Penti pemali Iban taboos

What are the Iban taboos and their effects on the Iban way of life? Please read more if you wsh to know further.

http://tempalaikenang-uchutedung.blogspot.my/2014/06/penti-pemali-raban-bansa-iban.html

Penti Pemali Raban Bansa Iban

Panyun Jaku
 
Tu semina penerang ngelansa senentang penti pemali raban bansa Iban ngambika ulih nyadika tenggau enggau lalau bala nembiak rebak baru. Penerang tu semina dikena aku mungkal menalan kenang senentang penti pemali raban bansa Iban. Ngagai sida ke endang deka nemu enggau silik senentang pekara tu patut nyidi mayuh kereban ke bisi sereta mega orang tuai ke lansik senentang pekara tu.

Reti Penti pemali
 
Sebedau bejaku enggau lenak senentang penti pemali Iban dia patut kitai nemu reti penti. Penti nya ngembuan dua iti reti. Reti keterubah nya tagang adat ti enda sekali-kali tau dikereja sekalika dilanggar nya mediska kitai enti iya dikereja tauka dilanggar. Iya mega tau dikumbai pemali tauka pantang. Reti kedua penti nya sebengkah tunggu ti dikeluarka sebedau sebengkah penti dikereja tauka dilanggar (semadi enda tau enda).

Pementi nya jaku nama dikena nerangka reti bansa penti ti mesti dititihka. Bepenti nya jaku pengawa mai reti megai penti lalu penti pemali nya atur ti enda tau dilanggar.

‘…the traditional augury causes some complexity with many penti pemali (prohibitions), various omens, superstitions and delays in some works.’

Asal Iban Nemu Bepenti
 
Asal raban bansa Iban nemu bepenti bepun ari cherita burung Pung Kapung. Nunda ku cherita tuai, di Pulau Borneo tu menya semina dua iku melaki bini aja, iya nya burung Pung Kampung seduai bini iya ke tau ngajih semua kayu buah bebungai lalu bebuah. Cherita tu mega bisi ngenang pasal kebuah burung nya nemu asal meri mandi. Kebuah pia, laban bisi penanggul terubah seduai meri mandi annak seduai iya empu. Nyadi lebuh baru meri anak seduai mandi ba batang ai, lebuh baru nyungga anak, kaki anak mit nya sepiak lalu ditagup ikan juak. Kaki iya lalu putus. Ari nya tadi kaki anak burung nya mina tinggal sepiak aja. Nyau kelama, tapa kaki nya tumbuh baru ,tang mih pandak mimit.

Udah bekau penusah kaki anak seduai ke kena tagup ikan juak, Pung Kapung enggau bini iya lalu mai anak seduai rari ngagai Pulau Sumatera. Nya alai bala ke tinggal ba Pulau Borneo tusah amat ati ditinggal sida laban nadai orang tau ngajihka kayu buah ngasuh iya bebungai lalu bebuah. Nyau kelama udah sida ke rari ngagai Pulau Sumatera, semua utai idup di Pulau Sumatera pedia amat laban kayu tak nadai bebuah. Laban nadai orang bukai kelimpah ari Pung Kampung enggau bini iya ke tau ngajihka kayu buah bebuah, nya alai semua sida setujuka seduai melaki bini nya diambi pulai ari Pulau Sumatera. Taja pia, sida dulu betalat sapa ke patut diasuh ngambi seduai pulai ngagai Pulau Borneo.

Ikan ai tabar lalu nyaut madah sida enda ulih meraka tasik. Ular pan nyaut madah sida nadai kaki lalu enda tesemeraika ai tasik. Menarat enggau Bandau madah sida enda makai buah, lalu nadai kebuah sida patut diasuh ngambi.

“ Kami endang enda makai buah, lalu nadai kebuah kami begunaka Pung Kampung. Gaga mih enti kita mati, laban kami lalu makai but kita,” ku seduai. Ninga jaku seduai munyi nya, bala mauh dia pedis magang ati ngagai Menarat seduai Bandau sereta lalu nyumpah seduai iya.

