PENGAWA JADI MALI, BASAPAT DI AI NGAU BAKALIH DI DARAT

Wednesday, March 18, 2009


CHARA NGEREJA PENGAWA BESAPAT DI DARAT

 
Pengawa besapat di darat tu di kerja leboh bejadi ke salah serak iya nya turun tusut tiga nangga empat. Reti nya pangkat tanah anak ka jadi enggau pangkat tanah aya tauka ibu iya empu (tauka ka jadi enggau menyadi ambu apai tauka indai iya, tauka menyadi tiri apai tauka indai ). Nyadi penyalah jadi salah serak ke di sapat di darat tu enda ngemesai penyalah jadi salah serak ke di sapat di ai. Nyadi chara seduai tu besapat iya nya nitih ke tampong serta kala udah dikerja ba menua kami empu di Rh. Undi, Brayang, Roban ba tahun 1991 iya nya bejadi ke Itut Ak Muyang seduai Ejah Ak Rajit (pangkat tanah aya jadi enggau pangkat tanah anak).

Tumu pagi dia semua kami serumah begempuru ba ruai sida ke ka di sapat di darat nya tadi. Nyadi udah semua terenah datai dia seduai iya lalu di asoh duduk ba tengah tuggong bala maioh. Udah nya baru tuai rumah lalu bejako madah ke kami ka ngintu seduai bejadi ngena jalai besapat di darat laban udah di temu salah serak ambi ke kena muai penti pemali.

Udah nya seduai tu lalu di iring kami serumah enggau kaban belayan ke bukai ke bisi datai berdiding ngena pua kumbu serta di iring ngena gendang berengkah ari rumah nyentok ke datai ba tengah laman rumah ke ka alai kami serumah mela pengawa seduai iya tu. Lalu orang ke lelaki ti dulu bejalai ke bala kami nya lalu nyan Sumpit Tapang sebatang, Sangkoh siti, nangkin Nyabor Chudur siti serta lalu mai Beliong Lajong siti. Utai bukai iya nya mai manok lelaki siko enggau tabak siti ti endang udah di sedia ke rengka ka kena miring. Lalu mega mai babi idup sesepa siko. Sida ke indu pan pia ga lalu mai tikai bebuah selambar, mai Jalong Jebong siti enggau Chapak Bebungai sesingkap.

Nyadi semua kami ke mansang ngiring seduai tu ngagai tengah laman rumah ke ka alai mela pengawa seduai endang nadai anembiak mit laban sida iya enda tau enggau ko jako sida ke tuai. Lalu kami ke tau enggau nya endang orang ke udah bisi ruang bilik maggang laban enggai ke utai ke di kerja nya tau ngerampit tauka sial nya di tampong bala anembiak ke bukai.

Datai kami ba tengah laman ke ka alai mela pengawa seduai iya, dia bala lalu beratur ngereja pengawa. Siko orang ke nemu ditaga ke ngereja pengawa miring lalu ngereja pengawa ba tengah laman nya lalu siko orang tuai nya ngelulu kediri nyadi petara lalu iya nya di asoh belalai ba babas enda jauh ari alai ke ka alai seduai tu di sapat. Pengawa miring pan lalu berengkah lalu leka biau bala lemambang lalu bisi madah ke munyi tu:

“Nyadi kami ke miau piring miau ading tu laban ngintu pengawa bejadi ke Itut seduai Ejah tu ke udah di temu ka jadi salah serak. Nya alai kami mai Sumpit Tapang sebatang tu kena kami nyebat ngerejang lubang kilat. Nyadi Chapak Bebungai sesingkap tu di kena kami nyekat tanah rarat. Nyadi Nyabor Chudur tu di bai kami kena mantap urat lensat. Nyadi Beliong Lajong tu di kena kami mungga urat melabat. Nyadi Pua Kumbu tu di kena kami miau moa hari ke udu balat betakat. Nyadi kami tu mai Jalong Jebong ambi ke bisi di kena kami map tekuyong ba baroh ungkap. Lalu babi sesepa siko tu di kena kami, ngenselan ai ambi ke tasik enda begelumbang enda belinggang, serta lalu di kena kami ngenselan darat (tanah) ambi ke menua enda berubah, tanah enda betingkah enda merekah”, nyadi nya meh siti ari bagi leka biau maia nya.

