Nguji ngeraika sakit ngena pengap
Posted By : Valentine Tawie Salok
Date Posted : Friday 14-Feb-2014
LEBUH bala Iban kelia sakit sida terubah iya nganjung diri minta tubar tauka puchau manang, tauka sapa bala serumah nya ti nemu muchau. Nya pan bepanggai ba penyakit. Enti pedis perut, pedis pala mayuh orang ke nemu puchau. Tang enti penyakit bukai, sida neju manang aja mutarka penyakit nya. Manang tauka dukun ngepunka atur ngubat ngena jalai begama dulu, kena iya ngelala pemedis orang nya. Udah iya ngelala penyakit, baru iya muchau pemedis nya.
Enti penyakit nya patut diburah, iya lalu murah. Enti penyakit nya bedau gerai dibela dukun tauka manang ngena jalai burah tauka puchau, nya baru ngatur pelian. Mina manang aja meh ti nemu belian, lalu pasal sekeda pelian tu udah bisi dilansa aku dulu ari tu suba. Tang enti manang udah belian, lalu apin ga gerai, dia sida sebilik ti ngintu orang sakit nya lalu berunding deka ngambi lemambang besugi tauka berenung. Enti orang ke sakit nya enda gerai udah diperenung tauka dipesugika lemambang, dia sida serumah nya nyangka lalu baum deka begawai sakit ke alai lemambang mengap ka orang sakit nya.
Menya lebuh begawai sakit pan orang beambi ngabang kulu kili ba kelingi genturung menua sida dia. Tu siti utai ti manah ba adat asal kitai bansa laban enti sepintu diri serumah nya bisi pengawa manah tauka enda manah baka mati, tauka penusah bukai, orang serumah nya sigi sama enggau kiruh sereta sama ngintu. Apin lemambang datai ba rumah nya, bala sida serumah nya deka mansutka manuk kena ngerah orang beranchau tikai. Enti bala lemambang udah nuntung datai ba tengah laman, orang empu rumah nya lalu nganchau tikai ba tanah alai sida lemambang duduk ke lalu ditunga bala sida serumah nya. Sida pan lalu nanya bala lemambang nyangka bi s i burung. Enti bisi burung, sida lalu ngatur ai burung.
Jalai ngirup ai burung nya baka ke ngirup ai burung ba jalai gawai bukai, iya nya setengah irup lemambang lalu setengah irup orang empu gawai. Orang empu rumah lalu angkat ari endur nanya lemambang tadi. Bala lemambang pan angkat lalu nyebut leka pengap apin sida niki rumah. Bechuanka tulis pangan aku suba, niang aya Benedict Sandin – kami duai selalu betundi betimbal kangau timang jalung enggau pangan diri lebuh iya nyadi Senior Fellow ba Universiti Sains Malaysia (1975 – 1978 suba) – dalam bup iya Pengap Gawai Sakit, lemambang lalu nyebut leka ti manah muji rumah orang nya munyi genteran tu: Nya baru tebang petai di langit sungai, Nyaduh ka tubuh kitai mupuk bejalai. Tak nyau lama ngenung meh anak bujang Lemambang Luong, Meda kepai setunggul gantung, Enggi sida di Batang Malupa matung Empu nembiak redak di tapak Kedap langgung, Nampung perabung pematang pinang. Nyadi lebuh ke niki rumah bala lemambang pan lalu nyebut leka pengap ngerara pemanah tanggam tangga sida serumah nya.
Datai ba pala tangga sida pan lalu mansa dinding, sida pan ngerara pemanah chat dinding orang nya. Enti bisi dirias orang enggau ukir, sida pan lalu muji pemanah likau enggau chura ukir orang nya. Udah nya sida lalu tama kedalam agi ngagai rumah orang nya lalu nyebut leka pengap muji pintu ke belagu anak orang. Sida pan lalu begelih enggau ripih tiang medang lamba lulai, ba batang iya ditanchang ka gelanggang manuk tawai, ukai enda ba puchuk iya, teleba alai endu Teruna Dara Pandai ngeredai punggai tali tengkebang.