“ Kita menarat enda tau niki kayu, enti bansa kita bisi niki kayu, kita labuh,” pia ku jaku sumpah orang mayuh. Sumpah nya agi bisa sampai ke sehari tu. Bala jelu bukai nyaut madah sida enda ulih meraka tasik. Bansa burung pan nyaut mega madah sida amat tau terebai tang tasik ti patut diperaka nya kelalu besai lalu nadai alai sida inggap.

Udahnya baru bansa indu utai nyaut. Ku Kesulai, “ Kami duai Bebari tu mih dulu nguji ngambi pulai Pung Kampung enggau bini iya. Udah nguji nya baru nemu ulih enggau enda.” Bala ke gempuru dia sama setuju. Kesulai enggau Bebari lalu mupuk terebai. Nyau beberapa hari seduai pan datai ba tebing tasik. Nasit bisi runding, lebuh meda papung batang, seduai lalu inggap dia. Majak rarat mih papung batang nya, siang malam petang. Nyau beminggu, datai mih papung batang nya ba tebing Pulau Sumatera.

Mayuh udah alai seduai betanya, nya baru seduai betemu enggau Kusing ke madah alai Pung Kapung diau, iya nya puchuk ragai tebelian. Seduai lalu terebai ngiga ngagai endur nya lalu mujur tetemuka Pung Kapung. Tang burung nya madah sida enggai agi pulai ngagai Pulau Borneo taja pan anak seduai ke timpang kaki nya nyau udah bujang. Taja pia Pung Kapung madah bini iya bisi ninggal tiga igi telu ba punggu kayu temesu ba tucung Bukit Kinabalu.

“ Kita tau ngasuh burung Tuk Tarau meram telu nya.” Ku bini Pung Kapung.

Ningga nya seduai lalu beguai angkat pulai. Datai ba Pulau Borneo, lalu madah berita nya. Seninjik bendar telu tiga igi nya agi manah nadai dikachau utai. Nyadi nganti Tuk Tarau ke meram telu, bansa mensia lalu diasuh matak aum sereta ngempuru semua utai enseput baru laban deka nitah raja bansa sebengkah-sebengkah.

Laban menua nya nadai jelu singa, nya alai bala jelu nitah Aji Bulan nyadi raja tang bepun ari iya ke mai beban perau lalu ujung-ujung ambi iya nyadi kerituk pending, nya alai iya lalu tebuai jadi temuai. Jelu bukai lalu manchak iya enggau kentut sida. Nya alai Aji Bulan balat bau tengung nyentuk ke sehari tu.

Sida milih burung Pipi Awung jadi Raja burung lalu ngangau iya enggau nama Burung Raja. Bulu iya burik. Orang lalu milih burung Kunchit seduai Kempat Tiang jadi mata-mata semua burung. Seduai selalu mintih sebarang sapa ke ngelanggar adat, nyengkaum Menaul ke selalu minta diri makai maya malam.

Manuk pan bisi mega minta diri nyadi raja, laban gamal sida sigat, sereta landik mengkukuk. Tang ku bala mayuh, “ Kita manuk enda tau nyadi raja, laban kita enda ulih ngidupka diri empu, enti enda ditupi anak mensia. Ninga bantah nya, manuk lalu terebai ngerenchah semua puchuk pala orang mayuh lalu pegari tai manchak tudah Munsang.

Orang mayuh lalu nyumpah manuk, “Enti bala anak mensia renga, pedis pala tauka jai mimpi salah hari, biau kita enggau manuk ngambika iya tabar lar.”

Nyadi Munsang tu ensepi udah dipanchak Manuk enggau tai, lalu bejaku madah sida Munsang enda tau meda manuk, laban sida lalu deka nangkap sereta diempa mata. Bala ular lalu milih Tedung jadi Raja Ular. Enda mukai-mukai laban ke gali garing-garing semak kaki anak mensia, iku iya lalu kena indik mensia. Dia dih iya lalu mantuk tumbit nembiak nya. Meda baka nya mensia lalu nyumpah Tedung.

