Kedu “Lang Ngindang”

HomeUtusan Borneo – Berita Iban – Kedu, begelar Lang Ngindang seiku ketuai bansa Iban ari Skrang, pematak kayau ngelaban Rajah

Kedu, begelar Lang Ngindang seiku ketuai bansa Iban ari Skrang, pematak kayau ngelaban Rajah

by Jacqueline David. Posted on December 22, 2012, Saturday

PETURUN KEDU LANG NGINDANG KE EMPAT: Jetie Ambin, peturun Kedu Lang Ngindang ke-4 begambar enggau dua igi tajau (Tajau Lelaki enggau Tajau Indu) ke dipeturun ngagai iya. Nitih ku jerita tuai kelia, dua buah tajau nya alai nyimpan jari Kedu Lang Ngindang, ke dilalai ari munsuh iya.

DALAM Bup Serebareti Iban-English, AJN Richards ngerikutka “Kedu: Seiku ketuai ari Skrang enggau Padih ke ngelaban Rajah, kandang taun 1879-1881 (keterubah serang ngelaban iya kena 29 April 1879), maya nya iya bekuta di Bukit Sulak.

“Iya tebilang enggau nama Lang Ngindang, tauka Soaring Hawk. Iya mindahka bala iya ke Entabai, sekeda ke Julau enggau Bawang Asan. Anak indu iya, Pawa, iya nya indai Gani di Bawang Asan”.

Pawa jadi enggau Chaong, anak lelaki Lintong Moa Ari. Nya alai, Kedu enggau Lintong beisan. AJN Richards udah nya ngerikut iya nya ‘Lintong Moa Hari ‘Dark Storm Cloud’, tuai Iban ari Kanowit ke nyerang Kubu Sibu tang enda mujur dalam taun 1870 (haribulan ke bendar ti dirikut iya nya 13 Mei 1870 – nyangka urung 13 Mei). Lintong tu aki Penghulu Brinau enggau Penghulu Lingoh ari Asan sereta Gani ari Bawang Asan, Penghulu Bayang anak Janting, ke nyadi petunggal iya..

Nyangka ba peturun Lintong Moa Ari enggau Kedu Lang Ngindang bepurih ari Chaong enggau Pawa, lebih agi Henry P. Engkamat enggau Johnny Weis, lebuh penyadi nya di Kubu Sibu ke kala disebut Ranee Margaret dalam bup iya ‘My Life in Sarawak’ (MLIS) (OUP) lambar 35-38 ke disebut iya ‘A Dyak chief named Lintong, had gathered round a considerable force of followers, entrenched himself at the head of a stream, where he had managed to build a fleet of boats from the enormous forest trees which grew in the neighbourhood. At the head of his fleet, he harrased and plundered the more law-abiding inhabitants of the delta’.

Lebuh isan Lintong benung gagau belaban enggau Rajah di Sibu enggau Kanowit, Kedu Lang Ngindang mantu ngelaban munsuh ti ngalih di rimbas enggau Padih.

Dalam taun 1858 Saji tauka Aji, Nanang enggau Luyon, tiga iku diri menyadi nya bekuta di Sungai Langit, Ulu Padih, besedia ngeluska penumbuh kuasa Rajah ngili sungai baka ke kala digaga sida ba pun bulan April enggau 14 Julai 1858 lebuh sida ngalahka Kubu Betong.

Maya ekspedisyen Sadok kedua dalam bulan Ogos, sedadu Rajah betuaika Tuan Muda Charles Brooke enggau James Brooke Johnson  nyerang Aji, Nanang enggau Luyon di Sungai Langit.

Aji parai dibunuh orang Skrang ke nyadi sebagi ari sedadu nya. Sepengudah ekspedisyen Sadok, Nanang enggau Luyoh mai bala iya ngagai Sadok lalu begempung enggau Rentap, ngaga kuta sida betuaika Rentap.

