Sampi minta sah petara maya pengawa bumai betaun

Minta sah petara maya pengawa bumai betaun

| 22/02/2009 | 0 Comments
Email This Post Email This Post   Print This Post Print This Post  
1 Star2 Stars3 Stars4tars5 Stars (No Ratings Yet)
 

Orang ke besampi minta petara aki, petara ini datai di bilik, di penaik ngesah awakka bulih padi

Bala aki ini bala kitai iban kelia endang sigi ngemeranka pengawa bumai betaun, na alai semua pengidup sida bepusin ba idar pengawa bumai betaun nadai saru.

Pengawa ngasu beburu, nginti, meti, manjuk, nubai, mansai, bebubu, betanka ensenga, sereta mayuh bengkah jalai asal begigaka lauk ba darat enggau ba sungai, dikereja bala iban kelia lebuh bisi maya lapang baka maya nebas, nebang, nugal, mantun enggau maya ngetau tauka entara semua renggat pengawa nya.

“Ari pengawa bumai meh semua adat beburung, adat begawai baka gawai batu, gawai ngemali umai, gawai burung enggau sekeda pengawa enggau adat asal bukai dalam pengarap lama kitai iban,” ku aya matthew banyin lebuh ke ditanya penemu pasal atur bumai, betaun enggau beburung apin lama.

Banyin mega siku orang endang dikelandik mensia mayuh ba batang krian laban ke nemu bebiau pengabang sereta landik dalam penemu baka jaku ansah, jaku ngetan kuta maya bisi pengawa, muka kujuk enggau mayuh pengelandik bukai.

Nyadi sebedau sebengkah renggat pengawa bumai tu dipejalaika, orang tuai kelia enda tau enda ngatur piring kena ngepunka pengawa baka manggul, nebas, nebang, nugal, mantun, ngetau enggau berangkut.

Tang atur pengawa miring ke balat agi dikemeranka nya ngepunka pengawa nugal, laban reti iya besai bendar laban nya maya benih padi ditanam.

Nya alai maya baru deka belabuh nugal, orang kelia ukai mina miring tang lalu enggau sampi enggau biau, laban ngangau minta bantu petara aki ini enggau petara bukai nyengkaum simpulang gana.

Aku rindu bendar tetemuka chunto biau baru deka berengkah nugal dalam bup bujang mit ke dulis jimmy donald.

Dalam bup nya jimmy bekunsi enggau bala kitai banding jalai bebiau dalam ensera iya.

Nyadi biau ari pungka sida ke lelaki dalam bup nya, iya nya bujang mit ke mali diri jai nyadi tudah damu, kurang lebih iya munyi tu:

“Sa, dua, tiga, empat, lima, enam, tuuujuh! Oh….Ha! Oh…ha!….Oh….Ha!

Nama ti nyedu belakang munggu, munyi sanu sinu bejaku nusi cherita? Nama ti ngangau di kaki rantau, munyi papau ugau mutus bechara?

Nama ti ngakak munyi tajai, ngakak di daan pengerawan benang? Nama ke nidit munyi landai, nidit dalam lubang?

Nama ti ngensung munyi sengayan? Nama ti engkebab munyi sempidan? Nama ti bedarup munyi bandir? Nama ti meletup munyi bedil? Nama ti merauk munyi kijang? Nama ti ngangau munyi orang?

O….Ya…..Damu, laban iya makai tegalan, makai reban. Makai di umai, makai tembawai. Nanam padi pun, padi taun, padi puting, padi sangking.

O….Sapa dikangau, sapa ke ditesau? Sapa ti dipadah, sapa ti ditelah deh? Sapa d’ensung, sapa dipulung deh?

Kami ukai ngangau ka orang ti nginti, ti meti. Ti nubai, ti mansai, orang ti ngasu, ti beburu, orang ti rubik, ti charik.

Oh enti pia pulang gana, bujang jangkang kirai, raja sua, bujang simpulang gana.

Oh….Ha! Oh….Ha! Oh….Ha! Ni orang ti teleba bediri di mua padi, betunjang di mua tibang deh? Bujang pulang gana, jangkang kirai raja sua? Nya sigi orang nulung, orang mandung, orang meda, orang nela, nanam padi pun, padi taun, padi puting, padi sangking.

Sapa ti dikangau, sapa ti ditesau? Sapa ti ditelah, sapa ti dipadah deh? Orang ari ili apin d’ambi, orang ari ulu apin nemu, orang di tengah apin dipadah.

Ngangau ka luta telenga pintu mua duduk bepanggal lampung, bunsu sintung penuduk berambing timbang, beranak ka lanyung lanchung patung, betis lupis kaki laka nyingkang batang.