Nyadi piring ke di kena iya ngintu nya turun tiga, siti piring ke terubah nya di tumbak ke ba darat begulai enggau siko babi ke di bunoh lalu di tumbak ke segala ba darat udah ti ngenselan tapa kaki seduai nya. Siti piring ti kedua nya lalu di gantung ke ba mata sangkoh serta di ujak ke ba tengah laman ke alai ngereja pengawa. Siti piring ti ke tiga nya di anjong ngagai nanga jalai rumah kami empu.

Udah tembu pengawa miring nya, seduai iya lalu di asoh dudok ba atas setawak lalu di sayat ke babi ba tapa kaki seduai ambi sama basah laban darah babi kena ngenselan seduai iya enggau menua. Udah nya seduai iya lalu di biau ngena manok baru. Lalu leka biau nya mega bisi munyi tu: “Laban semua penagawa seduai tu ti besapat di darat nya tadi udah di kerja kami maggang lalu semua utai udah chukup genap chukup serkap nya alai kami ngarap ke pengawa seduai tu nadai pulai ke penti pulai ke pemali, lalu tanah enda berenyang, tasik enda belinggang, buah nyadi manah, tangkai labu enda layu.”

Ninga munyi nya siko orang tuai ke udah di padu ke ngelulu kediri nyadi petara ti di asoh belalai ba babas enda jauh ari nyn pan lalu pansut serta nyapa, “Ooo…nama pengawa kita tu tak rami, bebunoh babi, bebai piring, bebai ading, begendang enggau setawak, betaboh ke dumbak, beiring ke sida endu tu ngena pua kumbu ?” pia ko iya.

Nyadi iya ke miau seduai ari seberai tu pan lalu nyaut, “Nya meh kami tu bejadi ke Itut seduai Ejah ke udah di temu kami jadi salah serak. Nya alai seduai iya di intu kami ngena chara besapat di darat,” pia ko iya.

Udah ninga saut nya dia iya ke belalai ba babas semak nya lalu nyumpah munyi tu, “Ooo ti baka nya manah meh berita ke di kerja kita, nyadi aku tu laban ke nyadi petara nya alai aku nyumpah kita nadai apa , nadai nama, gayu guru, gerai nyamai”…lalu ditampong enggau jako sumpah bukai ke manah di dinga bala maioh.

Nyadi babi ke udah di kena ngenselan seduai nya tadi lalu di tumbak ke segala ba tengah laman nya tadi. Manok lalu di bunoh kena ngenselan tapa kaki seduai iya lalu pala manok nya di gantung ba mata sangkoh begulai enggau piring, di engkah ka ba tengah laman nya tadi. Chapak lalu ditumbak ke dia.

Udah pengawa tu tembu bala maioh lalu mulai kediri ke rumah panjai lalu makai bebala maioh serta lalu ngereja pengawa bukai laban pengawa besapat di ai tu tadi udah kemas di kerja lalu nadai pulai ke pengirau bala maioh ke begulai pendiau enggau seduai ke jadi melaki bini salah serak nya tadi.


CHARA NGEREJA PENGAWA BESAPAT DI AI

 
Pengawa besapat di ai tu di kerja leboh bejadi ke salah serak iya nya turun tusut dua nangga tiga. Reti nya pangkat tanah anak ka jadi enggau pangkat tanah aya tauka ibu iya empu (tauka ka jadi enggau petunggal apai tauka indai iya). Nyadi chara seduai tu besapat iya nya nitih ke tampong serta kala udah dikerja ba menua kami empu di Rh. Undi, Brayang, Roban ba tahun 1992 iya nya bejadi ke Jatan Ak Randi seduai Aba Ak Dangan (pangkat tanah aya jadi enggau pangkat tanah anak).