Taja pia, Nanang enggau Luyon enda lantang  ati laban Rentap enggai mulaika belirang senapang ke disilih enggau meriam, ke dikumbai sida enggi Aji.

Rentap madahka belirang nya diberi Dimah, bini Aji. Ketegal penyarut nya, sida enda lantang ati ke Jabu, apai Umping enggau menyadi iya Ngadan, apai Rumbi mujuk Nanang enggau Luyon nyerah diri ngagai sedadu Rajah, sebedau perang ekspedisyen Sadok ketiga kena 28 Oktober 1861.

Udah nya Nanang, Luyon enggau bujang berani bukai matak diri, sedadu Rajah nyerang Sadok tang Rentap enggau bala iya nadai dia agi.

Maya nya Kedu Lang Ngindang sigi ditemu bisi laya enggau orang Kantu, Merakai, sepiak sida bansa Belanda ari entara menua. Kedu mai mayuh raban iya nyerang sida ba menua sida empu.

Dalam bup Ranee Margaret lambar 261 ngerikut “A chief, called Ngindang gave immense trouble, and at one time menaced in a somewhat serius manner the inhibitants residing in the lower waters of the Batang Lupar River”.

Residen Simanggang maya nya, Frank Maxwell balat ringat sereta mutus deka ngukum Kedu Lang Ngindang.

Dalam bup Ranee Margaret MLIS (lambar 261) madahka Maxwell “pointing out the manner in which he drove these enemies of the Rajah back, thus establishing security and peace in the district. One of these expeditions comes back forcibly to my mind as I write. Mr Maxwell’s health was never very good on account of constant malaria and rheumatism, and once when an expedition was absolutely necessary he was lying crippled with an attack of acute rheumatism in Simanggang Fort. He was carried downto his boat and placed on a mattress, from which he directed the operations necessary against the rebel force….The Malays and Dyak admired him for his courage and endurance”.

Maxwell benung raya sakit lebuh nya, tang iya sigi bisi ati deka nganchurka Kedu Lang Ngindang enggau bala sedadu iya.

Taja pia, Kedu Lang Ngindang udah kelalu mayuh mantu Rajah maya nya, Maxwell udah beratika nadai meda penyalah pengawa Kedu ke balat bekayauka orang. Maxwell minta bantu ari OKP Nanang ari Padeh, Penghulu Minggat enggau Chulo “Tarang” ari Kalaka, Jabu apai Umping enggau Utik ari Bangat/Skrang nyerang Kedu di Nanga Bunu, kena 29 April 1879.

Orang ke ngiring sereta betuaika bujang berani Kedu Lang Ngindang, iya nya Uching “Kesulai Tandang”, Aming “Ijau Kemelang”, Sigat ari Tanjong/Skrag, Bsek “Tenkujoh Darah” ari Ng Tanyit/Skrang, Dunggau ari Ng Murat/Skrang enggau Busut ari Entebang/Skrang.

Maya besatup nya, Unting (menyadi Nanang) enggau anak menyadi iya, Senabong enggau Timban, anak niang Aji mandangka pemerani laban sida iya ngarapka ulih malas dendam ketegal apai iya parai dalam taun 1858; Pala Aji lebuh nya agi disimpan Iban Skrang.

Pengawa betempuh di Nanga Bunu enda balat, tang Jabu apai Umbing agi mujuk Kedu nyerah diri ngagai Rajah. Badu betempuh nya, Kedu mai bala iya pindah ngarau di Sungai Lang, ulu Skrang, alai sida iya diserang baru ulih sekeda sedadu  ke agi ngiga sida iya.

Gani Sauh Besi, uchu Kedu nusui jerita sida enggau nenak seraya madah deka malas dendam ketegal pemati Aji minta pala iya dipulaika baru.

Lebuh Kedu enggau bala iya agi di umai, sida diserang munsuh sereta dampa sida ditunu. Lebuh Kedu Lang Ngindang ngenduh di ulu sungai, munsuh ke nyerang nunu umai sida.

