Aram miring kitai!

Kati peranak bansa bukai ke ukai Iban tau dipaduka miring?

6592812747_9f8e57b105_zLaban tanya tu tak empegal nunggal sekali, munyi ke minta saut enggau enda beranti, nya alai saut aku bisi dua pengambi, iya nya TAU enggau ENDA TAU.

Bansa bukai TAU diasuh miring enti piring nya piring basa, piring pedara lemai tauka keduran lemai ti diintu ketegal rindu tauka senang ati, piring dikena nyambut tauka ngerami Hari Gawai Dayak 1 hb. Enam ninting taun, piring Ngiling Bidai Gawai Dayak, piring dikena bebuti, piring dikena beterima kasih etb.

Enti enggai enda ngasuh bansa bukai miring, ba penemu aku, piring basa tu mih entara bansa piring ke pemadu patut diasuh piringka bansa bukai laban nya kira ke dikena kitai masa tua’, iyang tauka Petara sida iya angka tua’, iyang tauka Petara sida iya bisi datai enggau sida iya ngabang tauka nemuai ngagai menua tauka genturung pendiau kitai Iban.

Dalam jerita tuai, piring basa tu dipungkal Pulang Gana lebuh iya diuji Raja Semerugah beserumpu makai enggau Bujang Inin, anak Tegung Remaung Lubang. Dalam jerita nya, dia kitai nemu Pulang Gana sama mai antu, jelu, Laut, Bunut, China, Belanda, Petara enggau semua utai enseput ke bisi datai makai beserumpu nya sama miring enggau iya dikena iya meri basa ngagai sida nya.

1017483_461499217274900_574502083_nLimpang mimit ngenang basa dalam daya idup kitai Iban, basa kitai Iban ukai semina diungkupka ngagai diri sebansa aja tang mega nyerarai ngagai bansa bukai ti bisi datai nemuai tauka ngabang ngagai kitai. Dalam leka main bansa Iban baka timang (pengap) enggau sampi, ba genteran Ngerintai Tuai, dia kitai ninga sida ke lemambang suah masa Petara tuai bansa Rajang ke benama Sera Bungkuk Ketuk Tunjuk Ujung Jari, tuai bansa Laut ke benama Datu Nuga Tau Mantap Bena Pasang Sepagi, Rajah Brooke Pandai Mujuk Mudi Mengeri, Abang Dundang Ngembuan Tulang Pangkur Besi, tuai Beketan Mantu Hari, tuai Melanau Tipau Daie etb. ngena piring ngena ading awakka sama datai ngabang datai nandang ngagai sida ti begawai.

Enti miring baka ke dirintaika aku di atas nya tadi, orang ke nguluka bala nya miring mesti bansa Iban empu lalu Iban tu mesti nemu rengka piring, nemu tusun piring lalu nemu turun piring ke patut, sekalika nya piring satu, piring tiga, piring lima, piring tujuh, piring lapan tauka piring semilan. Biau piring ke bansa tu enda tentu panjai, suah tak semina naka minta pengelikun tauka meri terima kasih ngagai Petara lalu nadai ngangauka Petara enggau Bunsu Antu datai ngabang datai nandang, datai makai datai nandai, bebai pengaruh chukup mayuh nadai ke timpang, bebai ubat serangkap genap bisi magang.

miringBansa bukai ENDA TAU diasuh miring enti piring nya dikena bebabi (babi dibunuh lalu ati tauka atau babi nya dipeda dikena bechenaga) maya begawai kenyalang begawai kelingkang, beteresang mansau besandau liau, ijuk pumpung begawai lesung, begawai raya begerasi papa baka piring Petara kasih, piring ngambi Raja Nabau ngabang, piring ngambi Raja Remaung ngabang, piring Indai Abang, piring tanam tauka piring pun pandung, piring tasak, piring Sengalang Burung, piring Keling, piring Burung Malam, piring babi, piring empukung tauka piring antu pala, piring ngalu Petara tauka piring ngalu antu etb. laban ba pengawa ke baka tu orang ti miring enggau orang ti megai pengawa sigi udah dipilih orang ti empu gawai. Reti utai ti ku aku ditu iya nya enti tuju piring nya bisi bekaul enggau jalai pengarap asal kitai Iban, piring nya enda tau dikereja orang sengapa tauka bansa bukai ti ukai sejalai pengarap (pengarap asal) enggau bansa Iban.

251225_229615097049478_100000029681144_1011441_179351_nAsai ke salah jaku didinga, agi kelia, orang ke dipilih megai pengawa ke baka tu enda tau orang sebarang enti ukai orang ke sigi pugu kalu menua, raja berani, bujang berani, orang ke pangkat manuk sabung manuk pukung, orang ke petang pah kiba, betelaga di baruh tapa lalu ukai mega orang ke purih ulun laban kenu ku sida ke tuai ti masai megai adat asal kitai Iban, Petara enggai makai piring ke dipiringka orang purih ulun. Amat tauka enda utai tu, enda mih kitai nemu. Nya mih kebuah Iban kelia bejimat amat lebuh milih orang ke megai pengawa lalu enti ulih sida iya sigi nyelinting orang ke baka paku temu di gelung, baka tubu temu di rebung, baka kulat temu di tuchung, baka jala temu di sambung enggaika pengawa (gawai) enggau piring sida iya enda dikemuningka Petara.

Penemu aku pasal ngasuh tauka maduka bansa bukai miring dalam sekeda pengawa ke diintu bansa kitai Iban tu tau diseruri, tau diseleti, tau ditubu lalu tau mega disakal kita pemacha nitihka pematut. Pengawa ‘sembayang’ ke dikereja tuan paderi tauka tok imam enggau ‘puchau’ ke dikereja beliau tauka dukun enda tentu engkeman dibandingka enggau pengawa miring laban sembayang enggau puchau asal bansa kitai Iban endang meruan jelan meruan turan dalam leka timang, dalam leka pengap, dalam leka sampi, dalam leka biau, dalam leka sabak, dalam leka pelian ke asai sepi aku enda tentu ulih dikereja bansa bukai ke ukai Iban.

Kemaya hari tu, indah dih kitai bansa Iban empu pan bepilih endar ke agi bisi nemu nyada-nganaka leka ‘sembayang enggau puchau asal’ bansa diri ke dirintaika aku di atas nya enti enda macha ari bup laban sida ke lemambang, sida ke nyadi manang nyau mayuh udah danjan sulai lenyau ari baruh pun sandau liau ke kekitau nyari lang, mayuh udah danjan sulai lela ke bedega nyarang takang, mayuh udah danjan sulai ruat peraka urat kedandi nentang. Nasit ga “bansa dikelala ari jaku.” Uji enti “bansa dikelala ari pengarap asal”, tentu mih bansa kitai Iban diatu udah tebuka nunda ira tengang ditali, udah teberunsai nunda bingkai kepit tanggi, udah teberumpang nunda tibang melaki-bini, udah tebererak nunda geladak papan paji, udah rimpi baka lanji di teluk tibang, udah repuk baka ranjuk di pun tiang, udah pambu ari Lundu terus ke Limbang, udah laya semina ke jerita tempalai kenang laban adat lama nyau nadai orang nampung, pengarap asal nyau nadai orang nyurung.

Ari aku,

(NALONG ANAK BUDA)

Ketuai Pengarang
Pegari Iban Production

Bintulu, Sarawak

Source: http://pegari.net/kati-peranak-bansa-bukai-ke-ukai-iban-tau-dipaduka-miring/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s