Nyadi lebuh bala lemambang deka nuduk ka diri ba ruai ti mela orang sakit nya, sida pan lalu muji pemanah anyam tikai ba ruai orang nya. Udah sida tembu nyebut leka puji,orang lalu nyambut sida miau manuk, kena miring. Tembu miring, manuk dibiau baru kena ngerah nyugu babi. Orang pan bejalai tiga kali besundang niti rumah dilagu enggau gendang panjai. Abis pejalai niti rumah orang lalu bedijir lalu disibur enggau ai tuak. Tembu nyibur ai, manuk dibiau baru kena ngerah niri ka tiang pandung ba tiap belah ruai. Udah pandung didiri nya baru miau manuk kena ngerandang jalai. Tembu nya lemambang lalu berengkah nyampi Sampi Gawai Sakit, tang sebedau nyampi sida dulu deka ngambi orang sakit nya pansut ari bilik lalu diengkah ba meligai di ruai sida empu. Lemambang ke nyampi nya lalu ngangau ka bala semengat tuai-tuai menua ke udah lesi nengali hari, udah parai nengali lemai, udah danjan nengali malam. Reti nya sida besampi ngerintai tuai, belabuh ari petara aki ini sida mega. Kebuah pia, laban minta sukung, minta tulung sida nya ngeraika tudah ti sakit nya. Nya alai ba pun sampi iya bakatu: O hoi! O hoi! O hoi! Nya baru terai-terai betanchang ratai, Nyaduh ka tubuh ngerintai tuai. Tu baru aku ngangkatka kita ke lama udah tetumpat, Tinggang urat sebangki api, Tu baru nyungkang kita ke udah tumbang, Tinggang batang tebelian wi.
Aku nyerungkai kita ke udah parai, Nyadi sampi tu panjai, lebih agi enti lemambang nya lalu nyebut rintai siku-siku tuai sida menua nya. Enti dalam Batang Krian, iya deka nyebut bala tuai Krian baka Gun Mangku Bumi, baka Antau Linggang Nengeri sereta mega baka Minggat Apai Runai tauka Tarang Apai Dungkong. Sida di menua Batang Saribas enggau semua pati iya nyangka deka ngangau bala aki ini sida empu mega, nitih ka dini alai rumah orang ti begawai nya, baka dalam Padeh, Paku, Rimbas tauka Layar. Baka sida di Paku tauka di Padeh enggau pati Saribas bukai, nyangka deka ngena leka sampi munyi tu: Ni nuan Petara Uyut nama Bedilang, Petara Atin Apai Saang, Petara Sabuk Apai Maang, Petara Dana Rekaya Bayang.
Tang batang kangau ti sebaka nya endang ngangau sida petara Keling enggau bala iya ari Panggau Libau Ke Lendat Dibiau Takang Isang, Merawa Lama Munyi Ke Berimba Buong Nebang, Tuchung Engkeranji Padi Baka Api Ke Nyadi Mauu Ngerendang. Nyadi sekeda ari kangan sampi nya munyi tu: Ni nuan Sigundi Sepit Api ke bejari rangang rangang, Nya tuai ke udah nadai dulu lesi alah di kaki Lembang Muang, Apai Jelingau tu enda taulenyau, Datai ari tuchung Panggau Libau, Lendat dibiau takang isang, Apai Datu Siku ke pemadu nama orang, Keling Aji ke berani tau serang. Ni nuan Ensing Gima bedada nyala ngerang kepayang, Nya berada apai nuan Laja aka Dara Lantan Sekumbang.
Ni nuan Simpurai Sumba ke linga pala pengerang, Simpurai Ketau datai ari tugau tunggul tebang. Nya baru ngangau ka Laja siku kerindu kaban dayang, Laja Sigat ke serangkap panau jarang. Tegal mayuh amat bala sida Panggau Libau, nya alai enda ibuh dirintai semua ditu. Udah tembu lemambang nyampi, pengawa gawai nya lalu dipenggal orang enggau sibur ai tuak. Nyadi dudi-dudi tu tadi, bisi ga orang begawai sakit meri orang ngirup ai kopi tauka makai bubur gasak tauka bubur kachang. Ukai nya baka diatu seneka ati utai bantai.