Enggau pemakai ke enda mayuh kena nupi bala iya, Kedu diasuh bujang berani nyerah diri. Kedu milih bujang berani iya lalu belabuh bejalai nuju Simanggang betemu enggau wakil Rajah.

Tang enda memukai bisi seiku tuai nangkan Kedu madahka jalai ke ditengah sida nyangka bisi diipa munsuh. Kedu Lang Ngindang enggau bujang berani iya mutus deka pulai baru ngagai Sungai Lang. Ari nyin, Kedu enggau bala iya pindah ngagai Bukit Stulak alai iya bekuta.

Bedau lama Kedu Lang Ngindang enggau bala iya ngerenahka diri di Bukit Stulak, Kedu Lang Ngindang di serang Rajah baka ke nyerang Nanga Bunu.

Dalam bup ti ditulis niang Benedict Sandin “Iban Migration To Niah River” dirikut Penghulu Mnggoi ari Lamaus/Suai, nusui, “After that little battles had been engaged, Kedu Lang Ngindang agreed to surrender. He could not bring himself to submit at Simanggang, as he would not see some of the tuan’s faces there. Instead, he decided to surrender at Sibu with the majority of his warriors, while some who would not leave Skrang surrendered themselves at Simanggang and were fined one picul each. In Sibu, Lang Ngindang himself was ordered to pay ten old jars as pledge for his future good behaviour. These jars, years after his death, were granted back to Gani who is his grandson and heir.”

Ari Bukit Stulak, Kedu Lang Ngindang pindah lalu diau enggau bala iya di nanga sungai di Tebalong enggau Kesit di Entabai. Berapa taun udah nya, bala Kedu Lang Ngindang mayuh udah pindah ngagai sekeda sitak menua lalu begulai enggau enggau Dayak bukai ke diau di Skrang enggau Saribas ke kala bepindah ngagai sungai di Julau enggau Entabai, enggau udah Sadok ke alah dalam taun 1861.

Kedu Lang Ngindang lalu mai bala iya pindah lalu diau di Sibu, terubah iya diau di Sungai Antu, siti endur enda jauh ari pasar Sibu ili Batang Ign. Ari nyin, iya lalu dibai begempung enggau bala Dayak ari Saribas enggau Kalaka lalu diau di Bawang Assan.

Lebuh Gani Sauh Besi, uchu Kedu Lang Ngindang temegahka bedilang endur nyalai pala munsuh, nyangka lebuh nya Gani bisi urung tiga puluh igi pala.

Enti pala nya diulih Kedu Lang Ngindang, Gani empu begulai enggau bala kaban iya baka Penghulu Nanta anak Itar, uchu Ampi anak Abit, nya nyangka siti pemujur ke besai ba pemerani sida.

Bisi dua buah agi bedilang di 46 pintu rumah panjai nya dalam taun 1945. Gundi, seiku ari bujang berani manuk sabung Gani, bisi dua iti raran pala begantung. Bepumpung ke pala sebengkah pengawa ke dikereja dikena mandangka pemerani bansa Iban maya nya.

Ranee Sylvia, bini Rajah Ketiga dalam bup iya “Queen of the Head-hunters” (lambar 101) nulis: “When a young Dyak came of age, no matter how handsome he might be, the girls of his tribe thought little of him until he had at least two or three heads to his credit…So the boy would go hunting as the only mean of winning her love.”

*Mayuh ari pemadah tu datai ari Jetie Ambin, iya nya peturun ke Empat ari Kedu Lang Ngindang ke diau di Taman BDC Kuching sekeda pengulih jerita ari bup Bennedict Sandin. Tampung jerita tu tau dipeda kena Hari Minggu, 23 Disember tu.

Read more: http://www.theborneopost.com/2012/12/22/kedu-begelar-lang-ngindang-seiku-ketuai-bansa-iban-ari-skrang-pematak-kayau-ngelaban-rajah/#ixzz2VynOxA3H

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s