Ku iya, “ Sejeman dunya tu ila, kita Tedung enda tau meda anak mensia, laban enti kita bisi meda, tujuh hari udah bekau nya, kita enda tulihka pemakai.”

Nya munyi sumpah anak mensia enggau Ular Tedung, lalu nyentuk ka seharitu, semadi iya suntuk, nya baru bisi dipeda kitai. Semah dititah nyadi Raja Ikan. Udah Semah kena pilih, bala anak mensia lalu nanya penemu bala mayuh, “ Kati ku Ikan Juak ke nangkap kaki anak Pung Kapung, bisi penyalah utai bakanya?”

Semua bala ke dia bela madah pengawa Ikan Juak nya salah. Sida lalu nyumpah Ikan Juak, “ Nya alai ari diatu nyentuk ke sejeman kita nguan dunya tu, bala suku juru kita enda tau makai buah,  enti kita makai kita mati.” Sumpah nya nyerangkung ikan Adung mega laban nya sida sekaban, semina ti enda sama kengkang. Sampaika sehari tu dua bansa ikan nya mali makai buah. Ninga munyi nya, Ikan Juak bisi mega nyaut mimit. Sida ngaku salah sereta lalu meri jaku ajar mimit pasal jalai meri anak mandi. Ikan Juak nya madah sekeda adat enggau jalai terubah meri anak mandi ba batang ai tauka ba sungai.

Awakka nyadi tanda anak mit nya lelaki, piring enda tau enda engkah ba kelingkang, lalu sayap manuk mesti ditali enggau ubung mirah sereta ditanchang ba gansai lalu dientak ba tisi tebing ai awakka bala ikan nemu nya anak lelaki. Ari nya, bala sida ikan lalu tau nyumpah ngambika anak mit nya udah tuai ila tau serang, tau pandang, tau kayau, tau pulau.

Kena nandaka anak mit nya anak indu, Ikan Juak nya ngajar ngasuh naka mensia ngena leletan alai nanchangka kelingkang enggau bulu sayap manuk. Sida lalu tau nyumpah amak mit nyangambika iya tau nakar, tau gar, tau ngebat tau ngikat.

Anak mensia lalu diajar Ikan Juak ngasuh sida nyampi lebuh meri anak mit mandi, ngangau bala Raja Genali, Raja Lelabi, Raja Ikan, Raja Gemian, Raja Semah, Raja Tapah. Tu batang leka sampi meri anak mandi tang tau nambah enggau sampi berpinta sereta ngerintai bala tuai, bala petara aki, petara ini. Tembu besampi, nya baru muai piring siti ngagai ai, ngambika tasih ai reti iya.

Udah nya baru tau nabur ke beras kuning enggau letup ngichaka aji jadi tabar lar. Orang ke nyampi tadi lalu mantap ai enggau duku, ngambika ai nya enda bias.

“ Udah nya baru tau munuh manuk tauka babi ari ulu indu ke nyungga anak mit nya meri mandi. Darah nya tau nyadika terabai anak mit, ngasuh iya tan tubuh, panjai umur, gayu guru sereta jauh pejalai enti iya lelaki,” ku iya.

Ikan Juak pan ngajar ngasuh lebuh anak nya diturun ari rumah, indu ke mai iya nya mesti belalauka pua kumbu, awakka iya tegap kaki, tegap jari. Lebuh pulai ari ai, asuh duduk dulu ba setawak, ngambika iya teguh baka tembaga. Udah tembu nya, seduai meindai tauka sebarang sapa ke mai anak mit nya tau dibiau enggau manuk lalu tau ditatap enggau ai penyelap ngichaka iya chelap embap gerai nyamai, nadai apa, nadai nama.

Ku Ikan Juak, enti semua nya udah dititihka magang, sida tetap enda saruka anak mit nya, lalu enda betangkapka kaki iya sengapa.