Tembu nya baru lemambang belabuh mengap. Sida bedau angkat tang nyebut leka pengap nya agi mengkang duduk. Nyadi udah nya nitih ka ripih pengap nya bala lemambang lalu Ngerara rumah orang ke deka begawai dientudika Ngading Iyang Lemambang ke alai lemambang ngerintai bala iyang sida sereta lalu ngichaka bala iyang nya datai mantu sereta nulung mai peminta ngena pengap sida awakka pengap nya sidi lalu ulih ngeraika orang ti sakit nya. Siti genteran ke disebut sida ditu nya munyi tu: Semadi aku ngading Iyang aku, Lemambang Penjuang Tangga Lulai, Ke datai ari menua iya di sungai, Kena tinggang tangkai ketunsang ngembang. Udah nya lemambang lalu Nyerayung pandung. Nya baru sida angkat bejalai.
Ripih pengap sida bakatu: keterubah iya sida beranchau tikai, udah nya nanggung baku, dientudi ka berunsut enggau ubat enda layu. Tembu nya bala lemambang lalu nyebut leka pengap ngeluluka sida mai orang ke sakit pansut ari bilik ngagai meligai – orang ke sakit nya sigi udah dibai pansut sebedau sida berengkah nyampi tadi belalau ka belachu panjai dua depa diiring lemambang tama ngagai meligai – lalu dientudi enggau leka pengap ngelulu sida duduk ngimbai orang ke sakit nya di bilik.
Nyadi sekali agi ga bala lemambang mengapngerintai tuai munyi ke udah disampi tadi, mina sekali tu sida ngerintai tuai e n g g a u benyawa tauka kangau pengap. Terubah iya sida ngerintai tuai aki ini orang menua nya empu. Udah nya sida lalu ngerintai tuai orang Panggau enggau Gelong. Tu kira ngerintai tuai antu. Entudi nya sida lalu nurun ka Petara Manang ari langit. Nyadi genteran leka main ti manah nya lebuh sida ngelulu deka Ngiga orang diinjau ngambi Menjaya Manang Raja datai ngabang. Rindu amat ninga leka sebut bala lemambang ditu.
Bisi ngasuh geli ati mimit lebuh sida nginjau Kusing seduai Entawai ngambi ngabang. Utai ti ngasuh ketawa nya lebuh Kusing seduai Entawai nanya indai diri empu. Lemambang udah nya lalu nyebut leka pengap pasal Kusing seduai Entawai ke nyikap diri deka nurun ngambi ngabang. Seduai lalu nurun ngambi ngabang tang apin nurun ambai seduai dulu ngangau deka mekal seduai enggau pengaruh kena beruntu bejalai jauh. Seduai pan lalu nurun ari rumah, ku kelulu lemambang. Seduai lalu mansa menua Manang Ridun, udah nya menua Manang Sampuk, udah nya menua Manang Ruai, menua Menggung, menua Aki Ungkuk.
Angkat ari nya lemambang ngelulu seduai datai ba Kebung Langit, udah nya baru datai ba menua Menjaya Manang Raja ke alai seduai niki madah pejalai. Udah Menjaya nutung pengaruh nya baru manang bukai nguang lalu sama nurun ngabang ari rumah iya. Jauh pejalai bala sida manang tu nitih ka kelulu lemambang. Bisi nya mansa menua Singalang Burung, iya nya menyadi Menjaya empu sereta bisi mega niki ngagai tuchung bukit Rabung. Lebuh nurun ari langit bala Menjaya terengkah ba kayu perugan gasing. Udah nya terengkah di tanah.
Mayuh menua kena pansa sida datai ka sida terengkah ba pendai orang ke begawai nya. Sida lalu mandi ba pendai nya, ku kelulu bala lemambang. Nyadi udah bekau mayuh kelulu pengawa bukai, bala lemambang lalu penudi iya nyebut leka pengap ngenang bala Menjaya Manang Raja ke ngambuh tubuh orang sakit nya di tanju. Udah tembu ngambuh, nya baru lemambang mengap baru mulai ka semengat antu enggau semengat sida iya empu. Tembu meh pengawa mengap ke lalu jadi pengujung Gawai Sakit. Tang gerai meh kitai ku Selempandai, gayu meh kitai ku antu, panjai nguan menua meh iya ti sakit nya, ku petara.
http://www.utusansarawakonline.com/opinion/166/Nguji-ngeraika-sakit-ngena-pengap/