Pengarap Iban bisi sama ngau agama Hindu

SOURCE: https://www.facebook.com/Ibanpedia/posts/10151292212166151

Laban bisi sekeda bala kitai ditu bisi nanya bakani tauka nama bukti pengarap lama kitai Iban kelia dikumbai bisi kena parit pengarap Hinduism, ditu aku nyelitka mimit leka penerang.

Pengarap Hinduism nya pengarap ti keterubah marit pengarap enggau gaya idup ukai semina ngagai kitai Iban aja tang mega semua pupu raban bansa ti seperugan enggau kitai. Bukti tu ulih dipeda dalam gaya idup enggau pengarap lama kitai Iban ti arapka antu, engkeramat, gagah, kebal, mimpi, nasip, niat, pantang tuai, penti pemali enggau mayuh ti bukai nya endang sebaka sekali reti enggau jalai nguna iya enggau pengarap Hinduism.

Ngambika banding:
1. Battara tauka Avatara dalam pengarap Hinduism nya sebaka sekali enggau leka jaku Petara dalam pengarap lama bansa Iban.

2.Brahma tauka Narayana ti tuai ke semua petara di langit din nya sebaka sekali enggau Biku Raja Petara tauka Kree Raja Petara ti tuai ke semua petara dalam pengarap lama bansa Iban ti ngaga langit enggau tanah lalu keterubah iya ngaga peturun mensia enggau antu.

3.Vishnu, iya nya petara ti ngibun mensia dalam pengarap lama bansa Hindu nya sebaka sekali baka Ini Adan enggau Menjaya Manang ba pengarap lama bansa Iban.

4. Shiva, iya nya petara guru ti selalu ngelalau orang nya sebaka Aki Lang Sengalang Burung ti nurunka penemu ngagai uchu iya Sera Guntin pasal pengidup sereta adat. Shiva mega dikumbai pengarap Hiduism “The Destroyer” ti sebaka enggau Sengalang Burung ti tau matak kayau tauka Petara Perang.

5. Indra ti petara Guntur, Agni ti petara api enggau Vayu ti petara rebut ba pengarap lama bansa Hindu nya sebaka sekali enggau raja Guntur, raja api enggau raja ribut ba pengarap lama bansa Iban. Pia mega Varuna ti petara tasik sebaka enggau Seragindi tin gaga ai bepati mayuh nanga.

6. Ganesa, iya nya petara utai tumbuh enggau tanah endur bumai enggau guna ke bukai nya sebaka sekali enggau Simpulang Gana tauka Semerugah ti petara tanah.

7. Tujuh iku burung ti diguna dalam pengarap bansa Hindu nya sebaka sekali enggau 7 iku burung mali kitai Iban, sida Ketupung diri meipar.

8 . Djwata, juata tauka Diwata, iya nya siku ari petara dalam ai dalam pengarap Hindu sebaka sekali enggau Raja Juata ti siku ari petara dalam ai ba pengarap lama bansa Iban.

9. Bharati, iya nya petara indu ti bajik, pandai, pintar ati enggau tau ajih ti diau dalam Sungai Bharatas nya sebaka sekali enggau Endu Meni Bentar Batu ti nyadi siku ari petara indu ti diau dalam ai ba pengarap lama bansa Iban.

10. Garuda, iya nya burung ti pemadu besai sereta makai mensia ba pengarap lama bansa Hindu nya ukai semina nyau ka sama nama enggau burung geruna, iya nya burung ti pemedu besai sereta makai mensia ba pengarap lama bansa Iban.

11 .Jatayus dalam pengarap lama bansa Hindu sebaka sekali enggau Bunsu Bubut tauka Bunsu Ruai.

12 . Kumbha-Kharna, iya nya pengambis besai antu sereta kering dalam pengarap lama bansa Hindu nya sebaka sekali enggau antu gerasi papa tauka antu Buau Nyada dalam pengarap lama bansa Iban.

13. Menua Kosala ti betuaika Maharaja Dasaratha ti ngadaka Rama, iya lelaki ti pengambis sigat, gagah, kebal, tau kayau enggau tau serang kelimpah ari ti tau ajih ba pengarap lama bansa Hindu nya sebaka enggau menua Panggau Libau ti betuaika Gila Gundi ti beranakka Keling, iya nya lelaki ti sama pengambis sigat, gagah, kebal, berani, tau kayau enggau tau serang kelimpah ari ti tau ajih ba pengarap lama bansa Iban.

14. Menua Mithila ti betuaika Janaka ti beranakka Sita, iya indu ti pengambis bajik, pandai, pintar ati enggau tau ajih nya sebaka sekali enggau Menua Gelung Batu Nakung ti betuaika Bedang ti beranakka Kumang, iya indu ti pengambis bajik, pandai, pintar ati enggau tau ajih ba pengarap lama bansa Iban.

15. Menyadi tiri Rama ti benama Barita, Laksaman enggau Sutruga ti sama gagah, kebal, berani, tau kayau enggau tau serang ba pengarap lama bansa Hindu nya sebaka sekali enggau menyadi Keling ti benama Laja, menyadi tiri iya ti benama Bungai Nuing enggau Pungga ti petunggal Keling ba pengarap lama bansa Iban.

16. Tiga iku indu ti bajik, pandai, pintar ati enggau tau ajih mega ba menua Mithilda ti jadi enggau Barita, Laksamana enggau Sutraga, iya nya pungka lelaki orang di menua Kosala nya sebaka sekali enggau Lulung, Selinggar Matahari enggau Endu Puyu ti jadi enggau Laja, Bungai Nuing enggau Pungga ba pengarap lama bansa Iban.

17. Sita ari menua Mithilda ti jadi enggau Rama ari menua Kosala nya sebaka sekali enggau Kumang ari menua Gelung Batu Nakung ti jadi enggau Keling ari menua Panggau Libau. Reti nya, pungka indu orang ari menua Mithilda ti jadi enggau pungka lelaki ti datai ari menua Panggau Libau nya endang bela tangkup.

19. Yama, iya menyadi tuai sida Rama ari Kosala ti mati lulus lalu nyadi raja di menua sebayan nya sebaka sekali enggau Kemping Padi, iya menyadi tuai Keling ti mati lulus mega ti lalu nyadi raja di menua sebayan ba pengarap lama bansa Iban.

20. Pengawa beranyai kitai Iban ti asal iya ngena batang pisang ending iya pengawa ti dikereja sida ke megai pengarap Hinduism maya ke sembiang. Piring Ading kitai mega sama bela bisi. Langit ti 7 serak lalu sebayan ti 7 serak kitai mega sebaka. Enggai mayuh agi penyama ti bukai…

Kereban Penyanding Penemu ti manah dibaca:
Sengalang Burung, Banedict Sandin
Raja Durung, Banedict Sandin
The Hidden God, Routledge & Keagen Paul
Iban Rites of Passage and Ritual, Henry Gana Gandi
The Rise Of Goddess in Hindu Tradition, Tracy Pintchman
Hindu Goddess: Beliefs and Practices, Lynn Foulston

One thought on “Pengarap Iban bisi sama ngau agama Hindu

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s