Aum pan nyau abis. Nyadi telu tuga igi ke diperam Tuk Turau nya pan nyau mechah magang. Orang gaga magang laban bisi peturun Pung Kapung ke tau ngajih kayu buah ngasuh bebuah. Tang taja pia, sida tiga nya pandak kaki sepiak magang. Kebuah pia, laban lebuh indai sida betelu, apai seduai indai sama bisi megai kaki naka seduai ke timpang udah bekau kena tegam Ikan Juak. Kaki burung nya agi mengkang pandak sepiak nyentuk ngagai sehari tu.

Ari nya mih kebuah bala Iban lalu nemu bepanti pemali ke sebarang utai gaga, sebarang utai pegai kelebih agi lebuh maya bini ngandung. Nyadi penti pemali nya agi mengkang dikeingat raban bansa Iban sereta ditith sampai ke sehari tu.

Adat Bepenti Lebuh Berumah Sereta Atur Ba Rumah Panjai
 
Kelimpah ari nya mega raban bansa Iban bisi adat penti pemali lebuh berumah sereta atur enggau ulah ba rumah panjai. Peratika penti pemali lebuh berumah sereta lebuh diau segulai ba rumah panjai.

  1. Nyekangka rumah nya mali, malika rumah angat. Reti nya nginsur buka rumah ari pemesai iya ke lama enti rumah lama apin dirumpang dulu.
  1. Nikupka pemesai buka rumah enda tau, mali enggai betubuh.
  1. Rumah baru enda tau digaga ba tanju rumah lama, nya benama tebak sengkilu, mali rumah angat.
  1. Ba ujung rumah lama enda tau ngaga rumah baru, nya benama layar daun, rumah deka angat.
  1. Rumah baru enda tau digaga ari ili rumah lama enti iya enda digaga dua rantau dua lubuk ari ili. Semak ari nya, nya ke benama mandi daki. Pemali iya, kitai deka mati orang ke tuai megai pengawa rumah panjai.
  1. Ngaga rumah beseberai enggau rumah lama enda tau laban iya bejenguk pendai, mali rumah angat.
  1. Enti berumah ke ili, burung dikena nya nendak kanan siku enggau nendak kiba dua iku.
  1. Lebuh nganjung tambak burung ngagai tanah endur berumah, dulu ngiga nendak kanan dua enggau nendak kiba siku, udah nya baru ngerembang.
  1. Tiga bulan udah ngerembang, ramu enda tau enda nuntung ba endur ke deka alai berumah. Enti ramu enda nuntung lebuh dalam kandang nya, orang nya deka salah ngelaban adat balang rembang. Kena ukum babi siku, Sigi panding ambika sangkar babi , nyabur tuduh ambika kering semengat.
  1. Enti orang udah nuntungka ramu ba puting setak, lalu iya enggai agi dia, lalu deka pulai ke puting setak meraka ramu orang, enda tau enda meri genselan manuk siku, besi sebilah ke kering semengat. Tu dikumbai nyunggahka ramu.
  1. Enti tiang udah nuntung lalu enda dientakka lepas tiga bulan, nya ngelaban adat balang entak. Ukum babi siku, sigi panding ka sangkar babi, lalu duku sebilah ke kering semengat.
  1. Enti tiang udah dientak lalu enda dikebat dalam kandang 3 bulan, nya ngelaban balang kebat ke dikumbai meragai tiang. Ukum babi siku, sigi panding ke sangkar babi, duku sebilah ke kering semengat.
  1. Enti udah dikebat lalu enda ditiki atap lepas 3 bulan, nya dikumbai rangkah rumah. Ukum genselan enggau babi siku, sigi panding ke sangkar babi, nyabur tudeh ke kering semengat.
  1. Enti udah diatap tang enda diwan nya najuka rumahenti lepas 3 bulan. Ukum genselan enggau babi sepa siku, sigi alas ke sangkar, nyabur sebilah ke kering semengat.
  1. Enti rumah udah diatap, tang enda digaga ka dapur enggau para tauka enti dapur udah digaga, iya enda tau enda alai berapi tiap anak bulan. Enti enda pia, kena ukum manuk siku enggau duku sebilah. Tang enti orang bisi sakit laban dapur enda dipandukka, orang ke bepenyalah nya kena tunggu babi siku, sangkar sigi panding lalu kering semengat duku sebilah.
