APAI SALI

APAI SALI
Gambar Harry Nyangoh : Siko ari penulis cherita Apai Sali tu ba tahun 1970’an

Sapa Apai Sali Tu Ke Bendar

Apai Sali tu enti nitih ke cherita ti di dinga aku ari kenang tauka tusoi ari bala sekeda Lemambang ari menua kami di pelilih menua pegai Kalaka iya nya nama iya ke bendar di kanggau ke orang Sebeginda Bujang. Apai Sali tu mega bisi di kanggau ke orang enggau nama ti selalu di kumbai orang maioh “Apai Saloi” ketegal pengawa enggau ulah iya ti di kumbai orang paloi. Apai Sali tu iya menyadi tuai ke sida Apai Keling (Keling Gerasi Nading, Bujang Berani Kempang – Laki Kumang). Menua Apai Sali tu iya nya Panggau Libau Lendat Di Biau Takang Isang.

Apai Sali tu bebini ngambi Engchelegit Tisi Langit, Enchelegi Nangga Hari lalu seduai iya bisi siko anak ke di beri seduai iya nama Sali. Apai Sali seduai Indai Sali nama nganggau ke pangan diri endang be emperian ke jako “Apai Duat enggau Indai Duat”. Apai Sali tu mega ukai orang ti paloi munyi ko ensera tang iya laban ke tuyu serta enda ngemesai ke diri, tang iya tu iya nya orang ti pintar lalu nyadi ke tuai semua petara ari menua Panggau.

Kebuah pia laban munyi ko tusoi Rev. Fr. Mathew Ubon enti leboh maia orang Gawai Burong tauka Gawai Antu, sebedau orang ti begawai nya miring, sida iya mesti miring ke Apai Sali tu laban enggai ke iya ngachau bala orang Panggau tauka petara bukai ti dikanggauke diasoh datai ngabang. Udah nya baru sida iya miring ke Antu Enselua Antu Rangka ambi ke gawai nyadi serta utai dikena begawai nadai rua di kena nembu ke gawai nya. Apai Sali tu dikumbai tuai petara laban kelia bala orang Panggau kala begawai di tanju bepandong bedinding ke pua kumbu, lalu Apai Sali tu diau dalam pandong nya laban ti dikumbai sida iya anak petara lalu dipegawai ke sida iya leboh maia Apai Sali ti laboh terbai ari langit ba tanju orang Panggau munyi ti bisi disebut ba ensera ke ditusoi aku ditu.

Ensera Apai Sali tu maioh di tulis penulis kitai Iban ba tahun 1970’an lalu siko ari penulis nya ke di temu aku benama Harry Nyangoh, kerja ba opis pelajar lalu kerja nyadi pengajar berengkah ari tahun 1962 sampai ke iya pencen. Harry Nyangoh tu ada di menua Bawan, Kenowit ba tahun 1944 lalu ba tahun 1957 sida sebilik tu pindah ke Julau.
Posted 8th March 2009 by John Adam Gilbert

APAI SALI MANJOK BURONG

Bulih siti lalu berumpan ga iya empu enggau naka pengelengkas ke olih diri. Iya meh kira ke nyau ka bulih lima puluh iko semua burong nya udah ditanchang ke iya ba ujong iko sirat iya ari mua enggau ari belakang. Lalu semua burong nya pan nadai siko ga di bunoh iya, Nyau baka chiap pengerichah burong ngelinggi iya. Burong pan nyau majak maioh semaioh ke ulih tanchang iya ba ujong iko sirat bekelinggi ke tuboh iya. Naka iya pengerindu serta ransing iya sehari nya meda utai ulih diri.

Tak enda mukai mukai sekumbang ke benong kiroh betanchang ke burong ba ujong iko sirat iya, dia Apai Sali tak kesal serta tekenyit ati. Nyepi tak berenyut dan kara ke alai iya duduk nya tadi ko dikumbai iya di gusak antu, nadai ga meda utai nyelai. Sepi iya tuboh iya tak nyau majak terangkat, berinyut ari dan kayu kara nya tadi. Makin lama semakin tinggi ga asai tuboh iya nya tadi terangkat ari dan kara nya, nyau sampai ke iya nyau meda diri empu nyau udah ba atas puchok kara nya tadi.