Tumu pagi dia semua kami serumah begempuru ba ruai sida ke ka di sapat di ai nya tadi. Nyadi udah semua terenah datai dia seduai iya lalu di asoh duduk ba tengah tuggong bala maioh. Udah nya baru tuai rumah lalu bejako madah ke kami ka ngintu seduai bejadi ngena jalai besapat di ai laban udah di temu salah serak ambi ke kena muai penti pemali.

Udah nya seduai tu lalu di iring kami serumah enggau kaban belayan ke bukai ke bisi datai berdiding ngena pua kumbu serta di iring ngena gendang berengkah ari rumah nyentok ke datai di pendai. Lalu orang ke lelaki ti dulu bejalai ke bala kami nya lalu nyan Sumpit Tapang sebatang, Sangkoh siti, nangkin Nyabor Chudur siti serta lalu mai Beliong Lajong siti. Utai bukai iya nya mai manok lelaki siko enggau tabak siti ti endang udah di sedia ke rengka ka kena miring. Lalu mega mai babi idup sesepa dua iko. Sida ke indu pan pia ga lalu mai tikai bebuah selambar, mai Jalong Jebong siti enggau Chapak Bebungai sesingkap.

Nyadi semua kami ke mansang ngiring seduai tu ngagai pendai endang nadai anembiak mit laban sida iya enda tau enggau ko jako sida ke tuai. Lalu kami ke tau enggau nya endang orang ke udah bisi ruang bilik maggang laban enggai ke utai ke di kerja nya tau ngerampit tauka sial nya di tampong bala anembiak ke bukai.

Datai kami di pendai, dia bala lalu beratur ngereja pengawa. Siko orang ke nemu ditaga ke ngereja pengawa miring lalu ngereja pengawa ba pendai lalu siko orang tuai nya ngelulu kediri nyadi petara lalu iya nya di asoh belalai ba seberai pendai ke ka alai seduai tu di sapat. Pengawa miring pan lalu berengkah lalu leka biau bala lemambang lalu bisi madah ke munyi tu:

“Nyadi kami ke miau piring miau ading tu laban ngintu pengawa bejadi ke Jatan seduai Aba tu ke udah di temu ka jadi salah serak. Nya alai kami mai Sumpit Tapang sebatang tu kena kami nyebat ngerejang lubang kilat. Nyadi Chapak Bebungai sesingkap tu di kena kami nyekat tanah rarat. Nyadi Nyabor Chudur tu di bai kami kena mantap urat lensat. Nyadi Beliong Lajong tu di kena kami mungga urat melabat. Nyadi Pua Kumbu tu di kena kami miau moa hari ke udu balat betakat. Nyadi kami tu mai Jalong Jebong ambi ke bisi di kena kami map tekuyong ba baroh ungkap. Lalu babi sesepa dua iko tu di kena kami, siko di kena ngenselan ai ambi ke tasik enda begelumbang enda belinggang, lalu siko di kena kami ngenselan darat (tanah) ambi ke menua enda berubah, tanah enda betingkah enda merekah”, nyadi nya meh siti ari bagi leka biau maia nya.

Nyadi piring ke di kena iya ngintu nya turun lima, siti piring ke terubah nya di tumbak ke ba darat begulai enggau siko babi ke di bunoh lalu di tumbak ke segala ba darat. Siti piring ti kedua nya lalu di gantung ke ba mata sangkoh serta di ujak ke ba tebing pendai ke alai ngereja pengawa. Siti piring ti ketiga nya lalu di anjong ngagai tebing ai seberai nyin. Siti piring ti ke empat nya di anjong ngagai nanga jalai rumah kami empu. Lalu piring ke penudi nya ka di perarat ke nangkan seduai ti ka di sapat ba ai udah nya lagi.

Udah tembu pengawa miring nya, seduai iya lalu di asoh bediri ba dalam ai ba pendai nya lalu di biau ngena manok baru. Lalu leka biau nya mega bisi munyi tu: “Laban semua penagawa ba darat nya tadi udah di kerja kami maggang nya alai tu kami ngereja pengawa nyapat seduai di ai. Laban semua utai udah chukup genap chukup serkap nya alai kami ngarap ke pengawa seduai tu nadai pulai ke penti pulai ke pemali, lalu tanah enda berenyang, tasik enda belinggang, buah nyadi manah, tangkai labu enda layu.”