  1. Enti orang sakit lalu mati laban bisi dapur enda ditungkunka dalam rumah panjai nya, iya ke bepenyalah nya kena tunggu babi sepa, sigi alas ka sangkar, nyabur tuduh sebilah kena ngering ka semengat. Tu dikumbai tungkal.
  1. Enti orang diri sebilik belayabegagai meraka ruai orang, mai besi tauka kayu, orang nya salah kena ukum sigi alas.
  1. Enti orang belaya lalu mantap sabang orang ke enggau belaya, enti nya sabang gawai burung, kena ukum sigi alas, genselan enggau babi sepa, nyabur sebilah ke kering semengat. Enti nya sabang gawai umai tauka sabang gawai batu iya kena salah sigi alas, babi siku, nyabur tuduh sebilah.
  1. Enti orang bisi ningkilka antu palaari bengkung nadai kabuah, penyalah nya diukum enggau babi siku, sigi panding ke sangkar babi enggau duku sebilah ke kering semengat.
  1. Enti rakuplabuh enda tau enda genselan ngena manuk siku.
  1. Enti orang bisi mati ari luar rumah, bangkai iya ditikika rumah ngena babi siku, sigi panding ke sangkar, sebilah nyabur tuduh ke kering semengat. Enti iya temuai tauka kuli mati ba rumah kitai, nya benama tinggang bangkai. Genselan siku babi, sigi panding ke sangkar babi, sebilah nyabur tuduh ke kering semengat. Enti iya disengai ba ruai kitai, sesingkap pinggai ambika anchau tikai, panti gelegar bari sekayu. Enti tiki sentubung genselan babi siku, sebilah duku ambika kering semengat. Enti singgah bangkai, genselan enggau babi ke udah tumbuh taring. Enti ngena babi indu, enda tau enda ngena iya ke udah sekali sepa, sigi alas ke sangkar, laban iya ukai empu rumah.
  1. Enti orang terapba rumah kitai laban lubang tauka sawang enda dialitka, orang ke bempu ruai nya deka kena ukum sauta lalu diiring manuk siku. Enti orang telih, ukum ditambahka enggau pinggai sesingkap ambika sakap darah, kering semengat duku sebilah.
  1. Enti orang bekerikmansa ruai orang, kena tunggu sigi panding, genselan enggau manuk siku. Enti rumah bisi ngulit angkat orang bisi begendang mansa rumah, rumah orang ti bagendang nya kena tunggu sigi panding.
  1. Enti orang bisi perau, tauka buah, tauka utai ditupi kena bunuh pangan, iya ke empu utai rusak lalu muchau nyumpah orang ke di rumah nya bejalai niti rumah, iya kena tunggu sigi alas, genselan enggau manuk dua iku, dua bilah duku ambika kering semengat. Penyalah orang ti ngerusak serta munuh utai nya endang tau didawaka iya ba tuai rumah.
  1. Enti orang bisi ngandung ngampanglalu enda dipansutka apai-indai iya, enti orang bukai nyau ngelala kandung, iya diasuh dulu munuh manuk ambika gadai, awakka kandung iya chelap, enggau enti orang bisi sakit kena pandang kandung nya, tau gerai. Udah apai-indai nemu orang enggau anak sida beleman, nya baru nuntungka kandung. Rumah enda berat agi laban hal nya, laban manuk gadai udah dibunuh.
  1. Udah lelaki enggai diambu, indu enda tau enda munuh manuk dua iku kena mansutka ampang. Darah disadung ngagai rumah orang ti udah ditiki indu nya sekumbang iya udah ngandung. Bangkai manuk tu enda tau diempa, buai ke ai – mali lungau.
  1. Enti rumah bisi belian, rumah nya enda tau enda digantungka tambai. Enti temuai datai enda ibuhka tambai, iya deka kena tunggu orang ke empu pengawa nganti tambai manang. Reti nya nganti adat manang.
  1. Enti orang bisi najar kayusemak rumah orang, pengawa nya dikumbai nyakap rumah orang. Adat tu sigi panding, manuk siku enggau kering semengat.
  1. Enti nemu utai orang enda ingat tauka berayan ba jalai beri ngagai orang ke empu. Enti enda, udah nya temu orang ngelalaika utai tu, iya ngaki pulai sigi jabir.
  1. Penti jayau enda tau ensuruk kain indu ke basah.

