Pengawa ngajat

Home – Utusan Borneo – Berita Iban – Sukut Dayaidup Bansa Iban-Penemu ba pengawa ngajat
Sukut Dayaidup Bansa Iban-Penemu ba pengawa ngajat

Posted on August 10, 2012, Friday

NGAJAT tu siti main asal ari raban bansa Iban. Ari sida aki ini kitai menya, udah ngembuan penemu, pengawa, main asal sereta adat ti udah dikena lalu diturun ngagai raban uchu ichit sida.

Raban bansa Iban udah ngembuan chara idup ti cukup manah nyentuk mantaika gaya enggau chura pengidup ti jauh enda sama enggau raban bansa bukai. Chara penemu enggau runding ke nyelai ti bisi ba bidang pikir seseiku bansa Iban nya tau dipeda ari mansutka chuan teladan sereta lambang pengidup ti nyelai dipeda lalu nyadika raban bansa Iban siti ari bansa ti chukup dikerindu ba bidang adat, pengawa sereta gaya pengidup ti enda kala bisi ba penemu bansa bukai.

Seiti ari pengawa ti nyadi lambang raban bansa Iban ti udah bisi ari kelia menya datai ke seharitu iya nya pengawa ngajat. Pengelandik engau penyelai dalam mantai bungai ajat nya udah chukup meri tanda ngagai raban bansa Iban endang siti ari bansa ti pemadu iya chulin sereta manah, nyengkaum semua ulah ti ninggal lita ti tusah ditunda bansa bukai kelebih agi ti diau di menua Sarawak tu.

Lebuh maya ke ngajat, enda tinggal mega perengka muzik ti nyelai dikena nyadi ke tebah sereta tiun ti dikena merindang lebuh maya ngajat. Nya alai maya ke nebah perengka muzik baka tawak, bendai enggau gendang, udah chukup mantaika munyi muzik ti pemadu manah sereta alus didinga. Pia mega perengka muzik nya tadi bisi ditebah maya rami melah pinang, rami mangkung tiang sereta mayuh pengawa tauka pengerami ti bukai.

Ngajat ti selalu dikena raban bansa Iban dulu kelia lebuh maya nyambut penatai temuai, ngaluka penatai bujang berani maya ke pulai ngayau sereta ngintu pengerami lebuh maya begawai.

Pengawa ngajat dibagi dalam mayuh bengkah, iya nya Ajat Indu, Ajat Pua Kumbu, Ajat Bebunuh, Ajat Lesung, Ajat Nyambut Pengabang enggau Ajat Kuta (traditional).

Ajat Indu iya nya siti ari ajat sida ke indu. Nyadi tuju ngajat indu tu ti mantaika pengelemi enggau pengalus bungai ajat tauka chura ajat ti dipeda.

Ajat indu tu mega bisi ngembuan mayuh reti ti besangkut – paut enggau pengidup orang bansa Iban. Kekadang kitai meda ajat indu tu bisi gaya benung bejalaika pengawa orang indu baka nenun pua kumbu, nusuk leka marik.

Lebuh ke ngajat indu nya tadi, dia sida ke indu bekenaka ngepan asal.

Ajat Pua Kumbu sebengkah ari seni ngajat orang bansa Iban ti nyelai, ajat tu diberi ngagai sida ke indu, nyadi lebuh maya sida ke indu nya ngajat, dia sida bebaika pua kumbu nyadi ke lambang tauka gaya maya ke ngajat, nya kebuah dipadah kitai ajat pua kumbu.

Lebuh maya ke ngajat mega, ayun jari, lentik punggung sereta pusin kaki sida ke indu pemadu iya alus dipeda udah chukup ngasuh ajat pua kumbu tu dikerinduka orang.

Ajat Bebunuh siti bidang ajat orang ke lelaki. Bungai ajat tu enda nyalah baka lelaki ti benung bedengah ke munsuh maya ke ngayau tauka lebuh maya nyumpit sereta ngasu begigaka jelu. Ngajat bebunuh tu mantaika reti lelaki ti berani sereta kering.

Ajat Lesung mega siti ajat enggi orang lelaki aja, laban lebuh maya ke ngajat lesung tu sida ke lelaki ngajat bepencha sambil ngetub lesung kayu ngena ngeli sida.

Lesung nya semina lekat ba mulut aja sambil jari kaki muka bungai (ngajat). Ngajat Lesung tu dikena nguji pengering isi sida ke lelaki lebuh maya mantaika Ajat Lesung.

Ajat Nyambut Pengabang siti ajat ti dikena maya ngintu pengerami. Raban bansa Iban suah agi ngena ajat tu lebuh maya nyambut penatai bala pengabang ti ngulu pengerami besai baka pengarami melah pinang, pengerami mangkung tiang tauka nyambut temuai ti bisi pangkat tauka orang pemesai.

Ajat Kuta iya nya siti ajat ti selalu dipeda kitai kemayahari tu kelebih agi ba pengawa pemerindang. Dalam ajat kuta tu bisi lelaki sereta indu. Suah bendar kitai meda ajat kuta tu ba alai pekit pengerami gawai, palan main asal ba seseiti menua kelebih agi ba menua Sarawak sereta mayuh bengkah agi palan ti bisi ngatur pengerami.

Dalam semua ajat ke udah ditemu kitai nya tadi bisi reti tauka chara bakani maya ke ngajat. Semua ajat nya tadi mesti bekenaka ngepan ti endang udah bisi nitih ke chuan ti udah digaga sida raban bansa Iban ari dulu menya.

Lebuh maya sida ke indu ngajat, sida ngena ke perengka baka Sugu Nanti, ngepan indu, gelang, gerunung lalu sida ke lelaki bekenaka Gagong, baju tenun, baju Buri sereta kain sirat lebih kurang 25 nyentuk ke 30 meter pemanjai. sirat nya tadi dililit ba punggung dipeda baka chawat.

Tegal menua udah mansang tauka moden, dia penemu raban bansa Iban udah mayuh dipekunsi enggau bansa bukai. Tegal ke mayuh amai penemu ti bisi, dia kitai meda bala nembiak diatu nyau makin ari makin mayuh agi gaya sereta bungai ajat ti dibantaika sida dikena merindang orang.

Pengawa ngajat tu enda tau enda dikemeranka datai kemayahari ila, awakka pengawa sereta adat kitai enda puntan ngapa. Bala nembiak baru mesti mega diasuh nemu sereta muka ati sereta muka runding ngambika nemu ngemeranka pengawa ngajat.

Perintah tau mega nirika alai sekula tauka palan alai belajar ngajat, ngambika tradisi tu ulih dikerembai datai ke jemah ila.

Read more: http://www.theborneopost.com/2012/08/10/sukut-dayaidup-bansa-iban-penemu-ba-pengawa-ngajat/#ixzz2WP1AkXwB

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s