Bebiau pengabang kena bepinta pengerai ngau pengayu

Genap pengerami endang selalu bisi biau pengabang kena minta chelap embap ari Petara

Ba rumah panjai kitai Iban, ari kelia menya sampai ka kemaya haritu lebuh orang bisi pengawa begulu berami baka maya begawai baka Gawai Antu, Gawai Umai, Gawai Tajau, Gawai Burung enggau semua pengerami gaga ati baka Melah Pinang, siti ari penggal atur pengawa orang ke berami nya miau engabang.Mayuh orang enda nemu nama reti enggau kebuah pengabang enda tau enda dibiau. Dalam pekara tu, mayuh endar kebuah pengabang enda tau enda dibiau.

Kesatu, biau nya kena orang betabarka burung ke jai.

Kedua, iya dikereja orang kena ngelalu penatai pengabang mayuh ngichaka sida nya mai tuah, mai limpah ngagai orang ke empu rumah sereta ngagai bala pengabang empu, minta sida sama betuah belimpah baka orang ke empu rumah.

Ketiga biau nya mega kena minta kasih ari Petara ngambika meri penyelap enggau pengembap, meri pengerai enggau pengayu ngagai bala mensia mayuh nyengkaum bala pengabang sereta mega orang empu rumah.
Reti nya biau bepinta pengerai enggau semua pemanah ke bukai baka minta pengelantang penyenang dalam pengidup.

Biau pengabang tu sigi dipejalaika orang ba pun pengerami, iya nya udah bekau pengabang nyau jenuh udah duduk sereta mega penggal pengawa bukai, nitih atur sebuah-sebuah rumah panjai ke bempu pengawa, tauka orang sepintu bilik ke bempu pengawa, kelebih agi baka dalam pengerami melah pinang.

“Nyadi leka biau pengabang nya mega nitihka pengerami nya. Enti iya Gawai Batu, biau pengabang bisi mega bepinta pemulih bumai betaun, lalu enti maya orang bebiau Gawai Antu, leka biau nya deka muji orang ke empu ruang bilik dulu, udah nya baru muji bala pengabang mayuh ke datai.

Mayuh macham leka biau pengabang, laban iya nitih gawa atur pengawa ke alai sida nya ngabang,” ku Mathew Banyin Nyaru ke tebilang landik bebiau di menua Batang Malupa, Saratok.

Genteran biau pengabang ke dikena ka chuan dalam lambar tulis tu nya siti ari genteran biau ke selalu agi dikena orang miau pengabang ba menua Batang Ai, Skrang, Batang Lupar, Saribas enggau Krian, kelebih agi pati Saribas baka menua Paku, Rimbas, Padeh enggau Layar, sereta semua ai Krian baka Kabo, Melupa, Kawit, Ulu Krian, Budu, Telik, Awik, Sebelak, Sebetan enggau semua genturung menua Krian ulu, tengah enggau ili.

http://www.mysarawak.org/2009/10/bebiau-kena-bepinta-pengerai-pengayu.html

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s