 

Penti Pemali Ba Pengawa Bumai

Bansa Iban endang dikelala raban bansa bukai ketegal ngembuan mayuh macham daya idup. Siti ari nya, iya nya bumai. Kelia orang Iban ke enda ngembuan pengawa bumai, tau dikumbai ukai orang Iban. Pengawa bumai endang chara orang Iban kelia beridup enggau diri sebilik sereta ngulihka jereki. Pengawa bumai baka kemaya hari tu tebal agi dikereja orang Iban iya ke diau ba rumah panjai sereta nadai bulih pengawa ke entap. Pengawa bumai tu ngembuan mayuh adat, atur enggau penti pemali kediri empu.

Ba pengawa bumai tu, bisi penti pemali iya empu lalu tu enda tau enda dititihka bala sida. Kenu ku orang tuai menya, bisi pemali dikumbai mali labu. Reti nya, bisi sekeda bala Iban munya mali nanam labu tauka genuk ba umai. Enti bisi ditemu telesak genuk ba umai, dia dih darah babi tauka manuk dikena nasih tanah nya dia. Orang tuai kelia madahka pengawa nanam labu nya mali, enggaika bisi bala ari sida sebilik nya mati taun nya mega. Bisi sekeda Iban enda tau nanam lia enggaika bala sida sebilik nya bisi buta taun nya.

Sebengkah agi pemali maya bumai iya nya mali diabas. Kenu ku orang tuai, umai mali diabas orang bukai maya pagi hari, nya alai dikumbai mali pagi. Nitihka penemu Dr. Chemaline anak Osup, kena orang ti empu umai nya nyeliahka pemali tu, iya dulu mansang ke umai lalu nugal enggau menih tiga lubang padi sereta makai tiga suap asi. Dr. Chemaline mega madahka enti bisi orang nanya benung iya makai asi tiga suap nya, orang nya deka ditunggu ngena siku babi tauka siku manuk enggau benda sigi pending sereta duit dua ringgit.

 

Dalam bup Waris Daya Idup Iban Vol. 1, Dr. Chemaline madahka orang ke enchuri padi ba umai sebadau iya mansau deka ditunggu sigi mungkul, duit 50 sen enggau siku manuk. Amal penti pemali raban bansa Iban nyengkaum enda tau ngerusakka pandung endur engkah batu umai benung orang begawai batu.

Tepung Bulu tu sebansa ari utai tumbuh dalam babas. Iya dikena kitai Iban bebasu arang lebuh udah tembu pengawa nugal tegalan.

Reti bebasu arang tu chara dikena muai penti pemali ke ditanggam lebuh maya nugal tauka betanam.

Sekeda utai ke enda tau dikereja tauka mali dikereja maya betanam iya nya, enda tau mapal kukut, buk, ngambuh duku, laban pengawa ke baka nya enti dikereja ngeluluka padi tauka utai ke ditanam tasal lalu enda meruan tumbuh.

Udah pengawa betanam tembu, orang ke ngereja pengawa umai lalu muai penti pemali ke ditanggam sida sekumbang ke betanam.

Sida ngambi tiap bansa daun utai ke ditanam enggau arang ba umai lalu dibai pulai ke rumah. Datai dirumah semua daun enggau arang ke dibai ari umai tadi lalu dikusuk bechampur enggau daun Tepung Bulu lalu dikendas ba dinding. Lebuh sida ke ngendas ka utai tu ba dinding sida lalu besampi nyebut semua penti pemali ke ditanggam udah dibuai lalu nadai agi pemali.