Udah nya iya nyau meda diri empu nyau bela peninggi enggau bukit ke ba tisi umai sida. Nya baru iya nemu diri empu udah ditaban ke semua burong ke ditanchang iya ba ujong iko sirat nya terebai ke langit kin. Nyau meh tudah Apai Sali nyepi tubuh diri empu nyau beribut terebai ba atas semua utai naka iya peninggi ninggi serta naka iya penakut laban nangi kediri empu ti laboh sigi mati.

“Eh ! Eh ! Apo ! Apo !. Nyau meh aku tu ditaban ke burong ke langit kin. Badu meh aku tu agi meda Sali seduai Enchelegit Tisi Langit, Enchelegi Tisi Hari” ko Apai Sali bejako kediri enggau sabak sabak, sirut sirut laban ke takut serta rawan meda peninggi diri empu udah terbai di bai burong.

Burong ke naban ke iya pan lama agi tinggi agi ga penerbai, nyau tinggi setinggi. Nyau naka iya peninggi, rapas peda mata ari tanah, nyau bela enggau remang meh tudah Apai Sali ditaban ke burong terbai.

Makin lama selama dia enda mukai mukai tali ke kena Apai Sali nanchang burong nya pan nyau majak keru serta lalu putus laban ti enda tan. Burong pan lalu nyau siko siko ngelepas kediri ari ti ditanchang iya ba ujong iko sirat nya. Enda lama lalu lepas ga siko, lepas ga siko, lalu majak lepas, lepas, lepas, selepas meh semua burong ke udah ulih iya nya tadi.

Tudah Apai Sali ke terbai ditaban ke burong pan nyau semakin lama agi semakin baroh sebaroh ga penerbai laban burong nyau semakin abis seabis ngelepas kediri. Iya pan nyau majak takut serta temati kutu nadai agi runding laban nemu diri sigi mati ti laboh terengkah ditanah. Kira ka meh nyau ka sepuloh iko da kini burong nya ke agi bedau ba tanchang iko sirat iya. Apai Sali pan lalu laboh enda nyalah nyalah baka punggu ke laboh ari puchok kayu. Nyau semerap meh munyi iya ti laboh nya tadi, dia tudah Apai Sali bisi bedemoh enda lama laban ti luput tegal ti laboh.

Nyadi pengelaboh Apai Sali tu tadi seninjik bendar tak terengkah ba tanju sida Keling Gerasi Nading, Bujang Berani Kempang, Bebini Maioh Rambang di menua Panggau Libau Lendat Dibiau Takang Isang.

“Dop !” ko munyi Apai Sali laboh.

“Eh, nama nya tak Apai Sali ke laboh ari langit,” pia ko Indai Keling, ke benong nganchau padi ba tanju sida.

“Au ! Aku meh tu ti ditaban ke burong terbai ari puchok kara ke ba tisi umai kami,” ko iya madah ke cherita diri.

“Nama kebuah burong tau tak ulih naban ke nuan deh Dom ?” pia ko Indai Keling.

“Badu enda meh. Nyadi aku tadi manjok lalu bulih burong maioh amat. Ka ati aku munoh tang takut ke iya buot ti datai di rumah. Udah nya semua burong ke udah ulih aku tadi lalu ditanchang aku ba ujong iko sirat. Iya meh burong nya nyau kelalu maioh, sida pan lalu ulih naban ke aku terbai ka langit kin. Iya meh nyau lama kelama udah terbai dia tali ke dikena aku nanchang burong nya pan nyau putus seputus lalu burong pan nyau lepas selepas. Aku pan lalu laboh gab a tanju kita tu, “ pia ko iya nusoi cherita diri empu ke majok sehari nya.

“Nasip nuan laboh ba tanju kami ditu. Uji enti nuan tak laboh di ai tasik tauka ba tengah kampong, nya baru nuan parai,” pia ko orang maioh bejako enggau iya.

Semua orang Panggau Libau sekayu rumah nya pan lalu ketawa maggang maggang meda pemeli serta ninga cherita Apai Sali nya tadi. Udah nya iya lalu diasoh sida Keling sebilik tama ke rumah, lalu dudok ba ruai sida Keling berandau enggau orang maioh ke bisi nungga iya dia. Enda lama udah dudok ba ruai nya alai Kumang bini Keling lalu nganggau ke sida bebai makai ke bilik.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s