Ninga munyi nya siko orang tuai ke udah di padu ke ngelulu kediri nyadi petara ti di asoh belalai ba tebing pendai seberai nyin pan lalu pansut serta nyapa, “Ooo…nama pengawa kita tu tak rami, bebunoh babi, bebai piring, bebai ading, begendang enggau setawak, betaboh ke dumbak, beiring ke sida endu tu ngena pua kumbu ?” pia ko iya.

Nyadi iya ke miau seduai ari seberai tu pan lalu nyaut, “Nya meh kami tu bejadi ke Jatan seduai Aba ke udah di temu kami jadi salah serak. Nya alai seduai iya di intu kami ngena chara besapat di ai,” pia ko iya.

Udah ninga saut nya dia iya ke ba tanah seberai nyin lalu nyumpah munyi tu, “Ooo ti baka nya manah meh berita ke di kerja kita, nyadi aku tu laban ke nyadi petara nya alai aku nyumpah kita nadai apa , nadai nama, gayu guru, gerai nyamai”…lalu ditampong enggau jako sumpah bukai ke manah di dinga bala maioh.

Udah tembu pengawa tu seduai ti ka di sapat nya tadi lalu di asoh mansang ke ili pendai, udah nya babi siko lalu di bunoh ari ulu seduai nya tadi ambi ke tubuh seduai iya di telusor darah babi. Manok ke di kena bebiau nya pan lalu di bunoh mega ba ai nya baka ke enggau babi tadi. Piring siti pan lalu di perarat ka nangkan ke nya. Nyadi tubuh babi enggau manoh nya tadi lalu di perarat ke maggang enda di bai pulai. Gari ke udah di kena seduai nya mandi telusor darah babi nya pan lalu di buai. Pala manok ke kena miau seduai nya tadi lalu digantung ba mata sangkoh begulai enggau piring nya tadi ba tebing pendai ke alai seduai nya besapat.

Udah pengawa tu tembu bala maioh lalu mulai kediri ke rumah panjai lalu makai bebala maioh serta lalu ngereja pengawa bukai laban pengawa besapat di ai tu tadi udah kemas di kerja lalu nadai pulai ke pengirau bala maioh ke begulai pendiau enggau seduai ke jadi melaki bini salah serak nya tadi.

PENYALAH JADI MALI

 
Nyadi dulu kalia kitai Iban enti jadi mali baka anak jadi enggau apai tauka indai, tauka pangkat anak jadi enggau pangkat aya tauka pangkat ibu, tauka mentua jadi enggau menantu, tauka jadi salah serak nitih ke tusut, ukum iya kena bunoh kadua dua iko seduai ke ngaga penyalah nya, jalai munoh seduai ti jadi salah serak tauka jadi mali tu iya nya enggau buloh aur pantang ke udah di lancham tajam bendar lalu dipantang ka ba tubuh seduai ti di pegulai ka betangkup dalam siti lubang baka kitai ke numbak ke orang mati, tang nadai di simpan dalam lungun tauka santubong, indu ari baroh lalu lelaki ari atas. Lalu udah seduai iya nya ditumbak, dia buloh aur nya tadi lalu di pantang orang ke udah di padu ke ngereja pengawa mantang seduai nya tadi sampai ke seduai iya parai. Lalu udah seduai iya parai dia sepun buloh aur lalu di tanam atas apak bangkai seduai ke udah mati di aur nya tadi di tumbak kena ngingat ka alai pendam seduai iya. Nya alai di sebelah menoa kitai bisi buloh ke di kumbai orang buloh aur pantang, serta bisi di peda turun menurun kitai Iban nyentok ka kamaia hari tu baka ba Nanga Poi di Kanonit.