Penti pemali maya ngasu beburu

Senentang penti pemali tu balat agi bepanggai ba sebengkah-sebengkah menua. Bisi mega lain peransang uduk dikena lain mega penti pemali iya. Maya kitai bebelaka babi mayuh macam mih penti laban meri sida uduk begunaka peransang dikena sida mujur ngiga babi. Ambika banding enti kitai ngidupka api ba palan kitai nunu babi, kitai enda tau sekali-kali muput api ngena pemuput. Api tau ditiup tang enda tau dipuput. Kenu ku reti mali nya ngambi uduk kitai enda jauh salak. Lalu kitai enda ga jauh ngagai uduk kitai ti sida benung nyalak babi. Mayuh mih penti pemali kitai ke ngasu.

Penti pemali Bukai
 
Tu sekeda ari penti pemali ke bisi dikemeran raban bansa Iban.

  1. Mali ngena tanggi dalam rumah enggaika ditinggang punggu.
  2. Mali tinduk mekang kira-kira pukul 5 lemai enggaika tesat lebuh bejalai begiga dalam kampung.
  3. Mali ngirit utai niti ruai enggaika rumah angat tauka kena tuntung penusah.
  4. Mali nungaka pala ke ili enti lebuh tinduk enggaika sebaka enggau antu sebayan.
  5. Mali bekuahka ai sabau tauka sup diri empu enti maya makai enggaika kena tuntung penusah enti lebuh begiga ba kampung.
  6. Mali ngena periuk tauka kali enggaika digagai jugam tauka jelu siga ke bukai lebuh bejalai ba kampung.
  7. Mali makai ngena tudung periuk enggaika tumbuh mayuh ragum.
  8. Mali ngigit tubu enti udah nganjung antu enggaika pisit parai.
  9. Mali duduk di pala tangga maya silau ari enggaika diperaka antu.
  10. Mali ngentakka ujung sengayuh ba tengah ruai tauka jalai enggaika ukui bira sengapa.
  11. Mali ketawa tauka bejaku lebuh maya nanam jagung enggaika jagung nadai isi.
  12. Mali ditanya lebuh benung makai maya nugal enggaika padi enda nyadi.
  13. Mali nyengukka pala aja ba mua pintu enggaika panjuk ti ditan enggai bulih jelu.
  14. Mali duduk ba mua pintu tauka jalai enti lebuh manang besudi enggaika ngempang jalai manang nangkap semengat orang ti sakit.
  15. Mali tama ke bilik orang enti lebuh manang belian ninjau ngena batu ilau enggaika semengat orang ti sakit nya siga.
  16. Enda ulih nyebut nama mentua Iban kelia enda ulih nyebut nama mentua, laban ku jaku orang tuai kelia, enti sida iya nyebut nama mentua sida iya, sida iya ulih kena busung. Busung tu pemali mih.
  17. Mayuh mega iban enda ulih makai baya. Baya tu suba ku jaku asal iya mensia.
  18. Orang ti puni enda tau nurun ke ai ku jaku laban enti sida nurun ke ai mata baya meda sida iya bukai baka mensia tang sida ti puni tadi nurun ke ai dipeda baka jelu, baka kera lalu nya mih kebuah baya nya deka ngereja sida iya mensia tu enda tau makai baya ku orang tuai kelia tang enti baya udah tulah makai mensia baru mih mensia ulih makai baya ti udah makai mensia ti tadi laban baya nya tadi udah tulah dulu tu mih ku jaku orang tuai kelia ngena gari bisi kulit baya baka sementing tauka tali pinggang, lumpet, etb enda mih tau.
  19. Mayuh mega pemali utai ti enda ulih diempa bansa iban sekeda bangsa iban enda ulih makai rusa, laban ku jaku orang tuai kelia enti makai rusa tu ulih kena resa
    resa tu mayuh macham jenis resa, aku pan enda entu nemu mega pasal resa tu. Bisi mega sekeda bansa iban enda tau makai ikan patin, kera, sawa enggau enda tau makai sekeda gi jelu bukai.
  20. Puni ku jaku orang tuai kelia enti deka nurun tang bedau makai tauka orang mai makai,  mai ngirup kupi dia kitai deka ngetu dulu singgah makai enggau ngirup, enti sida kitai ke enggai ngetu singgah mesti mih negu enggai ke puni.
  21. Kera enggau nyumbuh sigi enda tau ditupi ku sida niang ini laban jelu nya suba agi kelia munya tau nyadi antu buyu ngachau anak mit.