Ngangau ka dara tuai ti parai bebayaka tikai tambun, dara biak beminyak ai ambun, bunsu benih buntih padi pun, bekedangkum pulai ke serangan.

Ngangau ka dara jawai bejalai niti tinting, dara biak tampak bebanding, bunsu benih buntih padi sangking, enda kala bula ka puting tekeliling tandan.

Ngangau ka jawai bejalai ampai sesumba, dara biak rawak tachak ngeli seleka. Bunsu benih buntih padi puya, enda kala bula ka semaya, tibang mengentam.

O…..Ha! O….Ha!….O….Ha!

Runti-runti tali sabut, dayang jerenang ujung kukut, bunsu benih buntih padi pulut, enda kala bula ka selimput puting chapan.

Ngangau ka lengayun pantun kedumu, bejalai enggai dudi, rindu dulu. Bunsu rampu tumbuh di munggu, Tiga bulan belunggur ujan.

Nyaguka senakan bintang meriran lalu entapu, bunsu kumang tekang pirak, gatak-gatak diau di tapa dada jari, kumang mandi gelenggang ai minyak, penampak mua puchung penguji.

O….Ha!…..O….Ha!….O…ha!

Sapa agi d’ambi deh? Agi dipadah, agi ditelah deh? Agi dikensung, agi dipulung? Agi dikangau, agi ditesau deh?

Agi ngangauka orang di bengkar langit luar, baka di layar landu digantung, di emperan batu bulan, baka peredap daun api.

Di gerenjang batu bintang, baka bulang teku taji, sudan semban burai sentagai, bunsu penyurai langit landai, lebai-lebai baka bingkai kepit tanggi; endu perunut gerunung siung, bunsu kemetung langit landing jindung-jindung baka padung gantung niga ngeledi; sabit mit anting kenawing, sugu bidik pemeling gunting, bunsu sebau kemarau hari; ribut muput angin bepeling mangging angging, baka siring labung betawi.

Kumang penyingkang batang sabang melaban, bunsu ujan nelian labuh entali, dara b’ambai ka leka bintang empat, kumang beratung di taking remang rarat, bunsu kilat jampat amat ngelambai di kebung langit kaki; jengawan dani di depan angkat tegepang.

Bunsu singar nitar begemung, igi beperechi lumpung betemaring, naban ka papung lampang besi; baru ngangau endu karakap, sebulan tangan sudau beliau malam, bunsu keleman bulan pegari. Runti sa runti baku pirak, iyak buku beserak, bunsu lemambang bintang banyak, duduk lelenuk mayuk empayuk, tandan tangkai padi.

Runti sa runti tali temaga, kumang tampak jerita, bunsu lemambang bintang tiga, enda kala bula ka semaya, enggau anak mensia sepa jaga, segini hari nanam pagi sampai ka lemai malam petang.”

Nyadi sampi tu kira ba setengah, tang kira diketu, laban batang tuju iya sigi kena ngangau orang ke udah disebut nya tadi, taja pan agi mayuh ti apin dikangau baka bala sida singalang burung sebilik, nyengkaum bala menantu iya baka sida ketupung, beragai, bejampung, embuas, papau tauka kelabu, nendak enggau kunding burung malam. Nya alai ngambika banding enti orang ke nyampi nya ngangau ka bala raban tu, uji kitai ninga mimit ba senentang nya munyi tu:

“Nya ga menua aki lang singalang burung,aki jugu menaul tuntung, niki perabung tinggi gegeli, laja selaka tenung, jejabung jerirung, ulu nyepit enggau api!

Enti nuan ngabang, bunsu nuan bai, nuan nendak berumah di seradak lebak, kayak-kayak baka serindak tanggi d’anyam.

Nuan bekubu burik bulu burung ketupung kechungut iku! Nuan beragai lekai-lekai munyi ketawa tuai bulu nyedu, nuan bejampung burung bejugu, enti nuan ngabang, bini nuan bai, dara rendung berumah di tuchun ringang-ringang, kelambung burung tunggal kaban!”

Nitih padah orang tuai kelia, enti udah tembu sampi, nya baru nganjung piring ngagai alai ti patut. Selalu maya rambau sampi berengkah nugal, tiga iti piring udah chukup. Siti piring nya tumbak ba tanah ungkup seragindah petara tanah, laban kira kena bepinta, lalu pia mega siti engkah di atas dalam teresang lalu siti anjung ngagai tisi serarai umai ba tinting ungkup antu rua.

http://www.mysarawak.org/2009/02/22/minta-sah-petara-maya-pengawa-bumai-betaun.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s