Kabuah alai kitai Iban badu agi ngena ukum pantang ngena buloh aur, bepun ari cherita indu siko benama Simbah dulu kelia nitih ka ajar Sengalang Burong. Laban cherita tu enda bepun ari tusut nya alai aku enda tentu nemu sekali ke cherita tu bendar tauka bula. Nyadi Simbah tu iya nya indu dara, tang nyau kalama dia iya di peda sida serumah tak lain pendiau baka ke udah betubuh bisi lalu di temu sida ngandong nadai bisi laki. Meda iya ngandong baka nya dia sida serumah lalu nanya iya sapa orang lelaki ke bisi buya udah enggau iya beleman. Nyau ke puas sida serumah ke nanya iya, tang Simbah tu lalu enggai madah ke sapa lelaki ti enggau iya beleman nya nyentok ka iya nyau di temu orang maioh ngandong nadai bisi laki.

Simbah pan agi enggai nusoi madah ke diri empu sigi digayap menyadi iya empu ti lalu enggau iya beleman sampai ke nyau betubuh bisi. Nya alai kebuah iya ke enggai madah ngagai orang maioh laban takut ka diri di pantang orang ngena buloh aur. Kandong iya pan nyau chukop sarat bulan, dia Simbah pan lalu beranak tang menoa sida iya balat bendar di pangka ka kudi, siang malam ujan enggau kabut nadai ngetu ngetu sepengudah anak Simbah tu ada. Tanah nyau tumpor laban tusor ti balat bendar di maioh bengkah endor, lalu mensia pan nadai meruan gawa laban hari ke selalu jai baka nya. Meda hari enda badu kudi, dia apai indai iya enggau sida serumah lalu minta Simbah enda tau enda madah ka sapa lelaki ke enggau iya beleman. Enti iya enda madah, orang maioh sigi udah besemaia deka munoh iya, meda kudi lalu enda nemu badu. Nyadi hari siti bedau ga orang maioh nya tadi munoh iya, dia tudah Simbah lalu di peda sida berua nimang anak iya di ruai, lalu tu munyi leka timang Simbah ngagai anak iya ti didinga orang.

Adu adu anak aku ukai nadai apai,
Endang aku tu bisi orang ngayap,
Tang enda kempang aku ka madah,
Takut ka kami duai di tinggang penusah,
Anang meh kita munoh aku ,
Enti aku tu salah tau betimbang,
Lalu tau di ukum nitih ke tusun tunggu,
Tau Besapat di ai, tau besapat di darat.
Bunoh ka babi siko di ai,
Lalu siko di darat,
Ke di kumbai babi emperingat,
Bai ka Nyabor chudur siti kena mantap urat lensat,
Beliong Lajong kena mungga urat melabat,
Jalong Jebong kena nudong tekuyong baroh ungkap,
Pua Kumbu kena kitai miau moa hari ke balat betakat,
Sumpit Tapang di kena ngerejang nyebat lubang kilat,
Chapak sesingkap di kena nekat tanah rarat,
Udah nya baru kami duai di ukum ngena benda rusa,
Kena besapat ngambi ka kena muai penti pemali.

Ninga leka timang Simbah munyi nya dia sida serumah lalu berunding ninga nya. Sida pan lalu madah ka enda nyadi ka munoh iya enti iya madah ka bagi lelaki ke enggau iya ngereja penyalah nya, tang sida ka ngereja pengawa ngenselan menua nitih ka leka timang Simbah nya. Simbah pan lalu madah ka sapa bagi lelaki ka enggau iya beleman nya. Iya nya menyadi iya empu ke benama Lamit. Menyadi iya empu ti ngayap iya ke lalu ngasoh iya ngandong. Udah nemu nya, orang maioh lalu ngereja pengawa nitih ka samoa utai ke dipadah ka Simbah nunda leka buah timang iya nya tadi. Sereta udah tembu sida ngereja pengawa ngenselan menua nya, hari pan lalu baik baka ka dibuai empeleman. Simbah seduai Lamit tadi enggai nyadi di pejadi ka sida serumah, laban seduai iya tak diri menyadi tampong pala. Nyadi hari ke balat kudi pan nyau tedoh udah bekau penyalah beleman Simbah seduai Lamit nya udah diadu ka ngena adat nitih ka munyi leka timang Simbah.

Adat tu pan lalu meruan di tampong kitai bansa Iban nyentok ka diatu. Enti orang bisi jadi belaki bebini salah serak tauka butang betumbang enggau pangkat anak tauka apai, tauka indai, tauka mentua enda tau enda diukum ngena adat lama tu, bunoh ka babi kena besapat awak ka menoa enda kudi.