Bepenti maya ngandung

Bansa Iban mega balat bepenti kelebih agi bala indu ke benung ribat ngandung. Nyadi lebuh kandung orang indu Iban udah datai ba tujuh bulan nya baru indu nya enggau laki iya berengkah bepenti. Seduai iya mali ngetas randau atas ai tauka atas jalai enggaika indu kelalu begetah lebuh iya beranak. Seduai iya mali nekat ai, mali ngarut, mali nampunka bubu, mali mantangka paku lawang enggaika indu mar beranak. Indu mali ngelilihka minyak ngagai tapa lalu kena ngeminyak pala enggaika anak tuli. Seduai mali ngentakka ulu duku enggaika anak bengal. Seduai mali natuk telu manuk enggaika anak buta. Seduai mali nanam pisang enggaika pala anak besai. Seduai enda tau munuh jelu, burung tauka ular enggaika anak menawa sereta enggau deka bedarah idung. Seduai iya mali ngikis tachu enggaika anak enda tumbuh buk. Seduai mali bilik tama orang bisi nupi lelabi enggaika anak ngeram enda ada. Seduai iya mali narum enggaika anak ada chelum. Enti indu nya bejalai ke bukai, nya jalai iya mansang nya mega jalai iya pulai enggaika anak tesat jalai ada. Seduai iya mali makai utai dalam kibung enggaika beranak mengkang. Seduai iya mali ngema batu enggaika anak tungkut. Seduai iya mali megai bangkai enggaika anak menawa luput. Udah anak ada tang indai agi bisi getah dia apai iya mali nyilup tuduh enggau mali nekat ai. Sereta indu udah beranak penti pemali bukai enda mali dikereja agi ketungkah pemali ti besai agi ngagai maya anak mit nyau tau maut kaki diri nya baru penti pemali abis.

Simpul Kenang
 
Nama kebuah raban bansa Iban enggai enda bepenti lebuh bini betubuh bisi?  Laban nitihka pengarap kristian kitai endang nadai penangika jaku penti pemali. Lalu baka nya mega lebuh ngintu pemati bansa Iban ke kristian agi takutka bangkai nya diperaka mayau tauka ukui enggau jelu bukai. Lalu lebuh numbakka bangkai nama kebuah bala Iban ke kering megai pengarap kristian agi takutka daun idup tama lubang pendam lalu mesti deka diperesi sebedau bangkai nya diulurka sebedau dilamun enggau tanah.

Ngagai raban bansa Iban ke udah mekuh pengarap kristian dia mayuh penti pemali ke dikemeranka aki ini sida kelia udah jauh bendar ditinggalka laban ubah pemansang dunya. Sekeda ari penti pemali nya mega ukai semina udah retai ditinggal jeman tang enti agi dikemeranka nyentuk ngagai sehari tu tau bendar nyekat pemansang raban bansa Iban nya empu. Bisi mega penti pemali nya agi engkeman enggau jeman kemaya hari tu laban munyi ku jaku baka belayan padi lebat bebuah, tiap penti pemali nya tentu bisi rasional enggau kebuah. Patut tauka enda raban bansa Iban agi ngemeranka penti pemali ti udah di peturunka ari aki ini suba dititi temali ari kelia menya? Nya siti tanya ke patut diperundingka nembiak Iban rebak baru kemaya hari tu.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s