaki atap di pugu tanju ruai. Lalu renggat tutung tu nitih ka penyuah manang udah bebangun. Tempap tutung orang ke nebah nya nanjak ai ke lalu ngayu ka semengat manang nanjak wuong niki ka tuchung Bukit Rabung. Nyadi Bukit Rabung tu tinggi sereta renjan. Endur iya enda jauh ari entara menua Sarawak enggau Kali-mantan Indonesia lalu tau dipeda ari bukit atas pasar Sri Aman enti maya ari manah. Ku kenang sida niang aya Manang Chundi di Bukit Rabung tu kelia endur sida Sengalang Bu-rung mangun Men-jaya jadi manang. Udah bangkai ma-nang diberi mandi enggau diberi baiya, iya lalu ditanggung ka ruai, lalu diengkah dalam sapat baka intu enggau bangkai Iban bukai. Tang lebuh nurun ka santubung iya ari rumah dini ari, iya enda disan niti ruai tauka tempuan, tang diulur ari ujung tanju ka tanah. Pala iya mesti dulu. Nya alai enti lebuh ma-nang mati kiruh amat bala serumah begaga ka tangga kena ngu-lur iya lalu anang disebut agi enti rumah orang nya tinggi. Datai ba pendam, lebuh ngubur iya, pala manang dieng-kah tunga ngulu ai laban nya ngayuka iya nanjak riam pulai ke tuchung Rabung. Nyadi pala bangkai Iban bukai engkah tunga kili, kena ngayu ka sida pulai ke Mandai Sebayan.

Nyadi intu bukai baka tungkun api, tambit ulit, tebalu enggau jalai berantu bebalu iya, sebaka enggau enggi bala Iban bukai.

http://www.miricommunity.net/viewtopic.php?f=13&t=9176

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s