Nyadi ukum Perintah nya siti ga jalai ke baru di kena kitai bansa Iban kamaia hari tu, lalu enda tau enda ninggang. Enti orang ke jadi salah nadai utai kena betimbang iya tau kena tinggang ukon jel nitih ka adat Perintah. Satu nangga dua, reti nya anak di temu salah jadi enggau aya lalu ka di sapat di darat enggau di ai. Enti nitih ka cherita tu anak tau jadi enggau aya tauka ibu menyadi apai tauka menyadi indai. Tang adat Perintah diatu seduai enda tau jadi. Dua nangga tiga, reti nya anak jadi enggau petunggal apai tauka petunggal indai lalu ka di intu besapat di darat aja enggau babi sekali sepa sereta ukum benda sigi alas. Adat Perintah, lelaki kena ukum tiga puloh kati, lalu indu dua puloh kati pulai ka Perintah tang seduai tau jadi melaki bini.

Bepun ari cherita tu alai kitai bansa Iban diatu badu agi mantang orang ke jadi salah serak, tauka beleman enggau pangan salah serak. Agi mega iya ke bendar bepun ari ajar Sengalang Burong ngagai Sera Gunting leboh Sera Gunting beleman enggau ibu iya empu, iya nya menyadi indai iya empu ke benama Dayang Langit ke digelar Dara Chempaka Tempurong Alang. Agi mega ba cherita tusut Sengalang Burong kitai tau macha ba lambar 30, dia kitai ka macha cherita pasal Puntang Raga ngajar Beti enda ngasoh iya mantang Abang ke deka jadi salah serak enggau Dayang Tali Bunga laban ketegal nadai kena betimbang.

Benda tunggu pulai ngagai nyawa duit dikena dalam menoa Bagi Kadua kemaia hari baka tu:
Nama Benda = Penyampau ba mata duit.
Sigi Menukul pulai ngagai mata duit RM00.50 sen.
Sigi Jabir pulai ngagai mata duit RM1.00
Sigi Panding pulai ngagai mata duit RM2.00
Sigi Alas muda pulai ngagai mata duit RM4.00
Sigi Alas Ngerang pulai ngagai mata duit RM5.00
Sigi Rusa pulai ngagai mata duit RM8.00
Sigi Rusa lelaki pulai ngagai mata duit RM10.00

Kabuah alai madah ka pemesai sekeda adat tusun tunggu benda pulai ngagai mata duit diatu laban cherita tu bisi mansa sekeda sida. Kenu ko jerita dulu kelia tunggu kitai Iban nadai disebut ngagai mata duit nyangka laban apin bisi Perintah tauka nadai duit leboh maia nya kelia. Rintai tusun tunggu nya samina diteba ba tengah aja, bisi mit agi ari nya ngagai sesingkap mangkok batu lalu bisi mega besai agi. Tang tusun tunggu ke selalu dikena diatu samoa udah disebut dia tadi. Tusun tunggu endang sigi nitih ka baka gaya enggau pemesai penyalah orang ti ngereja penyalah nya tadi. Bisi penyalah baka pemalu samina tunggu benda aja nadai enggau manok enggau babi. Bisi mega enggau manok tauka babi aja enda bebenda lalu bisi mega tunggu enggau manok tauka babi sereta enggau benda baka ke disebut tadi dikumbai sangkar. Ka tambah nya nitih ka gaya penyalah, bisi mega tambah besi, lungga, duku tauka nyabur, ka keris samengat enggau benda mega ka kurong samengat. Disebut ngena jako pandak duit nya tauka ganti benda diatu nitih ka pemesai nyawa sida ngagai mata duit baka ke diator datas dia tadi, Taja diatu enggau duit, tang nama benda agi disebut, enti enda nya nyau ukum Perintah disebut kati tauka pikul. Tang diatu iya nyau disebut nitih ke atur ba Adat Istiadat Iban 1993 enggau jako Mungkol.

Source: http://adatbansaiban.blogspot.com/2009_03_01_archive.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s